ចលនាបាតុកម្មនៅមីយ៉ាន់ម៉ា កាន់តែពុះកញ្រ្ជោលឡើងខ្លាំង បន្ទាប់ពីបាតុករយ៉ាងហោចណាស់ ៣នាក់ បានស្លាប់នៅក្នុងបាតុកម្មទាមទារក្រុមយោធាប្រគល់អំណាចឱ្យរដ្ឋាភិបាលស៊ីវិល និងដោះលែងលោកស្រី អ៊ុងសាន ស៊ូជី។ ក្រុមអ្នកតវ៉ា បានអំពាវនាវប្រជាជននៅក្នុងប្រទេស ចេញមកធ្វើបាតុកម្មនៅថ្ងៃទី២២ ខែកុម្ភៈ ឱ្យកាន់តែច្រើនជាងមុន។ 

 

ថ្ងៃទី២២ ខែកុម្ភៈនេះ (២២ ២ ២០២១) ក្រុមបាតុករមីយ៉ាន់ម៉ា បានចាត់ទុកថា «បដិវត្តន៍២ចំនួន៥ដង»។ តាមការចុះផ្សាយរបស់សារព័ត៌មានក្នុងស្រុកThe Irrawaddy  ម្ចាស់អាជីវកម្មជាច្រើន បានផ្អាកមុខជំនួញរបស់ខ្លួន ដើម្បីចូលរួមក្នុងចលនាបាតុកម្មនៅទូទាំងប្រទេស។ ប្រសិនបាតុកម្មទ្រង់ទ្រាយធំបែបនេះ អាចកើតឡើងមែន វាត្រូវបានចាត់ទុកថា គឺជាការប៉ះបោរលើកទីពីរ នៅក្នុងប្រវត្ថិសាស្រ្តមីយ៉ាន់ម់ា ដែលធ្លាប់កើតឡើងម្តងនៅក្នុងថ្ងៃទី៨ ខែសីហា ឆ្នាំ១៩៨៨ ដោយប្រជាជនប្រឆាំងនឹងក្រុមយោធា ជុំវិញវិបត្តិសេដ្ឋកិច្ចកាលឆ្នាំនោះ។

 

ទាក់ទិននឹងបញ្ហានេះ របបសឹកមីយ៉ាន់ម៉ា បានព្រមានមុនមួយថ្ងៃថា ខ្លួនបានរកឃើញបាតុករជាច្រើនញុះញង់ឱ្យប្រជាជន ជាពិសេសយុវជន ចូលរួមក្នុងបាតុកម្ម ដែលអាចប្រឈមនឹងការបាតុបង់ជីវិត។ ទន្ទឹមនេះ ក្រុមយោធា ក៏បានបន្ទោសក្រុមបាតុករផងដែរ ជុំវិញការបង្កអំពើហិង្សានៅកន្លែងបាតុកម្ម ដែលទាមទារឱ្យក្រុមប៉ូលិសត្រូវតែបង្រ្កាបសកម្មភាពហិង្សាទាំងនោះ។ 

 

ក្រៅពីសេចក្តីប្រកាសខាងលើ រដ្ឋបាលតំបន់ ដូចជាក្រុងយ៉ាំងហ្គោន ក៏បានអំពាវនាវឱ្យប្រជាជនកុំចូលរួមបាតុកម្មផងដែរ និងត្រូវគោរពបម្រាមការជួបជុំមិនឱ្យលើសពី ៥នាក់ ដែលដាក់អនុវត្តក្នុងពេលកន្លងមក។ 

 

ប្រសិនបើគ្មានការប្រែប្រួលទេ ក្រុមប្រឹក្សាកិច្ចការបរទេសរបស់សហភាពអឺរ៉ុប នឹងបើកកិច្ចប្រជុំមួយនៅថ្ងៃទី២២ ខែកុម្ភៈ ដោយពិភាក្សាលើវិធានការដាក់ទណ្ឌកម្មលើរបបសឹកមីយ៉ាន់ម៉ា៕