ក្រុមហ៊ុន Ford និងGoogle បានសហការគ្នានាំយកប្រព័ន្ធប្រតិបត្តិការ Android មកបំពាក់លើរថយន្ត Ford ក្នុងឆ្នាំ២០២៣ខាងមុខ

អត្ថបទពាណិជ្ជកម្ម

ក្រុមហ៊ុន Ford និងGoogle បានសហការគ្នានាំយកប្រព័ន្ធប្រតិបត្តិការ Android មកបំពាក់លើរថយន្ត Ford ក្នុងឆ្នាំ២០២៣ខាងមុខ

19, Feb 2021 , 5:36 pm

រូបភាព

ដោយ: សារព័ត៌មានថ្មីៗ

កាលពីពេលថ្មីៗនេះ ក្រុមហ៊ុន Ford និង Google បានប្រកាសជាផ្លូវការ ពីកិច្ចសហប្រតិបត្តិការរវាងក្រុមហ៊ុនទាំងពីរ ដែលនឹងចាប់ផ្តើមនៅឆ្នាំ ២០២៣ ខាងមុខនេះ។ ក្រុមហ៊ុន Ford នឹងនាំយកប្រព័ន្ធប្រតិបត្តិការ Android មកដាក់ដំណើរការលើរថយន្ត Ford អមមកជាមួយនឹងមុខងារផ្សេងៗដូចជា៖ Google Apps, និង Service Built-In។ ជាមួយគ្នានេះដែរ Ford នឹងប្រើប្រាស់សេវាកម្ម Google ផ្សេងទៀតដែលមានដូចជា៖ សេវាកម្ម Google Cloud, កម្មវិធី Artificial Intelligence (AI), កម្មវិធី Machine Learning (ML) ផងដែរ។

ចាប់ពីឆ្នាំ ២០២៣ អតិថិជនរថយន្ត Ford និង Lincoln នឹងទទួលបានបទពិសោធន៍កាន់តែប្រសើរ ទាក់ទងជាមួយនឹងកម្មវិធីផ្សេងៗ ដែលជួយសម្រួលដល់ការបើកបរ ហើយជាពិសេសនោះ គឺប្រព័ន្ធកម្សាន្តបែបថ្មី ដែលអាចប្រើប្រាស់ផ្ទាល់នៅលើអេក្រង់ Touch Screen របស់រថយន្តដោយពុំចាំបាច់ភ្ជាប់ជាមួយនឹងទូរស័ព្ទនោះទេ។

លោក Jim Farley អគ្គនាយកក្រុមហ៊ុន Ford បានមានប្រសាសន៍ថា៖ “ក្រុមហ៊ុន Ford បានបន្តធ្វើកំណែទម្រង់យ៉ាងស៊ីជម្រៅ ដើម្បីឆ្លើយតបទៅនឹងតម្រូវការនាពេលបច្ចុប្បន្ន និងនាពេលអនាគត ដូចជារថយន្តអគ្គិសនី និងរថយន្តដែលអាចបើកបរបានដោយខ្លួនឯង។ ហើយថ្មីៗនេះ ក្រុមហ៊ុន Ford និង Google បានរួមគ្នាដើម្បីបង្កើត នូវការច្នៃប្រឌិតថ្មី ដែលអាចផ្តល់នូវបទពិសោធន៍ល្អប្រសើរ ជាមួយនឹងបច្ចេកវិទ្យាទំនើបថ្មីៗចុងក្រោយ។”

លោក Sundar Pichai នាយកប្រតិបត្តិក្រុមហ៊ុន Google និង Alphabet បានមានប្រសាសន៍ថា៖ “ក្រុមហ៊ុន Ford បានឈរជើងនៅលើវិស័យយានយន្ត អស់រយៈពេលជិត 120ឆ្នាំមកហើយ។ ថ្ងៃនេះដែរយើងពិតជាមានមោទកភាព ដែលអាចសហការគ្នា ជាមួយក្រុមហ៊ុន Ford ដែលអាចប្រើប្រាស់បច្ចេកវិទ្យាតាមប្រព័ន្ធអ៊ីនធឺណិត ក្នុងការគណនា វិភាគទិន្នន័យក្នុង Cloud ដើម្បីជួយផ្លាស់ប្តូរ និងបង្កើនល្បឿនអាជីវកម្មរបស់ Ford ឲ្យកាន់តែប្រសើរ និងកាន់តែផ្តល់សុវត្ថិភាពជូនអ្នកបើកបររថយន្ត Ford ទាំងអស់ថែមទៀតផង។”

តាមរយៈការប្រើ Android និងសេវាកម្ម Cloud របស់ Google ក្រុមហ៊ុន Ford នឹងអាចផ្ញើសារទៅកាន់អតិថិជនរបស់ខ្លួនបាន ទាក់ទងការស្នើឲ្យយកយានយន្ត ទៅថែទាំ ឬត្រួតពិនិត្យផ្សេងៗ ក៏ដូចជាការជូនដំណឹងសំខាន់ៗជាច្រើនទៀតផង។

សូមបញ្ជាក់ផងដែរថា ការប្រើប្រាស់ប្រព័ន្ធប្រតិបត្តិការ Android លើរថយន្ត Ford នាឆ្នាំ ២០២៣ ខាងមុខនោះ វាមិនដូចគ្នាទៅនឹងកម្មវិធី Android Auto នាពេលសព្វថ្ងៃនេះទេ ព្រោះថា Android Auto គ្រាន់ជាកម្មវិធីមួយប៉ុណ្ណោះ មិនមែនជាប្រព័ន្ធប្រតិបត្តិការឡើយ ហេតុដូច្នេះ មុខងាររបស់វាមានដែនកំណត់។ មួយវិញទៀត អ្នកអាចប្រើបានលុះត្រាតែភ្ជាប់វាជាមួយទូរស័ព្ទ Smart Phone ដែលមានប្រព័ន្ធប្រតិបត្តិការ Android ទើបបាន។ តែសម្រាប់រថយន្ត Ford នាពេលអនាគត ដែលបំពាក់មកជាមួយប្រព័ន្ធប្រតិបត្តិការ Android ស្រាប់វិញនោះគឺ វាដូចជាទូរស័ព្ទ Smart Phone ដែលមានប្រព័ន្ធប្រតិបត្តិការ Android អញ្ចឹង ដែលអ្នកប្រើប្រាស់ អាចបញ្ជាមុខងារសំខាន់ៗ ឬបើកកម្មវិធីផ្សេងៗ បានដោយខ្លួនឯង នៅក្នុងនោះផ្ទាល់តែម្ដងដែលមានដូចជា៖

• មុខងារ Google Assistant ជួយឲ្យអ្នកបើកបរ អាចផ្តោតអារម្មណ៍ក្នុងការបើកបរទៅមុខ និងបញ្ជាមុខងារផ្សេងៗរបស់រថយន្ត តាមរយៈការប្រើសំឡេងតែប៉ុណ្ណោះ

• មុខងារ Google Map បង្ហាញផែនទី និងទីតាំងបានច្បាស់លាស់ ដែលអាចជួយឲ្យអ្នកបើកបរ ទៅដល់គោលដៅ បានឆាប់រហ័សជាងមុន ជាមួយនឹងការបង្ហាញស្ថានភាពចរាចរណ៍ជាក់ស្តែង និងណែនាំពីគន្លងផ្លូវ ដែលយើងត្រូវបើកបរ

• មុខងារ Google Play ផ្តល់នូវការកម្សាន្តដល់អ្នកបើកបរ តាមរយៈមុខងារ Apps ជាច្រើន ដូចជាការស្តាប់ចម្រៀង, Podcasts, Audiobooks ដែលមុខងារទាំងអស់នេះ មាននៅលើរថយន្តស្រាប់តែម្តង។

តាមរយៈការបំពាក់ប្រព័ន្ធប្រតិបត្តិការ Android នៅលើរថយន្ត Ford នេះនឹងអាចធ្វើឲ្យក្រុមហ៊ុន Ford និងអ្នកអភិវឌ្ឍន៍កម្មវិធី Mobile Apps អាចបង្កើតកម្មវិធីកម្សាន្ត និងកម្មវិធីផ្សេងៗទៀតបាន ដើម្បីផ្តល់ជូននូវបទពិសោធន៍ថ្មី នៃការបើកបរសម្រាប់អតិថិជន៕

(អត្ថបទពាណិជ្ជកម្ម)