ជាតិ
រដ្ឋចំណាយប្រាក់ជាង២៣០លានដុល្លារ ផ្ដល់ឲ្យគ្រួសារក្រីក្រ និងងាយរងគ្រោះ ក្នុងវិបត្តិកូវីដ-១៩ 25, Feb 2021 , 9:29 pm
រូបតំណាង៖ (រូបពីក្រសួងសង្គមកិច្ច អតីតយុទ្ធជន និងយុវនីតិសម្បទា )
× ភ្នំពេញ៖ គិតចាប់ពីថ្ងៃទី២៥ មិថុនា ឆ្នាំ២០២០ ដល់ថ្ងៃទី២៤កុម្ភៈ ឆ្នាំ២០២១នេះ រដ្ឋាភិបាលបានផ្ដល់សាច់ប្រាក់តាមរយៈប័ណ្ណសមធម៌ដល់គ្រួសារក្រីក្រ និងងាយរងគ្រោះនៅអំឡុងពេលកូវីដ-១៩នេះ អស់ជាង២៣០លានដុល្លារ។ នេះបើតាមសេចជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។
ការបើកប្រាក់ឧបត្ថម្ភជុំទី៤ លើកទី២ ជាប្រាក់ប្រចាំខែកមរាឆ្នាំ២០២១នេះ គឺត្រូវបានបញ្ចប់កាលពីថ្ងៃទី២៤កុម្ភៈនេះ ដែលរដ្ឋាភិបាលចំណាយប្រាក់អស់ជាង៣០លានដុល្លារ។ ក្រសួងសង្គមកិច្ច បានបញ្ជាក់ថា ប្រាក់ឧបត្ថម្ភសម្រាប់ខែមករា គឹផ្ដល់ឲ្យគ្រួសារក្រីក្រនិងងាយរងគ្រោះជាង៦៨ម៉ឺនគ្រួសារ។ កម្មវិធីឧបត្ថម្ភសាច់ប្រាក់ជុំទី៤ ដល់គ្រួសារដែលប័ណ្ណសមធម៌នេះ គិតចាប់ពីថ្ងៃទី២៥មិថុនា ឆ្នាំ២០២០ ដល់២៤កុម្ភៈឆ្នាំ២០២១ ។
កន្លងមក សម្តេចនាយករដ្ឋមន្ត្រី ហ៊ុន សែន បានប្រកាសថា ការអនុវត្តកម្មវិធីឧបត្ថម្ភប្រាក់ដល់អ្នកក្រីក្រនិងជនងាយរងគ្រោះ គឺមិនអចិន្ត្រៃយ៍ឡើយ ពោលគឺកម្មវិធីនេះ អាចនឹងត្រូវលុបចោលវិញ នៅពេល ដែលស្ថានភាពជំងឺកូវីដ-១៩ នៅកម្ពុជាធូរស្រាល ហើយស្ថានការណ៍ វិលមកប្រក្រតីភាពឡើងវិញ។
រដ្ឋាភិបាលក៏ធ្លាប់ប្រកាសថា ភាពក្រីក្រនៅកម្ពុជា នៅសល់ក្នុងរង្វង់១០ភាគរយ។ តែធនាគារពិភពលោក ព្យាករថា ឥទ្ធិពលនៃការរាតត្បាតជំងឺកូវីដ១៩ អាចនឹងធ្វើឲ្យភាពក្រីក្រនៅកម្ពុជា ក្នុងឆ្នាំ២០២០ កើនឡើងពី ៣ ទៅ ១១ភាគរយបន្ថែមទៀត។
រដ្ឋាភិបាលបានបញ្ជាមន្ត្រីឲ្យដើរចែកស្បៀង ដូចជា អង្ករនិងត្រីខ ជាដើម រួមទាំងម៉ាស់និងក្រមាផងដែរ ទៅដល់គ្រួសារក្រីក្រ។ ជាមួយគ្នានេះ រដ្ឋាភិបាល បានឧបត្ថម្ភថវិកា៤០ដុល្លារ ក្នុង១ខែ ដល់កម្មករ-កម្មការិនីម្នាក់ៗ ដែលត្រូវព្យួរការងារ។ នៅពេលជំងឺកូវីដ-១៩ ផ្ទុះឡើងនេះ រដ្ឋាភិបាលបានត្រៀមថវិកា៣ពាន់លានដុល្លារ សម្រាប់ដោះស្រាយវិបត្តិសេដ្ឋកិច្ចនិងបញ្ហាផ្សេងៗ៕
Tag:
ឧបត្ថម្ភប្រាក់
គ្រួសារក្រីក្រ
© រក្សាសិទ្ធិដោយ thmeythmey.com