COVID-19
អន្តរជាតិ
វេជ្ជបណ្ឌិតថៃអាយុ៦៦ឆ្នាំម្នាក់ ស្លាប់ដោយសារកូវីដ-១៩
18, Feb 2021 , 4:29 pm
លោកវេជ្ជបណ្ឌិត Panya Hanphanitphan រូបភាព៖ Facebook
×![]()
ដោយ: ធៀន ភារិន្ទ
វេជ្ជបណ្ឌិតថៃម្នាក់ ដែលរស់នៅក្នុងខេត្ត Maha Sarakham នៅព្រឹកថ្ងៃទី១៨ ខែកុម្ភៈ បានស្លាប់ដោយសារកូវីដ-១៩ ។ នេះ គឺជាករណីលើកដំបូងនៅក្នុងប្រទេសថៃ ដែលវេជ្ជបណ្ឌិត ស្លាប់ដោយសារកូវីដ-១៩ ។ 
លោក Panya Hanphanitphan គឺជាវេជ្ជបណ្ឌិតវ័យ ៦៦ឆ្នាំ រស់នៅក្នុងខេត្ត Maha Sarakham។ វេជ្ជបណ្ឌិតវ័យ ៦៦ឆ្នាំរូបនេះ បានឆ្លងកូរ៉ូណាវីរុស ដោយសារព្យាបាលអ្នកជំងឺកូវីដ-១៩ ចំនួន ៣រូប ដែលមកគ្លីនិករបស់លោក។ បន្ទាប់ពីដឹងថាអ្នកជំងឺទាំងនោះផ្ទុកកូវីដ-១៩ លោកPanya បានបិទគ្លិនិករបស់ខ្លួន នៅក្នុងថ្ងៃទី២៨ ខែមករា និងដាក់ចត្តាឡីស័កខ្លួនឯង។ នៅព្រឹកថ្ងៃបន្ទាប់ វេជ្ជបណ្ឌិតរូបនេះ បានទៅមន្ទីរពេទ្យ ដើម្បីធ្វើតេស្តរកកូវីដ-១៩។ ប៉ុន្តែលទ្ធផលលើកដំបូង បង្ហាញអវិជ្ជមាន។
រហូតដល់ថ្ងៃទី៣១ ខែមករា លោកវេជ្ជបណ្ឌិត បានចេញរោគសញ្ញាដូចជាឈឺសាច់ដុំ និងគ្រុនក្តៅ។ នៅថ្ងៃបន្ទាប់ លោកបានធ្វើតេស្តជាលើកទី២ និងមានលទ្ធផលវិជ្ជមាន។ ដោយសារមានផ្ទុកកូវីដ-១៩ លោក Panya ត្រូវបានបញ្ជូន ទៅមន្ទីរពេទ្យ Maha Sarakham ក្រោមការតាមដានយ៉ាងដិតដល់ មុនពេលបញ្ជូនទៅមន្ទីរពេទ្យ Srinagarind ក្នុងខេត្ត Khon Kaen។ ចាប់ពីពេលនោះមក សុខភាពរបស់លោក បានធ្លាក់ចុះជាលំដាប់។ នៅព្រឹកថ្ងៃទី១៨ ខែកុម្ភៈ លោកPanya ទទួលមរណភាព។ នេះបើតាមការផ្សាយរបស់កាសែតបាងកកប៉ុស្តិ៍។
គិតត្រឹមថ្ងៃទី១៨ ខែកុម្ភៈ នេះ ថៃមានករណីឆ្លងកូវីដ-១៩ សរុបចំនួន ២៥១១១ករណី និងអ្នកស្លាប់មានចំនួន ៨៣នាក់។ ចំណែកអ្នកជាសះស្បើយមានចំនួន ២៣៩៤៦នាក់។
តាមការបញ្ជាក់របស់រដ្ឋមន្ត្រីសុខាភិបាលថៃ លោក Anutin Charnvirakul វ៉ាក់សាំងរបស់ក្រុមហ៊ុន Sinovac Biotech ចំនួន ២០ម៉ឺនដូស នឹងមកដល់ថៃ ក្នុងថ្ងៃទី២៤ ខែកុម្ភៈ។ ចំណែកវ៉ាក់សាំងAstraZeneca នឹងចាប់ផ្តើមផលិតនៅក្នុងប្រទេសថៃ នៅក្នុងខែមិថុនាខាងមុខ៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
