ពីនេះ ពីនោះ
ព័ត៍មានសុខភាព
សុខភាព
ធ្វើដូចម្ដេចទើបដឹង ខ្លួនឯងមានក្លិនមាត់មិនល្អ ឬអត់?
23, Feb 2021 , 8:59 pm
×![]()
ដោយ: សារព័ត៌មានថ្មីៗ
កំពុងសង្ស័យមិនច្បាស់ក្នុងចិត្តថាតើខ្លួនឯងកំពុងមានបញ្ហាក្លិនមាត់មិនល្អមែនទេ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញពីរបៀបពិនិត្យឱ្យដឹងថាតើក្លិនខ្យល់ដង្ហើមរបស់អ្នកពិតជាមិនល្អមែនឬយ៉ាងណា ៖
១. លិទ្ធផ្នែកខាងក្នុងនៃកដៃរួចហិតស្រងក្លិន
ក្រោយពេលលិទ្ធផ្នែកខាងក្នុងនៃករួច ចូររងចាំសម្រាប់រយៈពេលពី ៥ ទៅ ១០ វិនាទី បន្ទាប់មកសឹមហិត។ វិធីនេះអាចឱ្យអ្នកដឹងបានយ៉ាងងាយថាតើអ្នកធុំក្លិនមាត់ឬអត់!
២. ប្រើម្រាមដៃលូកប៉ះគល់អណ្ដាត
ក្រោយពេលទឹកមាត់ដែលជាប់លើម្រាមដៃស្ងួត ចូរហិតម្រាមដៃរបស់អ្នក។
៣. ដកដង្ហើមចូលក្នុងកែវស្អាតមួយ
ក្រោយពេលដកដង្ហើមចូលក្នុងកែវរួច ចូរប្រើកែវនោះគ្របច្រមុះ រួចដកដង្ហើមចូល។ ក្លិនដែលអ្នកស្រងបានអាចជួយឱ្យអ្នកកំណត់បានថាក្លិនខ្យល់ដង្ហើមមានសភាពយ៉ាងណា។
៤. ប្រើប្រាស់ក្រដាសជូតមាត់ទន់មួយជូតកៀសផ្ទៃអណ្ដាត
ប្រសិនបើមានពណ៌លឿងនោះមានន័យថាប្រាកដជាធុំក្លិនមិនល្អហើយ។
៥. ប្រើប្រាស់ស្លាបព្រា
ប្រើប្រាស់ស្លាបព្រាមួយ ហើយកោសលើអណ្ដាត។ រងចាំឱ្យស្ងួតសិន សឹមហិតក្លិន។ អ្នកក៏គួរសម្គាល់មើលថាតើមានជាប់អ្វីពីផ្ទៃនៃអណ្ដាតលើស្លាបព្រាឬអត់។
សម្គាល់! អ្នកចាំបាច់គួររក្សាអនាម័យមាត់ធ្មេញនិងសម្អាតអណ្ដាតឱ្យបានត្រឹមត្រូវជាប្រចាំដើម្បីចៀសវាងបញ្ហាក្លិនមាត់មិនល្អ។ ទោះជាយ៉ាងណាបញ្ហាក្លិនមាត់មិនល្អអាចបណ្ដាលមកពីភាពស្ងួតក្នុងមាត់, អាហារមួយចំនួន(ខ្ទឹមស,ខ្ទឹមបារាំង) និងស្ថានភាពសុខភាពដូចជាជំងឺច្រាលទឹកអាស៊ីតក្រពះ។
ចំពោះបញ្ហាក្លិនមាត់ដោយសារក្រពះអ្នកអាចសាកល្បងបំបាត់បានគន្លឹះខាងក្រោម ៖
១. ទំពារការ៉ុត មើមគិនឆាយ ឬផ្លែប៉ោម
ផ្លែប៉ោមនិងការ៉ុតជួយធ្វើឱ្យការរំលាយអាហារមានភាពប្រសើរឡើង ក៏ដូចជារក្សាសុខភាពប្រព័ន្ធរំលាយអាហារផងដែរ។ នេះមានន័យថាគ្មានហ្គាស ឬឧស្ម័នផ្ដុំឡើងក្នុងក្រពះឡើយ ហើយអ្នកនឹងចៀសផុតបញ្ហាក្លិនមាត់មិនល្អ។ ម្យ៉ាងវិញទៀតបន្លែផ្លែឈើស្រស់ៗជួយបង្កើនការផលិតទឹកមាត់ក្នុងមាត់ដែលជម្រះរាល់បាក់តេរីបង្កក្លិនខ្យល់ដង្ហើមមិនល្អពីធ្មេញ អណ្ដាត និងអញ្ចាញ។ ក្រពះទទេរក៏អាចបង្កបញ្ហាក្លិនខ្យល់ដង្ហើមមិនល្អផងដែរដោយសារការកកើតឡើងនូវជាតិអាស៊ីត ហើយការទំពារផ្លែឈើនិងបន្លែ គឺជាវិធីដ៏ល្អបំផុតដើម្បីដោះស្រាយបញ្ហានេះ។
២. ទទួលទានបន្លែ
ក្លិនខ្យល់ដង្ហើមមិនល្អអាចជារោគសញ្ញាមួយនៃបញ្ហាច្រាលទឹកអាស៊ីតក្រពះ ឬជំងឺពាក់ព័ន្ធប្រព័ន្ធរំលាយអាហារផ្សេងៗ។ ទោះជាយ៉ាងណាបញ្ហាទាំងនេះមិនងាយនឹងកើតឡើងទេប្រសិនបើអ្នកមានប្រព័ន្ធភាពស៊ាំរាងកាយរឹងមាំ។ ហើយការទទួលទានបន្លែជាវិធីដ៏ងាយនិងប្រសើរបំផុតមួយដើម្បីពង្រឹងប្រព័ន្ធភាពស៊ាំ។ លើសពីនេះទៅទៀតបន្លែបៃតងមានផ្ទុកសម្បូរទៅដោយក្លរ៉ូភីលជទតកម្ចាត់ក្លិនខ្យល់ដង្ហើមមិនល្អពីក្នុងមាត់។
៣. រួមបញ្ចូលយ៉ាអួរគ្មានជាតិស្ករក្នុងរបបអាហារ
បាក់តេរីល្អៗក្នុងយ៉ាអួរជួយសម្រួលដល់ការរំលាយអាហារ ជាពិសេសប្រភេទផលិតផលផ្សំឡើងពីទឹកដោះគោ។ វាជួយរក្សាសុខភាពប្រព័ន្ធរំលាយអាហារកាត់បន្ថយបញ្ហាក្លិនខ្យល់ដង្ហើមមិនល្អគួរឱ្យកត់សម្គាល់។ បាក់តេរីល្អៗក្នុងយ៉ាអួរក៏ជួយកាត់បន្ថយកម្រិតនៃសមាសធាតុ sulfite ក្នុងមាត់បំបាត់បញ្ហាក្លិនមិនល្អបានយ៉ាងប្រសើរផងដែរ។ ទោះជាយ៉ាងណាត្រូវប្រាកដថាជ្រើសយកយ៉ាអួរគ្មានជាតិស្ករ។
៤. តែបៃតង
ការទទួលទានតែបៃតងអាចផ្ដល់អត្ថប្រយោជន៍ជាច្រើនចំពោះសុខភាពរួមបញ្ចូលទាំងការធ្វើឱ្យប្រសើរឡើងនូវមុខងារខួរក្បាលនិងកាត់បន្ថយហានិភ័យនៃជំងឺមហារីក។ វាក៏ជួយបន្សាបជាតិពុលក្នុងរាងកាយ ហើយអ្នកប្រាកដជាចៀសផុតពីបញ្ហាក្លិនខ្លួននិងក្លិនខ្យល់ដង្ហើមមិនល្អគួរឱ្យកត់សម្គាល់។ តែបៃតងក៏មានផ្ទុកសារធាតុប្រឆាំងអុកស៊ីតកម្ម catechin ដែលកម្ចាត់រាល់បាក់តេរីបង្កក្លិនខ្យល់ដង្ហើមមិនល្អក្នុងមាត់ផងដែរ។
៥. ទទួលទានតែខ្ញីលាយក្រូចឆ្មារ
ការរួមបញ្ចូលតែខ្ញីលាយក្រូចឆ្មារក្នុងរបបអាហារអាចជួយព្យាបាលអាការៈឈឺក្រពះដែលអាចក្លិនមិនល្អក្នុងមាត់បានយ៉ាងប្រសើរ។ ទោះបីអ្នកមិនចូលចិត្តទទួលទាន ប៉ុន្តែអ្នកអាចគ្រាន់តែខ្ពុរសម្អាតមាត់ជាមួយភេសជ្ជៈនេះក៏បាន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
