«ខ្ញុំជួយលើកតម្កើង និងផ្សព្វផ្សាយវប្បធម៌ខ្មែរតាមរយៈការឆ្លាក់រូបប្រាសាទអង្គរវត្ត។ តែអង្គរវត្តក៏ជួយជីវភាពខ្ញុំវិញដែរ»។ នេះ គឺជាការលើកឡើងរបស់លោក អែម ជាងចម្លាក់រូបអង្គរវត្ត និងរូបបាយ័នអស់រយៈពេលជាច្រើនឆ្នាំមកហើយ។ 
 

ស្ថិតក្នុងវ័យជាង៣០ឆ្នាំប្លាយ លោក អែម បានដឹងយ៉ាងច្បាស់ថា ចាប់តាំងពីការរាតត្បាតនៃមេរោគកូវីដ១៩មក អង្គរវត្តមិនអាចរកប្រាក់ចំណូលបានច្រើនដូចមុនឡើយ ព្រោះ ចំនួនភ្ញៀវទៅទស្សនាអង្គរវត្តដោយផ្ទាល់ពិតជាមានការថយចុះ។ តែទោះជាយ៉ាងណា កិច្ចការប្រចាំថ្ងៃរបស់លោក អែម ដែលជាជាងឆ្លាក់រូបអង្គរវត្ត រូបសត្វដំរី ឬរូបប្រាសាទបាយ័ននៅតែដំណើរការតិចតួចគ្រាន់ចិញ្ចឹមជីវិតដដែល។ 
 

ក្នុងអំឡុងពេលកូវីដ-១៩នេះ លោក អែម ទទួលបានការបញ្ជាឲ្យឆ្លាក់រូបប្រាសាទអង្គរ បាយ័ន ឬរូបដំរី គ្រប់ខ្នាតបានមួយចំនួនដែរ។ ចេះចំណេះតពីជីតាដែលមានវ័យជិត៨០ឆ្នាំទៅហើយនោះ ជាងចម្លាក់ អែម បាននិយាយថា ខ្លួនគេមានទេព្យកោសល្យពិសេសចំពោះកិច្ចការចម្លាក់ឈើនេះ។ ក្រៅពីចម្លាក់រូបអង្គរវត្តលើឈើ ជាងគំនូររូបអង្គវត្ត ឬរូបប្រាសាទបាយ័នមួយចំនួនផ្សេងទៀត ក៏អាចនៅបន្តអាជីពបានខ្លះដែរនៅក្នុងបរិបទកូវីដនេះ។ 
 

រូបប្រាសាទអង្គរវត្តពិតនៅក្នុងខេត្តសៀមរាបបង្កើតចំណូលផ្ទាល់ជាច្រើនជូនជាតិ។ រីឯ រូបប្រាសាទអង្គរវត្ត ជារូបថត ជារូបគំនូរ ជាចម្លាក់លើក្រណាត់ លើឈើ លើថ្ម។ល។ បានចូលរួមបង្កើតចំណូលដោយប្រយោល និងបង្កើតការងារដោយប្រយោលបានច្រើនពាន់-ម៉ឺន កន្លែងផ្សេងទៀត។ អ្នកជំនាញខ្លះបាននិយាយថា ចំណូលពីឧទ្យានអង្គរ(ទេសចរណ៍វប្បធម៌) គឺជាចំណូលមិនចេះរីងស្ងួត ហើយវាមានរយៈពេលយូរជាងចំណួលប្រេងកាតទៅទៀត៕ លេខទំនាក់ទំនងលោក អែម៖ ០១៥ ២០៨ ៤៩១)៕