លោក រ័ត្ន ដាស៊ីណង់ អភិបាលស្រុកមង្គលបូរី បានបញ្ជាក់ថា កាលពីព្រឹកថ្ងៃទី១៧ ខែមីនានេះ សិស្សទាំង២០នាក់នោះបានដួលសន្លប់តៗគ្នា នៅពេលដែលកំពុងរៀននៅក្នុងថ្នាក់ ដោយសារចាញ់អាកាសធាតុក្តៅ។ 

 

«តាមខ្ញុំចុះទៅកន្លែងនោះផ្ទាល់ ហើយជួបគ្រូបង្រៀន និងនាយកអីហ្នឹង។ ប្រហែលម៉ោង៩ ដល់ម៉ោង១០ ព្រឹកអីហ្នឹង គឺវាហប់ខ្យល់ និងក្តៅខ្លាំង ហើយធ្វើឲ្យពួកគាត់ដួលសន្លប់តៗគ្នា»។ នេះជាការលើកឡើងរបស់លោក រ័ត្ន ដាស៊ីណង់ ដែលបញ្ជាក់ថា សិស្សទាំងនោះ រៀនថ្នាក់ទី១០ និងទី១១។

 

បើតាមលោកអភិបាលស្រុកមង្គលបូរី ក្រោយពីសិស្សដួលសន្លប់ភ្លាមៗនោះ គ្រូ និងអាណាព្យាបាលសិស្សបានបញ្ជូនពួកគេទៅព្យាបាលនៅមន្ទីរពេទ្យមិត្តភាពកម្ពុជា-ជប៉ុន ,មណ្ឌលសុខាភិបាលភ្នំតូច ,មណ្ឌលសុខភាពអូរប្រាសាទ និងតាមគ្លីនិកមួយចំនួនក្នុងស្រុកមង្គលបូរី ខេត្តបន្ទាយមានជ័យ។

 

ក្នុងចំណោមសិស្សទាំងនោះ គឺមានសិស្សចំនួន៥នាក់ដែលមានអាការធ្ងន់ធ្ងរ ក្រៅពីនោះគឺមានអាការតិចតួច។ នេះបើតាមការបញ្ជាក់ពីលោកអភិបាលស្រុកមង្គលបូរី ៕