តំបន់ដីសើម«រ៉ាមសារ» ខេត្តស្ទឹងត្រែងត្រូវបានបែងចែកជា២ គឺសហគមន៍អេកូទេសចរណ៍ និងសហគមន៍នេសាទ។ សហគមន៍ទាំង២នេះ សុទ្ធតែបានចូលរួមចំណែកថែរក្សាបរិស្ថាន តាមរយៈការស្លឹកចេក ជំនួសប្លាស្ទិក ដើម្បីខ្ចប់ម្ហូបអាហារសម្រាប់ភ្ញៀវទេសចរ។
 

លោក ឈួន ឆន អនុប្រធានការិយាល័យតំបន់រ៉ាមសារ បានប្រាប់សារព័ត៌មាន ThmeyThmey25 ថា ការប្រើប្រាស់ស្លឹកចេកមិនត្រឹមតែជួយថែរក្សាបរិស្ថានទេ ប៉ុន្តែក៏ជាការលើកកម្ពស់ការប្រើប្រាស់ធនធានដែលមានស្រាប់ ដែលអាចកាត់បន្ថយចំណាយរបស់សហគមន៍ដែរ។ ជាពិសេសគឺការបង្ហាញគំរូល្អមួយដល់ក្មេងៗជំនាន់ក្រោយ។ លោក ឈួន ឆន ពន្យល់បន្ថែម៖ «នៅទីនេះ រាល់ថ្ងៃយើងកំពុងអប់រំពួកគាត់ លើការវេចខ្ចប់។ យើងដាក់ស្លឹកចេក ដើម្បីកាត់បន្ថយថង់ប្លាស្ទិក ព្រោះតំបន់យើងជាតំបន់ទេសចរណ៍ ចឹងការប្រើប្រាស់ប្លាស្ទិកវាអត់ល្អ វាប៉ះពាល់ដល់ជីវចម្រុះក្នុងតំបន់ដីសើមយើង»។ 
 

បើតាមអនុប្រធានរូបនេះ បច្ចុប្បន្នប្រជាសហគមន៍ បានយល់ដឹងកាន់តែច្រើនពីផលប៉ះពាល់របស់ប្លាស្ទិកទៅបរិស្ថាន ក៏ដូចជាជីវចម្រុះក្នុងតំបន់ការពារ និងតំបន់អភិរក្សផ្សេងទៀត។ មិនតែប៉ុណ្ណោះ លោក ឆន ក៏អរគុណដល់ភ្ញៀវទេសចរផងដែរ ដែលតែងជួយផ្សព្វផ្សាយ ពីតំបន់ទេសចរណ៍នានាក្នុងស្រុក ពិសេសតំបន់រ៉ាមសារ ហើយក៏បានចូលរួមសំអាតបរិស្ថាន ក៏ដូចជាធនធានធម្មជាតិទៀតផង៕