១. អតុល្យភាពនៃអ័រម៉ូន

 

អ័រម៉ូន Estrogen និង អ័រម៉ូន progesterone គឺចាំបាច់ណាស់សម្រាប់ការមានផ្ទៃពោះដោយវាអាចមានឥទ្ធិពលលើពងអូវុលនិងភាពកូនបានរបស់ស្ត្រី។ អ័រម៉ូនទាំងពីរនេះផ្លាស់ប្ដូរវដ្ដនៃការបញ្ចេញពងអូវុលរបស់ស្ត្រី ដូច្នេះអតុល្យភាពនៃអ័រម៉ូនអាចជាកត្តាហានិភ័យចម្បងមួយសម្រាប់ភាពមានកូនបាន។ ចំពោះបុរសវិញអ័រម៉ូនដូចជា prolactin និង estrogen មានឥទ្ធិពលលើការផលិតអ័រម៉ូនមួយប្រភេទទៀតហៅថា testosterone ខណៈដែលវាក៏ជះឥទ្ធិពលដល់ការផលិតមេជីវិតឈ្មោលផងដែរ។

 

២. ការជក់បារី

 

ភាគច្រើននៃពួកយើងសុទ្ធតែដឹងហើយថា ការជក់បារីអាចបង្កគ្រោះថ្នាក់ចំពោះសុខភាព។ ទោះជាយ៉ាងណាតើអ្នកធ្លាប់ដឹងទេថាទម្លាប់នេះក៏អាចជះផលប៉ះពាល់ខ្លាំងដល់ឱកាសនៃការមានផ្ទៃពោះរបស់អ្នកដែរ? នេះក៏ព្រោះតែការជក់បារីអាចបង្កការខូចខាតដល់សុខភាពប្រព័ន្ធបន្តពូជក្នុងរបៀបជាច្រើនរាប់ចាប់ពីការបំផ្លាញស៊ុតដែលកកើតក្នុងអូវែដល់ហានិភ័យនៃបញ្ហារលូតកូន។ ប្រសិនបើអ្នកចង់មានផ្ទៃពោះ និងអាចរក្សាបាននូវសុខភាពល្អកំឡុងពេលពពោះ ចូរបញ្ឈប់ការជក់បារីឱ្យបានឆាប់បំផុត។

 

៣. ការទទួលទានគ្រឿងស្រវឹងច្រើនលើសកម្រិត

 

ការសិក្សាស្រាវជ្រាវជាច្រើនបានបង្ហាញថា ស្ត្រីដែលទទួលទានគ្រឿងស្រវឹង ៣ដង ឬច្រើនជាងនេះក្នុងមួយសប្តាហ៍ គឺពិបាកនឹងមានផ្ទៃពោះជាងស្ត្រីដែលទទួលទានភេសជ្ជៈនេះក្នុងកម្រិតមធ្យម។

 

៤. គេងមិនបានគ្រប់គ្រាន់

 

ការគេងមិនបានស្កប់និងគ្រប់គ្រាន់ក៏ជះឥទ្ធិពលលើភាពមានកូនបានផងដែរ។ មានមូលហេតុច្រើនណាស់ដែលធ្វើឱ្យអ្នកពិបាកមានផ្ទៃពោះដោយសារការគេងមិនបានគ្រប់គ្រាន់។ មូលហេតុទី១នោះ គឺការគេងមិនគ្រប់អាចបង្កឱ្យរដូវមកមិនទៀងដែលជារោគសញ្ញាមួយជំងឺពិបាកមានកូន។ មូលហេតុទី២ គឺការគេងមិនគ្រប់អាចបង្កបញ្ហាអតុល្យភាពនៃអ័រម៉ូន។ ហើយមូលហេតុទី៣នោះ គឺការគេងមិនគ្រប់អាចនាំឱ្យធាត់ជ្រុលដែលជាបញ្ហាមួយជះផលប៉ះពាល់ដល់លទ្ធភាពនៃការមានកូនបានរបស់ស្ត្រី។

 

៥. ការធ្វើលំហាត់ប្រាណច្រើនពេក

 

ការធ្វើលំហាត់ប្រាណ គឺចាំបាច់ណាស់សម្រាប់ពង្រឹងនិងរក្សាសុខភាពរាងកាយ។ ប៉ុន្តែការធ្វើលំហាត់ប្រាណច្រើនពេកអាចជះផលប៉ះពាល់គួរឱ្យបារម្ភចំពោះឱកាសនៃការមានផ្ទៃពោះរបស់អ្នក។ ដូច្នេះប្រសិនបើអ្នកចង់ឆាប់មានផ្ទៃពោះ ចូរកុំដាក់សម្ពាធខ្លាំងពេកចំពោះរាងកាយ។

 

៦. របបអាហារគ្មានសុខភាពល្អ

 

គួបផ្សំនឹងការធ្វើលំហាត់ប្រាណទៀងទាត់ ការជ្រើសរើសអាហារឱ្យបានត្រឹមត្រូវដើម្បីទទួលទាន គឺចាំបាច់ណាស់សម្រាប់សុខភាពនិងសម្រស់របស់អ្នក។ ហើយរបបអាហាររឹតតែសំខាន់ថែមទៀតនៅពេលអ្នកព្យាយាមមានផ្ទៃពោះ។ អ្នកជំនាញជាច្រើនបានឱ្យដឹងថា ទម្លាប់នៃការទទួលទានអាហារមិនល្អអាចនាំឱ្យធាត់ជ្រុល និងពេលខ្លះអាចមានទម្ងន់មិនគ្រប់ដែលកត្តាទាំងពីរនេះអាចបង្កគ្រោះថ្នាក់ដល់ឱកាសនៃការមានកូនបានរបស់ស្ត្រី។

 

៧. ទទួលទានភេសជ្ជៈមានផ្ទុកជាតិកាហ្វេអ៊ីនច្រើនពេក

 

ខណៈដែលកាហ្វេ ឬតែមួយពែង គឺប្រហែលជាមិនបង្កគ្រោះថ្នាក់អ្វីដល់ភាពមានកូនបានរបស់អ្នក ប៉ុន្តែច្រើនពែងក្នុងមួយថ្ងៃពិតជាអាច។ ដូច្នេះដើម្បីជាការប្រសើរអ្នកមិនគួរទទួលទានកាហ្វេអ៊ីនលើសពី ៣០០មីលីក្រាមក្នុងមួយថ្ងៃឡើយ៕

 

ត្រួតពិនិត្យ​ដោយ www.health.com.kh