អន្តរជាតិ
ក្រុម Hacker មីយ៉ាន់ម៉ា វាយប្រហារវេបសាយរដ្ឋាភិបាលយោធា 18, Feb 2021 , 3:01 pm
រូបថត AFP
× ក្រុមចោរអ៊ីនធឺណិត នៅថ្ងៃទី១៧ ខែកុម្ភៈ បានវាយប្រហារលើវេបសាយរបស់ស្ថាប័នរដ្ឋមីយ៉ាន់ម៉ាដូចជាវេបសាយធនាគារកណ្តាល ប្រព័ន្ធផ្សព្វផ្សាយរដ្ឋ MRTV និងរដ្ឋបាលឱសថ និងអាហារជាដើម។ បើតាមការសរសេរបង្ហោះលើបណ្តាញសង្គមFacebook ក្រុមចោរអ៊ីនធឺណិត បានអះអាងថា ការវាយប្រហារនេះ ជាផ្នែកមួយនៃការចូលរួមប្រឆាំងនឹងក្រុមយោធា។
បាតុកម្មនៅមីយ៉ាន់ម៉ា កាន់តែរីកធំទៅៗ នៅស្ទើតែទូទាំងប្រទេស។ ក្រៅពីនិស្សិត ព្រះសង្ឃ ប្រជាជនសាមញ្ញ និងតារា ក្រុមចោរអ៊ីនធឺណិត ក៏បានប្រកាសចូលរួមក្នុងការប្រឆាំងនឹងរដ្ឋាភិបាលយោធាមីយ៉ាន់ម៉ាផងដែរ។
«គោលបំណងរបស់យើង គឺផ្តួលរម្លំរបបសឹក»។ ក្រុមចោរអ៊ីនធឺណិតមីយ៉ាន់ម៉ា បានសរសេរបែបនេះលើបណ្តាញសង្គមFacebook របស់ខ្លួនក្នុងថ្ងៃទី១៧ ខែកុម្ភៈ ដោយបន្ថែមថា ក្រុមរបស់ខ្លួន នឹងប្រយុទ្ធតាមអនឡាញ ដើម្បីលុបចោលនាយកដ្ឋាន និងជំនួញសំខាន់ៗ ដែលគាំទ្ររបបសឹក។
មកទល់ពេលនេះ ក្រុមចោរអ៊ីនធឺណិត បានវាយប្រហារលើវេបសាយរបស់ធនាគាកណ្តាលមីយ៉ាន់ម៉ា, ប្រព័ន្ធផ្សព្វផ្សាយរដ្ឋ MRTV, នាយកដ្ឋានពាណិជ្ជកម្ម, និងរដ្ឋបាលថ្នាំពេទ្យ និងអាហារជាដើម។ វេបសាយរបស់ស្ថាប័នទាំងនេះ គាំងមិនដំណើរការ។ ទន្ទឹមនេះ ក្រុមចោរអ៊ីនធឺណិត ក៏បានដាក់គោលដៅវាយប្រហារលើវេបសាយផ្សេងទៀតដែរដូចជា នាយកដ្ឋានវិនិយោគ និងរដ្ឋបាលក្រុមហ៊ុន, នាយកដ្ឋានពន្ធគយជាដើម។ នេះបើតាមការចុះផ្សាយរបស់សារព័ត៌មាន The Irrawaddy។
ការវាយប្រហាររបស់ក្រុមអ៊ីនធឺណិតនេះ ធ្វើឡើងស្របពេលរដ្ឋាភិបាលយោធា បានកាត់ផ្តាច់អ៊ីនធឺណិតស្ទើរតែទាំងស្រុង នៅពាក់កណ្តាលយប់ និងតភ្ជាប់ឡើងវិញនៅម៉ោងប្រមាណ ៩ព្រឹក។ គិតត្រឹមថ្ងៃទី១៨ ខែកុម្ភៈ បណ្ដាញអ៊ីនធឺណិត បានដាច់នៅពេលយប់ ៤ថ្ងៃជាប់គ្នាហើយ។
យ៉ាងណាមិញ អ្នកជំនាញសន្តិសុខតាមប្រព័ន្ធអ៊ីនធឺណិត លោក Matt Warren យល់ឃើញថា ការវាយប្រហារខាងលើ ធ្វើឡើងក្នុងគោលបំណងទាញយកចំណាប់អារម្មណ៍ពីសាធារណៈជនប៉ុណ្ណោះ។ បើតាមអ្នកជំនាញរូបនេះ បែបផែននៃការវាយប្រហារ ជាការផ្អាកដំណើរវេបសាយ ដែលផលប៉ះពាល់លើរបបសឹកនៅមានកម្រិត ប៉ុន្តែការធ្វើបែបនេះ មានការទទួលស្គាល់ច្រើនពីប្រជាជន៕
© រក្សាសិទ្ធិដោយ thmeythmey.com