ជាតិ
សិក្សារបៀបដាំជីររណារពីកសិករ ខៀវ សុខឃឿន នៅត្បូងឃ្មុំ
21, Feb 2021 , 8:29 am
រូបពីមន្ទីរកសិកម្មត្បូងឃ្មុំ
×![]()
ជីររណារ ជាបន្លែដ៏ពេញនិយម និងមានអត្ថប្រយោជន៍ច្រើន ដូចជាអាចព្យាបាលជំងឺ ក្រពះពោះវៀន ផ្ដាសាយ ហៀរសំបោរ ជួយរំលាយអាហារ និងបំបាត់ក្លិនមាត់ជាដើម។ ថ្ងៃនេះសារព័ត៌មាន Thmey Thmey 25 សូមលើកយកបទពិសោធ របស់កសិករដាំជីររណារ ពីមន្ទីរកសិកម្មខេត្តត្បូងឃ្មុំមកបង្ហាញជូន។
លោក ខៀវ សុខឃឿន ជាកសិករដាំជីររណារ និងជាសមាជិកដាំបន្លែ នៅភូមិដូនទេស ឃុំទួលសូភី ស្រុកអូររាំងឪ ខេត្តត្បូងឃ្មុំ បានចែករំលែកពីវិធីសាស្ត្រដាំជីររណារ ដើម្បីទទួលបានទិន្នផលខ្ពស់។ កសិករអាចដាំជីររណារព្រោះគ្រាប់ និងដាំកូនតែកសិករ ខៀវ សុខឃឿន ជ្រើសរើសការព្រោះជីររណារព្រោះឆាប់បានប្រមូលផល។
តាមរយៈមន្ទីរកសិកម្មខេត្តត្បូងឃ្មុំ កសិកររូបនេះ បានលើកឡើងថា ជាទូទៅអ្នកបរិភោគចូលចិត្តជីររណារដែលព្រោះគ្រាប់ជាងដាំកូន។ ការដាំកូនដើមរបស់វា អាចរឹងជាងជីររណារដែលព្រោះគ្រាប់។ ដើម្បីដាំជីររណារ ទទួលបានទិន្នផលល្អ មុនពេលដាំជីររណារ ត្រូវភ្ជួរដីហាលចោល ៥-៦ថ្ងៃ។ បន្ទាប់មកត្រូវភ្ជួរដីម្ដងទៀត និងទុកចោល ៥-៦ថ្ងៃទៀត។ កសិករ សុខឃឿន បញ្ជាក់ថា ភ្ជួរដីចំនួនបីដង ទើបលោកចាប់ផ្ដើមលើករង និងយកគ្រាប់ជីររណារមកព្រោះ។
បន្ទាប់ពីព្រោះគ្រាប់ជីររណារ ត្រូវស្រោចទឹកមួយថ្ងៃបីដង ដើម្បីឲ្យដីមានសំណើម និងឆាប់ដុះ។ ជាធម្មតាចំនួន១៥ថ្ងៃ ជីររណារចាប់ផ្ដើមដុះ ហើយក្នុងរយៈពេលនេះ ត្រូវមើលថែឲ្យបានល្អ ផ្ដល់ទឹកឲ្យបានគ្រប់គ្រាន់ និងធ្វើស្មៅឲ្យបានញឹកញាប់។ សម្រាប់ជីររណារ មិនសូវពិបាកមើលថែនោះទេ នៅរយៈពេល ៣ខែ អាចប្រមូលផលបាន។ នេះបើតាមកសិករ ខៀវ សុខឃឿន៕
Tag:
ខៀវ សុខឃឿន
ជីររណារ
ត្បូងឃ្មុំ
© រក្សាសិទ្ធិដោយ thmeythmey.com
