COVID-19
អន្តរជាតិ
អង្គការសុខភាពពិភពលោកទទួលស្គាល់ប្រសិទ្ធភាពវ៉ាក់សាំង Sinopharm Beijing ផ្លូវការហើយ 07, May 2021 , 10:51 pm
× ទីបំផុតទៅអង្គការសុខភាពពិភពលោក (WHO) បានសម្រេចដាក់វ៉ាក់សាំងចិន Sinopharm Beijing (BBIBP) ក្នុងបញ្ជីប្រើប្រាស់បន្ទាន់លើការបង្ការជំងឺកូវីដ-១៩។ យោងតាម Twitter របស់ WHO វ៉ាក់សាំងចិននេះ ក្លាយជាវ៉ាក់សាំងទី៦ ដែល WHO ទទួលស្គាល់នូវសុវត្ថិភាព ប្រសិទ្ធភាព និងគុណភាព។
ក្លាយជាវ៉ាក់សាំងដំបូងគេរបស់ចិនដែលបានការទទួលស្គាល់ពី WHO វ៉ាក់សាំង Sinopharm របស់វិទ្យាស្ថានប៉េកាំង នឹងស្ថិតក្នុងចំណោមវ៉ាក់សាំងដទៃទៀតដែលគេអាចបញ្ជាទិញបានតាមរយៈយន្តការ COVAX។ នេះបើតាមការលើកឡើងរបស់អគ្គនាយក WHO លោក Tedros Adhanom Ghebreyesus។
«ការអនុញ្ញាតនេះពង្រីកបញ្ជីនៃចំនួនវ៉ាក់សាំងកូវីដ-១៩ ដែលយន្តការ COVAX អាចទិញនិងផ្តល់ទំនុកចិត្តដល់ប្រទេសនានាក្នុងការពន្លឿនការអនុញ្ញាតឲ្យប្រើប្រាស់ ការនាំចូល និងគ្រប់គ្រងវ៉ាក់សាំងនេះផង»។លោកបានថ្លែងដូច្នេះ។
ទោះជាទើបបានការទទួលស្គាល់ប្រសិទ្ធភាព និងសុវត្ថិភាពជាផ្លូវការពី WHO ក្តី វ៉ាក់សាំងរបស់ចិនខាងលើនេះត្រូវបានប្រើប្រាស់រួចទៅហើយនៅប្រទេសជាង ៤០ លើពិភពលោក ក្នុងចំណោមនេះមានកម្ពុជាផងដែរ។ កម្ពុជាទទួលបានជំនួយវ៉ាក់សាំង Sinopharm ពីរដ្ឋាភិបាលចិនក្នុងទំហំ ១,៧ លានដូសរួចទៅហើយរាប់ចាប់ពីខែកុម្ភៈមក។
សូមបញ្ជាក់ថា បន្ថែមពីលើវ៉ាក់សាំង Sinopharm វ៉ាក់សាំងចំនួនប្រាំដែល WHO បានសម្រេចអនុញ្ញាតប្រើប្រាស់បន្ទាន់នោះមានដូចជា វ៉ាក់សាំងរបស់ក្រុមហ៊ុន Moderna, វ៉ាក់សាំងក្រុមហ៊ុន Pfizer, វ៉ាក់សាំង AstraZeneca ផលិតនៅកូរ៉េខាងត្បូង និងផលិតដោយវិទ្យាស្ថានSerum របស់ឥណ្ឌា និង និងវ៉ាក់សាំងក្រុមហ៊ុន Janssen៕
"This afternoon, WHO gave Emergency Use Listing to Sinopharm Beijing’s
#COVID19 vaccine, making it the sixth vaccine to receive WHO validation for safety, efficacy and quality."-
@DrTedros © រក្សាសិទ្ធិដោយ thmeythmey.com