ភូមិស្នោ ឃុំស្នោ ស្រុកព្រៃកប្បាស ខេត្តតាកែវ បានបិទទាំងស្រុងចាប់ពីម៉ោង ៧យប់ថ្ងៃទី១៤ ខែមេសា ។ ការសម្រេចបិទភូមិស្នោរបស់រដ្ឋបាលខេត្ត ក្នុងគោលបំណងធានាដល់ប្រសិទ្ធភាព នៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្រ្តខាងលើ មិនឱ្យឆ្លងរាលដាលទៅតំបន់ផ្សេងៗទៀត។ 
 

ក្នុងពេលនៃការអនុវត្តវិធានការនេះ អាជ្ញាធរហាមឃាត់ការធ្វើដំណើរ ចេញ ចូល លំនៅដ្ឋាន ឬទីសំណាក់បច្ចុប្បន្ន ព្រមទាំងហាមឃាត់ការជួបជុំ ឬការប្រមូលផ្តុំមនុស្ស ជាពិសេសរាល់សកម្មភាពការងារ មុខរបរ ឬអាជីកម្មដែលមិនមែនជាតម្រូវការចាំបាច់ប្រចាំថ្ងៃ ដោយលើកលែងក្នុងករណីចាំបាច់តែប៉ុណ្ណោះ។ 
 

រដ្ឋបាលខេត្តតាកែវបានបញ្ជាក់ « ដំណើរការនៃ បិទខ្ទប់នេះ នឹងអនុវត្តនរហូតដល់ មានការជូនដំណឹងសារជាថ្មីពី រដ្ឋបាលខេត្តតាកែវ »។  
 

មិនមែនតែនៅភូមិស្នោ នៅក្នុងខេត្តតាកែវទេ ដែលត្រូវបានអាជ្ញាធរបិទខ្ទប់នោះទេ។ ភូមិ ស្រុក និងខណ្ឌមួយចំនួនទៀត ដែលកំពុងប្រឈមនឹងការរីករាលដាលជំងឺកូវីដ-១៩ ក៏ត្រូវបិទជាបន្តបន្ទាប់ ដើម្បីអនុវត្តវិធានការការពារ និងទប់ស្កាត់ការឆ្លងដែរ។
 

ប្រមុខរដ្ឋាភិបាល បានចេញកាលពីថ្ងៃទី១៤ មេសា ឱ្យអាជ្ញាធរ ត្រួតពិនិត្យការធ្វើដំណើររបស់ប្រជាពលរដ្ឋ តាមវិធានការបិទខ្ទប់ (Lockdown) ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល ដើម្បីទប់ស្កាត់ការរីករាលជំងឺកាចសហាវមួយនេះ៕