កូនសត្វផ្សោតទី៤ នៅក្នុងទន្លេមេគង្គ ត្រូវបានប្រទះឃើញហែលជាមួយហ្វូងផ្សោតពេញវ័យចំនួន ១០ក្បាលទៀត នៅក្នុងតំបន់អន្លង់សត្វផ្សោតកាំពី នៃខេត្តក្រចេះ នៅថ្ងៃទី ២១ ខែឧសភា។ បើតាមអង្គការWWF កូនសត្វផ្សោតទន្លេមេគង្គទើបនឹងកើតថ្មីមួយក្បាលនេះ ត្រូវបានអ្នកវិទ្យាសាស្ត្រ អបអរសាទរ និងកត់ត្រាទុក បន្ទាប់ពីវត្តមានកូនផ្សោតទី៣ ដែលត្រូវបានប្រទះឃើញនៅថ្ងៃទី១៦ ឧសភា ។
 

ទន្ទឹមនឹងការសាទរចំពោះវត្តមានថ្មីក្នុងឆ្នាំ២០២១ របស់កូនផ្សោតចំនួន៤ក្បាល ដែលបានរកឃើញនោះ ក៏មានការសោកស្តាយចំពោះការបាត់ជីវិតរបស់ផ្សោតចំនួន៤ក្បាលផងដែរ ដោយសារតែមានវ័យចាស់ និង ជាប់នឹងមងនេសាទ។ នេះបើយោងតាមរបាយការណ៍របស់អង្គការWWF។


រូបភាពផ្ដល់ដោយ WWF-Cambodia

ផ្អែកលើអត្រានៃការស្លាប់ក្នុងចំនួនដូចគ្នា ដែលបានកត់ត្រាទុកនៅចន្លោះខែមករា និងឧសភាឆ្នាំ ២០២០ អ្នកវិទ្យាសាស្ត្ររបស់អង្គការ WWF ថា អត្រាស្លាប់នេះ ជានិន្នាការមួយដ៏គួរឱ្យបារម្ភ យ៉ាងខ្លាំងបំផុត។ WWF អំពាវនាវយ៉ាងទទូចអំពីភាពចាំបាច់ក្នុងការរួមសហការគ្នាឱ្យកាន់តែខ្លាំងឡើង ដើម្បីរៀបចំវិធានការអភិរក្សឲ្យកាន់តែមានប្រសិទ្ធភាពថែមទៀត។

សត្វផ្សោតទន្លេមេគង្គ ត្រូវបានចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះថ្នាក់ ជិតផុតពូជបំផុត។ លទ្ធផលនៃជំរឿនសត្វផ្សោតទន្លេមេគង្គក្នុងឆ្នាំ២០២០ ដោយរដ្ឋបាលជលផល និង អង្គការ WWF បានបង្ហាញថា មានសត្វផ្សោតចំនួនត្រឹមតែ៨៩ក្បាលប៉ុណ្ណោះ ដែលកំពុងរស់នៅក្នុង ទន្លេមេគង្គកម្ពុជា៕