ក្រសួងសុខាភិបាលបានបញ្ជាក់នៅក្នុងសេចក្តីជូនដំណឹងថា វិធានការពាក់ម៉ាស់ និងរក្សាគម្លាតនឹងត្រូវអនុវត្តឡើង រហូតដល់ថ្ងៃជូនដំណឹងសាជាថ្មី។ 

 

ក្រសួងសុខាភិបាល បានចេញសេចក្តីជូនដំណឹង ដូច្នេះថា៖«ចំពោះបុគ្គលដែលមានកាតព្វកិច្ចពាក់ម៉ាស និងរក្សាគម្លាតសុវត្ថិភាពបុគ្គល ត្រូវបានកំណត់ក្នុងប្រការ៣ និងប្រការ៤ នៃប្រកាសលេខ០៨១ ស.នក.ប្រក ចុះថ្ងៃទី២២ មីនា ឆ្នាំ២០២១ ស្តីពីកាតព្វកិច្ចពាក់ម៉ាស និងរក្សាគម្លាតសុវត្ថិភាព ក្នុងអំឡុងពេលនៃការឆ្លងរាលដាលនៃជំងឺកូវីដ-១៩ ក្នុងសហគមន៍»។

 

បើតាមអនុក្រឹត្យលេខ៣៧ អនក្រ.កប បុគ្គល មិនពាក់ម៉ាស់ នៅទីកន្លែង ដែលមានមនុស្សចាប់ពី២នាក់ឡើងទៅ ដូចការកំណត់របស់ក្រសួងសុខាភិបាល នឹងត្រូវទទួលការព្រមានសិន សម្រាប់កំហុសលើកទី១ ហើយបើនៅតែបំពានលើកទី២ នឹងប្រឈមការពិន័យប្រាក់ពី២សែនរៀល ទៅ១លានរៀល។ ចំណែកបុគ្គលដែលមិនរក្សាគម្លាតសុវត្ថិភាព ក៏រងការពិន័យដូចគ្នាដែរ។

 

សូមជម្រាបថា គិតមកទល់ពេលនេះ មានខេត្តចំនួន៩ហើយ ដែលត្រូវអនុវត្តកាតព្វកិច្ចពាក់ម៉ាស់ និងរក្សាគម្លាតសុវត្ថិភាពផងដែរ។ ខេត្តទាំងនោះមានដូចជា រាជធានីភ្នំពេញ ព្រៃវែង កណ្តាល ព្រះសីហនុ សៀមរាប និងបន្ទាយមានជ័យ។ 

 

គិតមកដល់ពេលនេះ កម្ពុជាមានអ្នកជំងឺកូវីដ-១៩ ចំនួន ១៦៩៧១ករណី ក្នុងនោះ អ្នកជាសះស្បើយ  ៦០១៩នាក់ ខណៈអ្នកស្លាប់ដោយសារជំងឺនេះ កើនដល់ ១១០នាក់៕