ជាតិ
សង្គមជាតិ
ខេត្តសៀមរាបរកឃើញអ្នកវិជ្ជមានកូវីដ១៩ ១៥ករណីទៀត ជាករណីនាំចូលពីខេត្ត ព្រះសីហនុ ភ្នំពេញ... 29, Apr 2021 , 9:57 pm
លោក ក្រុស សារ៉ាត់ ប្រធានមន្ទីរសុខាភិបាលខត្តសៀមរាប រូបភាព៖ អ៉ីសា រ៉ហានី
× សៀមរាប៖ នាយប់ថ្ងៃទី២៩ ខែមេសានេះ អាជ្ញាធរខេត្តសៀមរាប បានរកឃើញករណីវិជ្ជមានកូវីដ១៩ ចំនួន១៥នាក់បន្ថែមទៀត ដែលជាករណីនាំចូលពីខេត្តព្រះសីហនុ រាជធានីភ្នំពេញ កំពង់ធំ និងខេត្តព្រៃវែង។ នេះជាការបញ្ជាក់របស់លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប។
ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ បន្ថែមថា ករណីនាំចូលនេះត្រូវអាជ្ញាធរប្រចាំការនៅទីតាំងត្រួតពិនិត្យសុខភាពព្រំប្រទល់ខេត្តសៀមរាប-កំពង់ធំ មានការសង្ស័យ និងបញ្ជូនពួកគេមកធ្វើតេស្ដនៅសាលាគុរុកោសល្យខេត្ត ក្រោយដឹងប្រវត្តិតំបន់ដែលប្រជាពលរដ្ឋទាំងនោះវិលត្រឡប់។ លោក ក្រុស សារ៉ាត់ ពន្យល់ថា អ្នកវិជ្ជមានកូវីដថ្មីនេះ ភាគច្រើនជាកម្មករសំណង់ ដែលវិលត្រឡប់ពីខេត្តព្រះសីហនុ ហើយឆ្លងជាលក្ខណៈគ្រួសារ ក្នុងនោះមានទារកអាយុ១១ខែ និងកុមារ៥ឆ្នាំ ផងដែរ។
ក្នុងចំណោម១៥ករណីនេះ មាន២ករណីជាអ្នកមកពីរាជធានីភ្នំពេញ ដែលតេស្ដលើកទី១ អវិជ្ជមាន ហើយលើកទី២ ទើបចេញវិជ្ជមាន។ លោកក្រុស សារ៉ាត់ បញ្ជាក់ថា ករណីនាំចូលនេះអាជ្ញាធរអាចគ្រប់គ្រងស្ថានការណ៍បាន និងមិនមានការចម្លងទៅអ្នកដទៃទៀតឡើយ។
សូមបញ្ជាក់ថា មានប្រជាពលរដ្ឋជាច្រើន បានសម្រុកវិលមកស្រុកកំណើតវិញ ក្រោយរាជរដ្ឋាភិបាលសម្រេចឱ្យមានការចរាចរណ៍ឆ្លងពីខេត្តមួយទៅខេត្តមួយវិញធម្មតា កាលពីថ្ងៃទី២៥ ខែមេសា។ ក្នុងនោះខេត្តសៀមរាប ក៏មានប្រជាពលរដ្ឋសម្រុកមកច្រើនដែរ ហើយករណីខាងលើ អាជ្ញាធរអះអាងថា សំណាកជាច្រើនទៀតកំពុងធ្វើតេស្ដ ដែលអាចចេញលទ្ធផលជាបន្តបន្ទាប់នៅយប់នេះ។ គិតត្រឹមថ្ងៃទី២៩ ខែមេសា ក្នុងព្រឹត្តិការណ៍សហគមន៍២០ កុម្ភៈ ខេត្តសៀមរាបមានអ្នកវិជ្ជមានកូវីដ១៩ សរុប ៣៦នាក់ ក្នុងនោះបានជាសះស្បើយ ១២នាក់៕
© រក្សាសិទ្ធិដោយ thmeythmey.com