អន្តរជាតិ
របបយោធាមីយ៉ាន់ម៉ា ធ្វើវិសោធនកម្មច្បាប់ដើម្បីការពារខ្លួនពីទោសទណ្ឌនៅពេលក្រោយ
17, Feb 2021 , 8:29 pm
ប្រជាជនមីយ៉ាន់ម៉ា ធ្វើបាតុកម្មនៅក្នុងទីក្រុងយ៉ាំងហ្គោន។ រូបភាព៖ AFP
×![]()
ដោយ: ធៀន ភារិន្ទ
រដ្ឋាភិបាលយោធាមីយ៉ាន់ម៉ា បានធ្វើវិសោធនកម្មមាត្រាសំខាន់ៗក្នុងក្រមព្រហ្មទណ្ឌប្រទេស ដើម្បីការពារខ្លួនមេដឹកនាំធ្វើរដ្ឋប្រហារនៅពេលអនាគត។ ការកែប្រែច្បាប់នេះ ធ្វើលើមាត្រាដែលចែងពីបទក្បត់ជាតិ និងការបះបោរ។ នេះបើតាមការចុះផ្សាយរបស់សារព័ត៌មាន The Irrawaddy នៅថ្ងៃទី១៦ ខែកុម្ភៈ។ 
របបយោធាមីយ៉ាន់ម៉ា បានរកច្រកដើម្បីគេចផុតពីការទទួលទោសទណ្ឌនៅពេលខ្លួនអស់អំណាច តាមរយៈការកែប្រែមាត្រាសំខាន់ៗក្នុងក្រមព្រហ្មទណ្ឌជាតិ។ បើតាមសារព័ត៌មាន The Irrawaddy ក្រមព្រហ្មទណ្ឌមីយ៉ាន់ម៉ា មាត្រា១២១, ១២៤ និង៥០៥ ត្រូវបានធ្វើវិសោធនកម្មតាមរយៈការកែប្រែ និងការបន្ថែមចំណុចខ្លះ។
ជាក់ស្ដែង មាត្រា១២១ ដើម បានចែងថា អ្នកប៉ុនប៉ង, អ្នករៀបចំកម្លាំងទ័ព ឬមធ្យោបាយផ្សេងទៀត ក្នុងការផ្តួលរម្លំស្ថាប័នរដ្ឋ ឬអង្គភាពណាមួយ ត្រូវចាត់ទុកថា ជាការក្បត់ជាតិ។ ផ្អែកតាមមាត្រានេះ សកម្មភាពក្រុមយោធាដឹកនាំដោយឧត្តមសេនីយ៍ មីន អ៊ុងឡាំង ជាទោសក្បត់ជាតិ។ ក្នុងគោលបំណងគេចផុតពីការទទួលទោស រដ្ឋាភិបាលយោធាបានកែថា មានតែការប្រើប្រាស់កម្លាំងទ័ព មិនស្របរដ្ឋធម្មនុញ្ញប៉ុណ្ណោះ ទើបត្រូវចាត់ទុកថា ក្បត់ជាតិ។
ចំណែកមាត្រា ១២៤ ដែលដាក់ទោសអ្នកញុះញង់ និងការបង្កឱ្យមានការមិនពេញចិត្តនឹងរដ្ឋាភិបាល ក៏ត្រូវរបបសឹកបញ្ចូលការដាក់ទោសលើសកម្មភាពប្រឆាំងស្ថាប័នយោធា និងមន្ត្រីយោធាដែរ។ អ្នកល្មើសមាត្រានេះ ប្រឈមមុខការជាប់គុកពី៧ឆ្នាំដល់២០ឆ្នាំឯណោះ។
វិសោធនកម្មច្បាប់ព្រហ្មទណ្ឌនេះ រងការរិះគន់ខ្លាំង ព្រោះការកែប្រែ ធ្វើឡើងដើម្បីការពារអ្នកដណ្ដើមអំណាច ហើយមិនបានឆ្លងការយល់ព្រមពីសាធារណជនផង។ លោក Sai Aung Myint Oo អ្នកជំនាញច្បាប់មីយ៉ាន់ម៉ា ចាត់វិសោធនកម្មនេះ ជារឿងគ្រោះថ្នាក់ណាស់ ព្រោះគ្មានការចូលរួមពីភាគីពាក់ព័ន្ធ ការផ្ដល់មតិពីប្រជាជន និងមិនឆ្លងកាត់នីតិវិធីច្បាប់ទៅទៀត។
សូមបញ្ជាក់ថា កន្លងទៅរដ្ឋាភិបាលយោធា ក៏បានផ្អាកការអនុវត្តមាត្រាមួយចំនួន ដែលមានចែងក្នុងច្បាប់ឯកជនភាពផងដែរ ដែលអនុញ្ញាតឱ្យអាជ្ញាធរ អាចចូលទៅឆែកឆេរ ស្រាវជ្រាវ រឹបអូសយកភស្តុតាង និងចាប់ខ្លួនដោយមិនមានដីការចាប់ខ្លួនជាដើម។
នៅក្នុងថ្ងៃទី១៧ ខែកុម្ភៈ បាតុកម្មបានឈានចូលដល់ថ្ងៃទី១២ ហើយ។ ក្រុមបាតុករ បានជាច្រើនពាន់នាក់ បានចេញមកជំទាស់នឹងអ្នកនាំពាក្យរដ្ឋាភិបាលយោធា ដែលអះអាងថាប្រជាជន ៤០លាននាក់ បានគាំទ្រការដកហូតអំណាចពីរដ្ឋាភិបាលស៊ីវិល។ លោក Sithu Maung សមាជិកបក្សសម្ព័ន្ធជាតិ ដើម្បីប្រជាធិបតេយ្យ បានអះអាងថា ប្រជាជនចេញមកតវ៉ាបែបនេះ ដើម្បីបង្ហាញថាពួកគេ មិនស្ថិតក្នុងចំណោមមនុស្ស ៤០លាននាក់នោះទេ។ នៅក្នុងទីក្រុងយ៉ាំងហ្គោន អ្នកបើករថយន្ត បានចាប់ផ្តើមយុទ្ធនាការ «ឡានខូច» ដោយចតរថយន្តជាច្រើនគ្រឿងនៅលើផ្លូវ និងស្ពាន ដើម្បីបិទផ្លូវ មិនឱ្យរថយន្តទាហានធ្វើដំណើរ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
