«តំណក់ និងដំណក់»មានថ្នាក់ពាក្យជា នាមសព្ទដូចគ្នា។  «តំណក់»មានន័យថា សភាវៈរាវដែលមានចំនួនតិចល្មមតែស្រក់ចុះតក់ៗ។ ឧទាហរណ៍៖ ទឹកមួយតំណក់, តំណក់ភ្លៀង។ ចំពោះពាក្យ«ដំណក់»មានន័យថា ការដក់, ដំណើរដែលដក់នៅ។ ឧទាហរណ៍៖ ដំណក់ទឹក។ 

 

«តក់ និងបន្តក់»មានថ្នាក់ពាក្យខុសគ្នា។ «តក់»មានថ្នាក់ពាក្យជាគុណសព្ទ, នាមសព្ទ, ពាក្យទំនឹមបុរាណ និងឧទានសព្ទ។ 

 

«តក់»ជាគុណសព្ទ មានន័យថា ដែលមិនសូវរាបសា, ខ្ចក, ខ្ចោះ, ទាស់, ឆ្គង; ច្រើនភ្លាត់, ច្រើនខុស។ ពាក្យតក់, អក្សរតក់, សាស្ត្រាតក់ ។ ក្ដៀប : ដូងតក់។ ជានាមសព្ទ

រលាដូងតក់ គឺរលាដូងក្ដៀបដែលគេយកមកប្រើធ្វើជានាឡិតូចសម្រាប់វាល់អង្ករជាដើម បន្ថែមលើនាឡិធំឲ្យមានកំណត់ : អង្ករ ២ នាឡិ ១ តក់។ ជាពាក្យទំនឹមបុរាណ មានន័យថា រកស៊ីតក់ៗទៅ, ឬថា តក់ៗពេញបំពង់។ ជាឧទានសព្ទ មានន័យថា សូរឮដោយតំណក់ទឹកស្រក់។

 

ដោយឡែកពាក្យ«បន្តក់»មានថ្នាក់ពាក្យជាកិរិយាសព្ទ មានន័យថា សម្រក់ឲ្យធ្លាក់ចុះ១តំណក់ម្ដង។ ឧទាហរណ៍៖ បន្តក់ថ្នាំទឹក។ ផ្លោងឲ្យធ្លាក់ត្រង់, ឲ្យធ្លាក់ចំ។ ឧទាហរណ៍៖ បន្តក់ឲ្យចំ៕