អត្ថបទពាណិជ្ជកម្ម
ពិធីចុះ MoU រវាងក្រសួងទេសចរណ៍ ក្រុមហ៊ុន កូកា-កូឡា កម្ពុជា និងសារព័ត៌មានថ្មីៗ ស្តីពី «ភាពជាដៃគូ លើការលើកកម្ពស់វិស័យទេសចរណ៍ ទីក្រុងស្អាត និងការអភិវឌ្ឍសមត្ថភាពអាជីវករលក់ដូរនៅតាមផ្លូវ» 19, Feb 2021 , 5:29 pm
× រាជធានីភ្នំពេញ៖ ក្រសួងទេសចរណ៍ ក្រុមហ៊ុន កូកា-កូឡា កម្ពុជា និងសារព័ត៌មានថ្មីៗ (Thmey Thmey) បានចុះហត្ថលេខាលើអនុស្សរណៈនៃការយោគយល់គ្នា ស្តីពី «ភាពជាដៃគូលើការលើកកម្ពស់វិស័យទេសចរណ៍ ទីក្រុងស្អាត និងការអភិវឌ្ឍសមត្ថភាពអាជីវករលក់ដូរនៅតាមផ្លូវ (Street Food Vendors)»។ ពិធីនេះ ធ្វើឡើងនៅទីស្តីការក្រសួងទេសចរណ៍ ក្រោមអធិបតីភាព លោក ថោង ខុន រដ្ឋមន្ត្រីក្រសួងទេសចរណ៍។
ពិធីចុះហត្ថលេខា លើអនុស្សរណៈនៃការយោគយល់គ្នានេះ ក្នុងបំណងចូលរួមរួមចំណែក ជាមួយរាជរដ្ឋាភិបាលកម្ពុជា ក្នុងការជំរុញភាពរីកចម្រើននៃសេដ្ឋកិច្ចជាតិ តាមរយៈការលើកកម្ពស់វិស័យទេសចរណ៍ក្នុងស្រុក និងការងារទីក្រុងស្អាត កម្ពុជាស្អាត ជាមួយនិងការជំរុញការអភិវឌ្ឍសមត្ថភាពអាជីវករ ប្រកបរបរសេវាកម្មទេសចរណ៍ខ្នាតតូច។
ជាលទ្ធផលភាគីទាំងបី បានឯកភាពគ្នាលើអនុស្សរណៈនៃការយោគយល់គ្នា ដែលខ្លឹមសារសំខាន់ៗរួមមាន៖
- ចូលរួមកម្មវិធីអភិវឌ្ឍន៍វិស័យទេសចរណ៍ តាមរយៈការបណ្តុះបណ្តាល អាជីវកម្មតាមផ្លូវកម្រិតខ្នាតតូចនៅតាមមូលដ្ឋាន។
- ចូលរួមធ្វើផែនការរួម ដើម្បីផ្តល់វគ្គបណ្តុះបណ្តាល និងការគាំទ្រនានាដល់ស្ត្រីជាម្ចាស់អាជីវកម្មខ្នាតតូច។
- ចូលរួមចំណែកក្នុងការបង្កើតកម្មវិធីបង្រៀនអនឡាញ សម្រាប់បណ្តុះបណ្តាលអាជីវករខ្នាតមីក្រូ និងកម្រិតគ្រួសារ ក្នុងការបង្កើនគុណភាពចំណីអាហារ អនាម័យ និងអភិវឌ្ឍន៍អាជីវកម្ម។
- ផ្តល់វាគ្មិនទៅវិញទៅមក ដើម្បីចែករំលែកបទពិសោធន៍ ពាក់ព័ន្ធវិស័យទេសចរណ៍ ទីក្រុងស្អាត ភាពជាអ្នកដឹកនាំ ការគ្រប់គ្រង និងសហគ្រិនភាព ។ល។
- ឯកភាពគ្នាផ្តួចផ្តើមគំនិត និងសិក្សាលើយន្តការ ឬកម្មវិធីផ្លាស់ប្តូរ និងផ្តល់ជូនជាផលិតផលកូកា កូឡា ជាមួយនឹងការប្រមូលសំណល់ប្លាស្ទិក (ថង់ប្លាស្ទិក ដបជ័រ កំប៉ុងជ័រ)៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com