COVID-19
ជាតិ
របាយការណ៍ប្រចាំថ្ងៃ៖ កំពង់ស្ពឺ បន្ទាយមានជ័យ និងកំពង់ចាម មានច្រើនករណី
28, May 2021 , 5:30 pm
×![]()
ដោយ: ខន ចំប៉ា & អ៊ូ សុខមាន (OU Sokmean)
បណ្តាខេត្តជាង ១០ បានចេញផ្សាយករណីវិជ្ជមានកូវីដ-១៩ ប្រចាំថ្ងៃទី២៧ ខែឧសភា។ ក្នុងចំណោមនោះ មានខេត្តកំពង់ស្ពឺ មាន៦៤ករណីឆ្លងថ្មី ដែលជាចំនួនច្រើនជាងគេ។ បណ្តាខេត្តផ្សេងទៀត ក៏មានអ្នកឆ្លងច្រើនដែរ មានខេត្តកំពង់ឆ្នាំង បន្ទាយមានជ័យ កំពង់ធំ ព្រៃវែង និងបាត់ដំបងជាដើម។ ភាគច្រើននៃឆ្លងថ្មី គឺជាកម្មកររោងចក្រ។ ពលរដ្ឋខ្មែរ ដែលទើបត្រឡប់ពីប្រទេសថៃ ហើយមានវិជ្ជមានកូវីដ-១៩ ក៏ត្រូវបានរកឃើញជាបន្តបន្ទាប់ដែរ។
បន្ទាយមានជ័យ៖ ឆ្លងថ្មី៣៦ករណី និងជាសះស្បើយពីកូវីដ-១៩ មាន៨១ករណី
រដ្ឋបាលខេត្តបន្ទាយមានជ័យ បានរកឃើញវិជ្ជមានកូវីដ-១៩ លើមនុស្ស៣៦នាក់ទៀត នាថ្ងៃទី២៧ឧសភា ក្នុងនោះ៨នាក់នាំចូលពីប្រទេសថៃ។ ក្នុងចំណោមវិជ្ជមានកូវីដ-១៩ទាំង៣៦នាក់នេះ គឺមាន២៨នាក់ ជាបុគ្គលិកសហគ្រាស Golden Planet, ជាអាជីវករ, សិស្ស និងស្ត្រីមេផ្ទះ ដែលមានអាសយដ្ឋានរស់នៅក្រុងប៉ោយប៉ែត។ ដោយឡែកអ្នកជំងឺកូវីដ-១៩ ឯទៀតគឺសុទ្ធសឹងជាពលករត្រលប់មកពីប្រទេសថៃ ដោយមាន២នាក់នៅស្រុកថ្មពួក, ២នាក់នៅស្រុកភ្នំស្រុក, ២នាក់នៅស្រុកអូរជ្រៅ, ម្នាក់នៅស្រុកព្រះនេត្រព្រះ និងម្នាក់ទៀតនៅស្រុកស្វាយចេក។ នៅថ្ងៃទី២៧ឧសភាដដែលនេះ ក្រៅ រដ្ឋបាលខេត្តបន្ទាយមានជ័យ ក៏បញ្ជាក់ថាមានមនុស្ស៨១នាក់ទៀត បានជាសះស្បើយពីជំងឺកូវីដ-១៩នេះដែរ។
កំពង់ចាម៖ ឆ្លងថ្មី២៣នាក់ ដែលសុទ្ធសឹងជាអ្នកប៉ះពាល់ជាមួយកម្មការិនីរោងចក្រមានវិជ្ជមានកូវីដ-១៩
មនុស្សចំនួន២៣នាក់ទៀត ដែលរដ្ឋបាលខេត្តកំពង់ចាម រកឃើញមានវិជ្ជមានកូវីដ-១៩នៅថ្ងៃទី២៧ឧសភានោះ គឺមានវ័យពី២ឆ្នាំទៅ៧៤ឆ្នាំ។ ក្នុងចំណោមអ្នកឆ្លងថ្មីទាំង២៣នាក់នេះ មាននៅស្រុកជើងព្រៃ១១នាក់, ស្រុកបាធាយ៧នាក់, ស្រុកព្រៃឈរ៣នាក់, ស្រុកចំការលើមា្នក់ និងម្នាក់ទៀតមានអាសយដ្ឋាននៅក្រុងកំពង់ចាម។ ក្នុងថ្ងៃជាមួយគ្នានេះ ខេត្តកំពង់ចាម ក៏មានមនុស្ស៨នាក់ទៀត បានជាសះស្បើយពីកូវីដ-១៩ ផងដែរ។ ចំនួននេះបានធ្វើឱ្យខេត្តកំពង់ចាម មានអ្នកជាសះស្បើយពីកូវីដ-១៩ សរុប ១៥៩នាក់ ខណៈ៦១៦នាក់ទៀត កំពុងសម្រាកព្យាបាលជំងឺនៅមន្ទីរពេទ្យខេត្ត។
រតនគិរី៖ ១ករណី ជាអ្នកដំណើរពីភ្នំពេញ
ករណីវិជ្ជមាន១នាក់ ដែលត្រូវបានរកឃើញនៅខេត្តរតនគិរី គឺជាបុរសវ័យ ១៩ឆ្នាំ ដែលជាអ្នកដំណើរពីរាជធានីភ្នំពេញ។ តាមរដ្ឋបាលខេត្តរតនគិរី បុរសរូបនេះ គឺជាកម្មករសំណង់ ដែលធ្លាប់ធ្វើការងារនៅម្តុំផ្សារដើមថ្កូវ និងមានទីលំនៅស្រុករលាប្អៀរ ខេត្តកំពង់ឆ្នាំង។បច្ចុប្បន្នខេត្តរតនគិរី មានករណីវិជ្ជមានកូវីដ-១៩ សរុប ១០នាក់ហើយ បន្ទាប់ពីបានប្រកាសរកឃើញករណីឆ្លងដំបូងបង្អស់ចំនួន ២ករណី កាលពីថ្ងៃទី១០ ឧសភាកន្លងទៅ។ រតនគិរី ជាខេត្តចុងក្រោយគេនៅកម្ពុជា ដែលបានប្រកាសរកឃើញករណីវិជ្ជមានកូវីដ-១៩ ចាប់តាំងពីជំងឺរាតត្បាតសកលនេះ មានវត្តមាននៅកម្ពុជា តាំងពីដើមឆ្នាំ២០២០មក។
កំពង់ស្ពឺ៖ មានអ្នកឆ្លងថ្មី៦៤នាក់ ដោយភាគច្រើនជាអ្នកស្រុកសំរោងទង
រដ្ឋបាលខេត្តកំពង់ស្ពឺ បន្តរកឃើញមនុស្ស៦៤នាក់ទៀត ឆ្លងកូវីដ-១៩ ដោយអ្នកជំងឺទាំងនោះ មានវ័យពី១៩ឆ្នាំដល់៨៣ឆ្នាំ។ ក្នុងចំណោមករណីឆ្លងថ្មីនៃជំងឺកូវីដ-១៩ នៅខេត្តកំពង់ស្ពឺប្រចាំថ្ងៃទី២៧ឧសភា មាននៅស្រុកសំរោងទងរហូតដល់៣៨នាក់, ស្រុកឧដុង្គ៨នាក់, ស្រុកភ្នំស្រួច មាន៦នាក់, ក្រុងច្បារមន មាន៥នាក់ ស្រុកថ្ពងមាន៣នាក់, ស្រុកគងពិសី មាន២នាក់ ខណៈអ្នកជំងឺកូវីដ-១៩ ចំនួន២នាក់ទៀត ជាអ្នកអង្គស្នួល ខេត្តកណ្តាល។ ក្នុងថ្ងៃជាមួយគ្នានេះ រដ្ឋបាលខេត្តកំពង់ស្ពឺ ក៏ប្រកាសនូវដំណឹងល្អដែលមានមនុស្ស២៣នាក់ទៀត បានជាសះស្បើយពីជំងឺកូវីដ-១៩ ផងដែរ។ ចំនួននេះ បានធ្វើឱ្យខេត្តកំពង់ស្ពឺ មានអ្នកជាសះស្បើយពីជំងឺកូវីដ-១៩ សរុប១៧៦នាក់។ គិតត្រឹមថ្ងទី២៧ឧសភា ខេត្តកំពង់ស្ពឺ មានអ្នកជំងឺកូវីដ-១៩ សរុប ៦០០នាក់។ ក្នុងនោះមាន១៧៦នាក់ បានជាសះស្បើយពីជំងឺនេះ និង៤០៧នាក់ទៀត កំពុងសម្រាកព្យាបាល ខណៈមាន១១នាក់ បានស្លាប់ដោយសារជំងឺកូវីដ-១៩។ ដោយឡែក អ្នកជំងឺកូវីដ-១៩ ចំនួន៧នាក់ទៀត បានផ្ទេរពីមន្ទីរខេត្តកំពង់ស្ពឺ មករាជធានីភ្នំពេញ។
កំពង់ឆ្នាំង៖ មានករណីឆ្លងថ្មី ១៩នាក់ ដោយភាគច្រើនជាកម្មកររោងចក្រ
មនុស្សចំនួន១៩នាក់ទៀត ដែលរដ្ឋបាលខេត្តកំពង់ឆ្នាំង រកឃើញវិជ្ជមានកូវីដ-១៩ ប្រចាំថ្ងៃទី២៧ឧសភានោះ គឺមាន១០នាក់ជាកម្មកររោងចក្រដែលមានអាសយដ្ឋាននៅស្រុកកំពង់ត្រឡាច ស្រុកសាមគ្គីមានជ័យ និងស្រុកទឹកផុស។ ដោយឡែក អ្នកជំងឺកូវីដ-១៩ចំនួន៨នាក់ គឺជាសិស្ស និងអ្នកផលិតផល នៅក្នុងស្រុករលាប្អៀរ ខណៈអ្នកជំងឺកូវីដ-១៩ម្នាក់ មានអាសយដ្ឋាននៅក្រុងកំពង់ឆ្នាំង។ ខេត្តកំពង់ឆ្នាំង មកទល់ពេលនេះ មានអ្នកជំងឺកូវីដ-១៩សរុប២១៦នាក់ ដោយក្នុងនោះមាន៣២នាក់បានជាសះស្បើយ, ស្លាប់៣នាក់ និងមាន១៨១នាក់ទៀត កំពុងសម្រាកព្យាបាលជំងឺ។
កំពង់ធំ៖ ឆ្លងថ្មីមាន១៧ករណី ដោយភាគច្រើនជាអ្នកស្រុកតាំងគោក
រដ្ឋបាលខេត្តកំពង់ឆ្នាំង បន្តរកឃើញអ្នកជំងឺកូវីដ-១៩ ចំនួន១៧នាក់ទៀត ដែលអាយុពី៤ឆ្នាំទៅដល់៧២ឆ្នាំ។ ក្នុងចំណោមអ្នកជំងឺកូវីដ-១៩ទាំង១៧នាក់នេះ គឺមានរហូតទៅដល់១៥នាក់ ជាពលរដ្ឋរស់នៅក្នុងស្រុកតាំងគោក ដែលបានប៉ះពាល់ផ្ទាល់ជាមួយកម្មកររោងចក្រដែលវិជ្ជមានកូវីដ-១៩។ ដោយអ្នកជំងឺកូវីដ-១៩ ចំនួន២នាក់ទៀត គឺមានម្នាក់នៅស្រុកស្ទោង ដែលជាពលករត្រលប់មកពីប្រទេសថៃ និងម្នាក់ទៀតនៅស្រុកបារាយណ៍។ រដ្ឋបាលខេត្តកំពង់ធំ បានបញ្ជាក់ថា គិតត្រឹមថ្ងៃទី២៧ឧសភា ខេត្តកំពង់ធំ មានអ្នកជំងឺកូវីដ-១៩ សរុប ២២៧នាក់។ ក្នុងមាន៨២នាក់ បានជាសះស្បើយពីកូវីដ-១៩ និង១៤៥នាក់ទៀត កំពុងសម្រាកព្យាបាលនៅមន្ទីរពេទ្យ។
កោះកុង៖ មាន៤ករណី ក្នុងនោះមានទារកម្នាក់
មនុស្ស៤នាក់ទៀត មានវិជ្ជមានកូវីដ-១៩ តាមរយៈការធ្វើតេស្តរហ័ស នៅក្នុងភូមិសាស្ត្រខេត្តកោះកុង។ ក្នុងចំណោម៤ករណី ដែលបានរកឃើញ មានទារកអាយុជាង១ឆ្នាំម្នាក់ ដែលមានទីលំនៅក្នុងភូមិសាលាម្នាង ឃុំបឹងព្រាវ ស្រុកស្រែអំបិល។ ម្នាក់ទៀតជាបុរសវ័យ២០ឆ្នាំ រស់នៅភូមិចំការក្រោម ឃុំដងព្រែក ស្រុកស្រែអំបិល ខណៈ២នាក់ទៀត ជាអ្នករស់នៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
ពោធិ៍សាត់៖ មាន៥នាក់ ដោយ៣នាក់មកពីភ្នំពេញ ម្នាក់មកពីថៃ និងម្នាក់ទៀតពីកំពង់ស្ពឺ
៥ករណីបន្ថែមទៀតដែលត្រូវបានរកឃើញនៅខេត្តពោធិ៍សាត់នេះ មាន៤នាក់ជាស្ត្រី។ តាមរបាយការណ៍របស់មន្ទីរសុខាភិបាលខេត្តពោធិ៍សាត់ ក្នុងចំណោមអ្នកឆ្លងថ្មីនេះ មាន៣នាក់ ជាអ្នកដំណើរពីរាជធានីភ្នំពេញ, ១នាក់មកពីខេត្តកំពង់ស្ពឺ និង១នាក់ទៀតជាពលរដ្ឋខ្មែរទើបត្រឡប់មកពីប្រទេសថៃ។ គិតត្រឹមថ្ងៃទី២៧ ខែឧសភា ខេត្តពោធិ៍សាត់ មានអ្នកឆ្លងកូវីដ-១៩ ចំនួន១០២នាក់ ក្នុងនោះជាសះស្បើយ ចំនួន១៧នាក់ ស្លាប់១នាក់ និង៨៤នាក់ទៀតកំពុងបន្តព្យាបាល។
បាត់ដំបង៖ ឆ្លងថ្មី១០នាក់ និងជាសះស្បើយ២នាក់
សម្រាប់ខេត្តបាត់ដំបងនៅថ្ងៃទី២៧ឧសភា ដែលមានមនុស្ស១០នាក់ទៀត ឆ្លងកូវីដ-១៩ ដែរនោះ មានភាគច្រើនជាកម្មករសំណង់។ ក្នុងចំណោម១០នាក់ ដែលឆ្លងកូវីដ-១៩ មាន២នាក់ ជាពលរដ្ឋនៅស្រុករុក្ខគិរី, ២នាក់នៅស្រុកមោងឫស្សី, ២នាក់នៅស្រុកគាស់ក្រឡ, មា្នក់នៅស្រុកកំរៀង, ម្នាក់នៅស្រុកភ្នំព្រឹក, ម្នាក់នៅស្រុកថ្មគោល, និងជំងឺកូវីដ-១៩ម្នាក់ទៀត នៅស្រុកឯកភ្នំ។ ក្នុងថ្ងៃជាមួយគ្នានេះ រដ្ឋបាលខេត្តបាត់ដំបង ក៏ប្រកាសថាមានមនុស្ស២នាក់ទៀត បានជាសះស្បើយពីកូវីដ-១៩ ផងដែរ។ គឺស្ត្រីវ័យ៣៣មា្នក់ ដែលរស់នៅក្នុងស្រុកគាស់ក្រឡ និងបុរសវ័យ២៦ឆ្នាំ រស់នៅក្នុងស្រុកថ្មគោល។ មកទល់ពេលនេះខេត្តបាត់ដំបង មានអ្នកជំងឺកូវីដ-១៩ សរុប១៨៨នាក់ ដោយក្នុងនោះ មាន៧០នាក់ បានជាសះស្បើយ និង១១៤នាក់ទៀត កំពុងសម្រាកព្យាបាលជំងឺ ខណៈមាន២នាក់ បានបាត់បង់ជីវិត ដោយសារកូវីដ-១៩នេះ។
ឧត្តរមានជ័យ៖ រកឃើញថ្មី២នាក់ និងសះស្បើយ២នាក់
រដ្ឋបាលខេត្តឧត្តរមានជ័យ បានរកឃើញពលរដ្ឋខ្មែរ២នាក់ទៀតវិជ្ជមានកូវីដ-១៩ ដែលជាអ្នកទើបត្រឡប់ពីប្រទេសថៃ។ តាមសេចក្តីប្រកាសរបស់រដ្ឋបាលខេត្តឧត្តរមានជ័យ ក្នុងចំណោមអ្នកទាំង២នេះ មានទាំរកវ័យ១ឆ្នាំម្នាក់ មានអាសយដ្ឋាននៅឃុំអន្លង់វិល ស្រុកសង្កែ ខេត្តបាត់ដំបង។ ម្នាក់ទៀតជាស្ត្រីវ័យ ៤០ឆ្នាំ រស់នៅឃុំតាប៉ុន ស្រុកសង្កែ ខេត្តបាត់ដំបង។ ជាមួយគ្នានេះ រដ្ឋបាលខេត្តក៏ប្រកាសថា មានអ្នកជំងឺចំនួន២នាក់ បានជាសះស្បើយផងដែរ។
បច្ចុប្បន្ន ខេត្តឧត្តរមានជ័យ រកឃើញអ្នកវិជ្ជមានជំងឺកូវីដ-១៩ ចំនួន ៣៨ករណី ក្នុងនោះ៣៦ករណី បាននាំចូលពីក្រៅប្រទេស។ អ្នកសះស្បើយមាន ៩នាក់ ខណៈ២៩នាក់ទៀតកំពុងសម្រាកព្យាបាល។
សៀមរាប៖ ៤ករណីថ្មី ដោយម្នាក់ទើបត្រឡប់ពីប្រទេសថៃ
រដ្ឋបាលខេត្តសៀមរាប បន្តរកឃើញករណីវិជ្ជមានជំងឺកូវីដ-១៩ បន្ថែម៤នាក់ទៀត ដែលមាន៣នាក់ ជាប់ពាក់ព័ន្ធនឹងអាជីវករនៅផ្សារសាមគ្គី និងម្នាក់ទៀតទើបត្រឡប់ពីប្រទេសថៃ។ យោងតាមសេចក្ដីប្រកាសព័ត៌មានរបស់រដ្ឋបាលខេត្តសៀមរាប ក្នុងចំណោមអ្នកវិជ្ជមានថ្មីទាំង៤នាក់នោះ មាន១នាក់ រស់នៅភូមិស្ពានក្អែក ឃុំកណ្ដែក សុ្រកប្រាសាទបាគង។ ១នាក់ រស់នៅភូមិមណ្ឌល៣ សង្កាត់ស្លក្រាម ក្រុងសៀមរាប។ ១នាក់ រស់នៅភូមិវត្តបូព៍ សង្កាត់សាលាកំរើក ក្រុងសៀមរាប។ ១នាក់ទៀត ជាស្ត្រីវ័យ ៣០ឆ្នាំ ដែលទើបត្រឡប់ពីប្រទេសថៃ។ ស្ត្រីរូបនេះ រស់នៅភូមិព្រលឹត ឃុំរើល ស្រុកពួក ខេត្តសៀមរាប។
នៅថ្ងៃទី២៧ ឧសភា ខេត្តសៀមរាបក៏មានអ្នកជំងឺម្នាក់បានជាសះស្បើយដែរ លើស្ត្រីវ័យ ៣០ឆ្នាំ មានអាសយដ្ឋាននៅភូមិពោធិ៍ ឃុំពង្រក្រោម ស្រុកជីក្រែង។ គិតត្រឹមថ្ងៃទី២៧ ឧសភា ខេត្តសៀមរាប មានអ្នកវិជ្ជមានជំងឺកូវីដ-១៩ សរុប១០៧នាក់ ក្នុងនោះ៥៧នាក់ បានជាសះស្បើយ,២នាក់ស្លាប់ និង៤៨នាក់កំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប។
ព្រៃវែង ៖ Rapid Test រកឃើញ១០នាក់បន្ថែម
មនុស្សចំនួន១០នាក់ទៀត មានវិជ្ជមានកូវីដ-១៩ នៅក្នុងភូមិសាស្ត្រខេត្តព្រៃវែង ក្នុងនោះ ៤នាក់ជាអ្នកធ្វើដំណើរពីរាជធានីភ្នំពេញ។ តាមប្រកាសព័ត៌មានរបស់រដ្ឋបាលខេត្ត ព្រៃវែង ក្នុងចំណោមអ្នកវិជ្ជមានថ្មីទាំង១០នាក់ មាន ៣នាក់ មានអាសយដ្ឋាននៅស្រុកព្រះស្តេច ,៣នាក់នៅស្រុកកំពង់ត្របែក, ២នាក់នៅស្រុកបាភ្នំ ខណៈស្រុកពារាំង និងស្រុកកំចាយមារ មាន១នាក់រៀងខ្លួន។ ខេត្តព្រៃវែង បានរកឃើញករណីវិជ្ជមានកូវីដ-១៩ សរុប ៣៤០នាក់ ក្នុងនោះ១៥២នាក់បានជាសះស្បើយ, ៤នាក់ស្លាប់ និង១៨៤នាក់ទៀត កំពុងបន្តសម្រាកព្យាបាល។
ស្ទឹងត្រែង៖ រកឃើញ២នាក់ ជាឪពុកកូននឹងគ្នា
ស្ទឹងត្រែង នៅថ្ងៃទី២៧ ខែឧសភា ឆ្នាំ២០២១នេះ បានរកឃើញអ្នកជំងឺកូវីដ-១៩ ចំនួន២នាក់ ដែលជាឪពុក និងកូននឹងគ្នា ដែលឪពុកអាយុ ៣៦ឆ្នាំ និងកូនស្រីអាយុ ១៥ឆ្នាំ។ បើតាមសេចក្តីសេចក្តីប្រកាសព័ត៌មាន របស់រដ្ឋបាលខេត្តស្ទឹងត្រែង អ្នកទាំង២នេះ គឺឆ្លងពីប្រពន្ធ និងម្តាយ របស់គេដែលមានតេស្តវិជ្ជមានកូវីដ-១៩ តាំងពីថ្ងៃទី២០ ឧសភាមកម្ល៉េះ។ បច្ចុប្បន្នខេត្តស្ទឹងត្រែង មានឆ្លងកូវីដ-១៩ សរុប ៩នាក់ ក្នុងនោះ១នាក់បានជាសះស្បើយ ហើយ៨នាក់ទៀត កំពុងបន្តព្យាបាល។
ករណីប្រចាំថ្ងៃទូទាំងប្រទេស៖
មនុស្ស៥៩៩នាក់ទៀត តេស្តវិជ្ជមានកូវីដ-១៩ នៅកម្ពុជា ខណៈអ្នកសះស្បើយបន្ថែមមាន៥០២នាក់ និងស្លាប់២នាក់ទៀត។ នេះបើតាមរបាយការណ៍របស់ក្រសួងសុខាភិបាល នៅថ្ងៃសុក្រនេះ ដោយបញ្ជាក់ថា ក្នុងចំណោម៥៩៩ករណីថ្មី មាន២៥ករណីនាំចូលពីបរទេស។ គិតមកដល់ពេលនេះ កម្ពុជាមានករណីសរុបចំនួន២៨២៣៧នាក់ សះស្បើយសរុប ២០៩០០នាក់ និងស្លាប់១៩៦នាក់៕
Tag:
កំពង់ស្ពឺ
កំពង់ឆ្នាំង
កំពង់ធំ
ព្រៃវែង
បាត់ដំបង
© រក្សាសិទ្ធិដោយ thmeythmey.com
