COVID-19
ជាតិ
អភិបាលខេត្តកំពង់ចាម ចេញវិធានការផាកពិន័យអ្នកមិនពាក់ម៉ាស់ និងរក្សាគម្លាត 31, Mar 2021 , 9:59 pm
លោក អ៊ុន ចាន់ដា អភិបាលខេត្តកំពង់ចាម
× លោក អ៊ុន ចាន់ដា អភិបាលខេត្តកំពង់ចាម បានណែនាំទៅអាជ្ញាធរ ត្រូវសហការជាមួយក្រសួងសុខាភិបាល អនុវត្តការផាកពិន័យប្រាក់ ចំពោះបុគ្គលដែលមិនពាក់ម៉ាស និងមិនរក្សាគម្លាតសុវត្ថិភាព (១ម៉ែត្រកន្លះ) នៅតាមភូមិសាស្ត្រ ដែលក្រសួងសុខាភិបាល បានកំណត់។
បើតាមលិខិតរបស់រដ្ឋបាលខេត្តកំពង់ចាម នៅយប់ថ្ងៃទី ៣១ ខែមីនា អភិបាលខេត្តកំពង់ចាមបានបញ្ជាក់ដូច្នេះថា «គណៈបញ្ជាការឯកភាពរដ្ឋបាលក្រុង-ស្រុក ត្រូវរាយការណ៍ជាបន្ទាន់ ដើម្បីសុំយោបល់ និងការដឹកនាំពីថ្នាក់ដឹកនាំ ប្រសិនជួបការប្រឈមឬការលំបាក ណាមួយក្នុងការអនុវត្តន៍ជាក់ស្តែង»។
អភិបាលខេត្តកំពង់ចាម ក៏បានអំពាវនាវឱ្យពលរដ្ឋរស់នៅកំពង់ចាម ឬធ្វើដំណើរតាមផ្លូវសាធារណៈ ដែលមានមនុស្សជួបជុំ អ៊ូអរ ត្រូវអនុវត្តតាមវិធានការរបស់ក្រសួងសុខាភិបាល តាមរយៈការពាក់ម៉ាស និងរក្សាគម្លាតឱ្យបានត្រឹមត្រូវ។
ផ្អែកតាមអនុក្រឹត្យលេខ៣៧ អនក្រ.កប បុគ្គល មិនពាក់ម៉ាស់និងរក្សាគម្លាតសុវត្ថិភាព នៅក្នុងភូមិសាស្ត្រ ដែលក្រសួងសុខាភិបាលកំណត់ នឹងត្រូវព្រមាន ហើយក្រោយពីព្រមានរួច បើនៅតែមិនពាក់ម៉ាស់ ឬមិនរក្សាគម្លាតសុវត្ថិភាពទៀត នឹងត្រូវពិន័យប្រាក់ពី២សែនរៀលដល់១លានរៀល។ អនុក្រឹត្យលេខ៣៧ អនក្រ.កប កំណត់ថា អ្នកដែលមានសមត្ថកិច្ច ព្រមាននិងផាកពិន័យ គឺជាមន្ត្រីក្រសួងសុខាភិបាល៕
© រក្សាសិទ្ធិដោយ thmeythmey.com