ជាតិ
សេវាដឹកភ្ញៀវនៅសហគមន៍តាតៃ និងកន្លែងកម្សាន្តនានា ក្នុងឃុំតាតៃក្រោម ត្រូវផ្អាក១៥ថ្ងៃ 26, Feb 2021 , 7:59 am
រូបភាពទាំងអស់ពីលោក សាគុណ ភក្ដី ប្រធានការិយាល័យព័ត៌មានទេសចរណ៍ខេត្តកោះកុង
× រដ្ឋបាលឃុំតាតៃក្រោម ស្រុកកោះកុង ខេត្តកោះកុង បានសម្រេចផ្អាកការដឹកជញ្ជូនភ្ញៀវដើរកម្សាន្ត នៅក្នុងសហគមន៍ទេសចរណ៍ធម្មជាតិតាតៃ ក៏ដូចជាសេវាកម្មកម្សាន្តនានានៅក្នុងឃុំ រយៈពេល១៥ថ្ងៃ ដើម្បីទប់ស្កាត់ការរីករាលដាលនៃជំងឺកូវីដ-១៩។ នេះបើតាមសេចក្តីជូនដំណឹងរបស់រដ្ឋបាលឃុំតាតៃក្រោម នៅថ្ងៃទី២៣ កុម្ភៈ។
ជុំវិញការផ្អាកតំបន់ទេសចរណ៍នេះដែរ លោក សាគុណ ភក្ដី ប្រធានការិយាល័យព័ត៌មានទេសចរណ៍ខេត្តកោះកុង បានប្រាប់ Thmeythmey25 ថាខេត្តកោះកុង ទើបមានការបិទការកម្សាន្ត នៅសហគមន៍ទេសចរណ៍ធម្មជាតិតាតៃ មួយប៉ុណ្ណោះ។
ការបិទនេះទៀតសោត គឺផ្ដោតទៅលើការជិះទូកកម្សាន្ត ការដឹកភ្ញៀវទេសចរទៅកាន់តំបន់ទឹកធ្លាក់ ក្នុងសហគមន៍។ ចំណែកការស្នាក់នៅលម្អែ តាមរីសតផ្សេងៗ នៅដំណើរការធម្មតា។ លោក សាគុណ ភក្ដី ពន្យល់ដូច្នេះថា៖ « ការបិទនេះ គឺបិទតែសេវាកម្មសហគមន៍តែប៉ុណ្ណោះ។ សម្រាប់រីសត ការស្នាក់នៅមិនបានបិទទេ គាត់បិទតែក្នុងមូលដ្ឋានសហគមន៍គាត់ប៉ុណ្ណោះ»។
បើតាមប្រធានការិយាល័យព័ត៌មានទេសចរណ៍ខេត្តកោះកុង នេះមិនមែនជាលើកទី១នោះទេ ការផ្តល់សេវាកម្មទេសចរណ៍នៅក្នុងសហគមន៍ទេសចរណ៍ធម្មជាតិតាតៃ ត្រូវបានផ្អាក។ តំបន់តាតៃ ក៏ធ្លាប់ផ្អាកការផ្តល់សេវាទេសចរណ៍ នាព្រឹត្តិការណ៍ឆ្លងកូវីដ-១៩ ក្នុងសហគមន៍ កន្លងមកដែរ។
សូមជម្រាបថា គិតត្រឹមថ្ងៃទី២៥ កុម្ភៈនេះ កម្ពុជាមានកូវីដ-១៩ សរុប៦៩៧ករណី ដោយសះស្បើយ៤៧៧ករណី និង២១៧ករណីកំពុងសម្រាកព្យាបាល។ អ្នកពាក់ព័ន្ធព្រឹត្តិការណ៍សហគមន៍២០កុម្ភៈ ដែលបានឆ្លងរាលដាលដល់ខេត្តព្រះសីហនុនោះ បានកើនឡើងដល់១៩៤នាក់ហើយ ភាគច្រើនជាជនជាតិចិន៕
Tag:
ឃុំតាតៃក្រោម
កោះកុង
កូវីដ-១៩
© រក្សាសិទ្ធិដោយ thmeythmey.com