COVID-19
ជាតិ
ខេត្តកំពង់ស្ពឺ កំពង់ឆ្នាំង ស្វាយរៀង បន្តរកឃើញអ្នកឆ្លងកូវីដ-១៩ សរុប៣៣នាក់ទៀត
13, May 2021 , 8:39 pm
ូបតំណាង៖ គ្រូពេទ្យជំនាញរបស់ក្រសួងសុខាភិបាល កំពុងយកសំណាកលើស្រ្តីម្នាក់ នៅក្នុងកំពង់ឆ្នាំង។ រូបពី រដ្ឋបាលខេត្តកំពង់ឆ្នាំង
×![]()
រដ្ឋបាលខេត្តកំពង់ស្ពឺ កំពង់ឆ្នាំង និងស្វាយរៀង បន្តរកឃើញអ្នកឆ្លងកូវីដ-១៩(COVID-19) ប្រចាំថ្ងៃទី១៣ឧសភា ចំនួន៣៣នាក់បន្ថែមទៀត។ ក្នុងនោះខេត្តកំពង់ស្ពឺ មានឆ្លងជំងឺនេះ២៣នាក់ ស្វាយរៀង ៩នាក់ និងកំពង់ឆ្នាំង មានម្នាក់។ អ្នកជំងឺកូវីដ-១៩នៅក្នុងខេត្តទាំងនេះ មានវ័យពី៦ឆ្នាំ ដល់ ៦៤ឆ្នាំ។ 
បើតាមរដ្ឋបាលខេត្តកំពង់ស្ពឺ ក្នុងចំណោមអ្នកជំងឺកូវីដ-១៩ ទាំង២៣នាក់ នោះ មាន ២១នាក់ ជាកម្មការិនីរោងចក្រ វ៉ាសាន់ ស្ថិតនៅភូមិពង្រ ឃុំតាំងស្យា ស្រុកភ្នំស្រួច ខណៈអ្នកជំងឺកូវីដ-១៩ ២នាក់ទៀត ពលរដ្ឋ រស់នៅក្នុងស្រុកសំរោងទង។ ទន្ទឹមនឹង ការរកឃើញករណីថ្មីនៃវិជ្ជមានកូវីដ-១៩នេះ ខេត្តកំពង់ស្ពឺ ក៏មានមនុស្ស៩នាក់ទៀតបានជាសះស្បើយពីជំងឺនេះ ផងដែរ។
ចំពោះអ្នកជំងឺកូវីដ-១៩ ចំនួន៩នាក់ របស់ខេត្តកំពង់ឆ្នាំងវិញ គឺមានម្នាក់ជាអ្នកសារព័ត៌មាន និង៦នាក់ទៀត ជាអ្នករស់នៅក្នុងសង្កាត់ផ្សារឆ្នាំង។
ដោយឡែក អ្នកជំងឺកូវីដ-១៩ ចំនួន៣នាក់ទៀត ជាអ្នករស់នៅក្នុងឃុំឈានឡើង ស្រុកសាមគ្គីមានជ័យ។ បើតាមរដ្ឋបាលខេត្តកំពង់ឆ្នាំងជំងឺកូវីដ-១៩ទាំង៣នាក់ ជាកម្មកររោងកចក្រ ប៊ុកឃ័រ បែកចាន ស្រុកអង្គស្នួល ខេត្តកណ្តាល ដែលបានធ្វើដំណើរមកដល់ស្រុកកំណើត កាលពីថ្ងៃទី២៦មេសា ឆ្នាំ២០២១។ រដ្ឋបាលខេត្តនេះ បានបញ្ជាក់ថា ការរកឃើញវិជ្ជមានកូវីដ-១៩ លើកម្មកររោងចក្រទាំង៣នាក់នោះ ក្នុងអំឡុងធ្វើចត្តាឡីស័ក។
ក្រៅពីខេត្តទាំងពីរខាងលើដែលបានប្រកាសរកឃើញជំងឺកូវីដ-១៩ប្រចាំថ្ងៃរៀងៗខ្លួននោះ រដ្ឋបាលខេត្តស្វាយរៀង ក៏បានប្រកាសរកឃើញវិជ្ជមានកូវីដ-១៩ មួយករណីលើបុរសវ័យ៤០ឆ្នាំម្នាក់ នាល្ងាចថ្ងៃទី១៣ឧសភា ឆ្នាំ២០២១ ផងដែរ។ បុរសដែលឆ្លងកូវីដ-១៩នេះ មានអាសយដ្ឋាននៅភូមិស្រម៉ ឃុំបុសមន ស្រុករំដួល។
បច្ចុប្បន្នអ្នកជំងឺកូវីដ-១៩ ទាំង៣៣នាក់នោះ កំពុងសម្រាក ព្យាបាលជំងឺនៅតាមមន្ទីរបង្អែក ក្នុងខេត្តរៀងៗខ្លួន៕
Tag:
COVID-19
© រក្សាសិទ្ធិដោយ thmeythmey.com
