ដោយនិស្សិត ចាន់ សុខម៉េង 

(បទ ក ខ ពាក្យ៨)

 

១. ក កូរ៉ូណាកំពុងវាយលុក ខ ខ្លាំងនាំទុក្ខដល់មនុស្សគ្រប់គ្នា

គ គ្មានប្រណីក្មេងចាស់ជរា ឃ ឃោរឃៅជាមេរោគកោងកាច។ 
 

២. ង ងាយចម្លងពីម្នាក់ទៅម្នាក់ ច ចងចំពាក់គួរឲ្យភ័យខ្លាច

ឆ ឆក់ជីវិតដូចព្រាយបិសាច ជ ជៀសរោគកាចយើងត្រូវខ្មីឃ្មាត។
 

៣. ឈ ឈប់ត្រាច់ចរបើពុំចាំបាច់ ញ ញាណជានិច្ចរក្សាគម្លាត

ដ ដឹងពាក់ម៉ាស់កុំបាច់ប្រាប់ទៀត ឋ ឋិតថេរឆ្លៀតលាងដៃកុំខាន។
 

៤. ឌ ឌុដាន់នាំឲ្យវិនាសខ្លួន ឍ ណ ណែនាំក្បួនការពារប្រាណ

ត តោះនាំគ្នាប្រតិបត្តិឲ្យបាន ថ ថែទាំប្រាណកុំឲ្យរោគឆ្លង។
 

៥. ទ ទាំងអស់គ្នាត្រូវតែសហការ ធ ធានាថាកូវីដឈប់ឆ្លង

ន នាទីនេះជាពេលចម្បង ប បើរំលងច្បាស់ជាអន្តរាយ។
 

៦. ផ ផ្តាំញាតិមិត្តសូមកុំអើពើ ព ពឹងជួយធ្វើតាមការផ្សព្វផ្សាយ

ភ ភារកិច្ចមនុស្សគ្រប់ៗកាយ ម មិនសប្បាយភ្លេចខ្លួនរោគកើន។
 

៧. យ យកកែងដៃខ្ទប់ក្អកកណ្តាស់ រ រត់រហ័សកន្លែងមនុស្សច្រើន

ល លាងផ្ទៃប៉ះញឹកទើបចម្រើន វ វត្ថុប៉ះច្រើនត្រូវសម្អាត។
 

៨. ស សំពះជួសការចាប់ដៃគ្នា ហ ហ៊ានគ្រប់គ្រាការធ្វើចត្តា-

ឡ ឡីស័កត្រឹមត្រូវតាមតម្រា អ អស់នេះណាកូវីដចេញឆ្ងាយ ។
 

*ឌុដាន់ ឬឌុកដាន់ (កិ) ដែលរឹងត្អឹង ស្តីថា ហាមប្រាមមិនស្តាប់។