កីឡាអន្តរជាតិ
អន្តរជាតិ
អ្នកស្រី Hashimoto ជាប្រធានអូឡាំពិកតូក្យូថ្មីជំនួសលោក Mori ដែលអស់តំណែងរឿងរិះគន់ស្ត្រី
18, Feb 2021 , 6:29 pm
×![]()
ដោយ: ទេព ពិទូរ្យ
អ្នកស្រី Seiko Hashimoto រដ្ឋមន្ត្រីក្រសួងអូឡាំពិកជប៉ុន នៅថ្ងៃទី១៨ ខែកុម្ភៈ បានក្លាយជាប្រធានគណៈកម្មកាធិការរៀបចំកីឡាអូឡាំពិកក្រុងតូក្យូឆ្នាំ ២០២០ ជំនួសលោក Yoshiro Mori ដែលចុះចេញពីតំណែងដោយសារពាក់ព័ន្ធនឹងការ «រើសអើងភេទ»។
Hashimoto ដែលសព្វថ្ងៃមានអាយុ៥៦ឆ្នាំ ធ្លាប់បានបង្ហាញខ្លួនក្នុងព្រឹត្តិការណ៍កីឡាអូឡាំពិកដល់ទៅ៧លើក ក្នុងនោះអូឡាំពិករដូវរងារ៤លើក និងអូឡាំពិករដូវក្តៅ៣លើក។ នេះជាការបង្ហាញខ្លួនច្រើនជាងគេបំផុតរបស់អ្នកស្រីចំណោមអត្តពលិកជុំវិញពិភពលោកសម្រាប់ព្រឹត្តិការណ៍ដ៏ធំនេះ។
ក្រៅពីកីឡាអូឡាំពិក អ្នកស្រី Hashimoto ជោគជ័យខ្លាំងបំផុតនៅព្រឹត្តិការណ៍កីឡាអាស៊ីរដូវរងាដោយទទួលបានមេដាយមាសសរុបពីកីឡាជិះស្គីដល់ទៅ៦ និងសំរឹទ្ធ១ផងដែរ។
អ្វីដែលគួរឱ្យភ្ញាក់ផ្អើលទៅទៀតនោះ ម្ចាស់មេដាយសំរិទ្ធិអូឡាំពិកវិញ្ញាសាជិះស្គីចង្ងាយ១៥០០ម៉ែត្ររូបនេះ បានបង្កើតប្រវត្តិសាស្ត្រថ្មីទៀតក្នុងប្រទេសជប៉ុន ក្នុងនាមស្ត្រីដ៏កម្រដែលមានមុខតំណែងទាំងក្នុងក្រុមប្រឹក្សាភិបាលកីឡា និងនយោបាយ។ អ្នកស្រីក៏ជារដ្ឋមន្ត្រីអូឡាំពិករបស់ជប៉ុនផងដែរ។
បើតាមការផ្សាយរបស់ទីភ្នាក់ងារព័ត៌មាន AP អ្នកស្រី Hashimoto ត្រូវបានតែងតាំងជាប្រធានគណៈកម្មាធិការរៀបចំអូឡាំពិកទីក្រុងតូក្យូបន្ទាប់ពីកិច្ចប្រជុំក្រុមប្រឹក្សាប្រតិបត្តិ នៅថ្ងៃទី១៨ ខែកុម្ភៈនេះ។ អ្នកស្រី ជាអ្នកជំនួសលោក Mori អាយុ៨៣ឆ្នាំ ដែលជាអតីតនាយករដ្ឋមន្ត្រីជប៉ុន ដែលត្រូវបង្ខំឱ្យលាឈប់តំណែងកាលពីសប្តាហ៍មុន បន្ទាប់ពីលោកនិយាយទៅកាន់សមាជិកក្រុមប្រឹក្សាភិបាលស្ត្រីថា«និយាយច្រើននិងរំខាន» នៅក្នុងកិច្ចប្រជុំក្រុមប្រឹក្សាគណៈកម្មាធិការអូឡាំពិកជប៉ុន (JOC)។
ការឡើងតំណែងជាប្រធានគណៈកម្មាធិការរៀបចំអូឡាំពិកទីក្រុងតូក្យូនេះ មានន័យថាអ្នកស្រី Hashimoto នឹងត្រូវដឹកនាំធ្វើការងារដែលមានរយៈត្រឹម៥ខែប៉ុណ្ណោះ មុនពេលព្រឹត្តិការណ៍កីឡាអូឡាំពិកក្រុងតូក្យូឆ្នាំ២០២០ ដែលត្រូវពន្យារទៅរៀបចំនៅឆ្នាំ២០២១ចូលមកដល់។ បើមិនប្រែប្រួលអ្វីទៀតទេនោះ អូឡាំពិករដូវក្តៅនឹងចាប់ផ្តើពីថ្ងៃទី២៣ ខែកក្កដា ដល់ថ្ងៃទី៨ ខែសីហា៕
Tag:
Yoshiro Mori
Seiko Hashimoto
Olympic
© រក្សាសិទ្ធិដោយ thmeythmey.com
