ប្រធានមន្ទីរពេទ្យខេត្តពោធិ៍សាត់ បានបញ្ជាក់ថា ករណីពុលស្រាដែលបណ្តាលឲ្យមានមនុស្សស្លាប់នេះ គឺកើតឡើងតាំងពីថ្ងៃទី៣០ ខែឧសភា ឆ្នាំ២០២១មកម្ល៉េះ ដោយផ្តើមចេញពីការជួបជុំនៅក្នុងពិធីបុណ្យសពមួយ នៅស្រុកក្រគរ ខេត្តពោធិ៍សាត់។

 

បើតាមលោក ច័ន្ទ សុខា អាជ្ញាធរបានរកឃើញមនុស្សចំនួន១០០នាក់ ដែលបានហូបស្រាស និងស្រាថ្នាំ ដែលបណ្តាលឲ្យពុលនោះ។ ក្នុងចំណោមមនុស្សទាំង១០០នាក់ គឺមានមនុស្សប្រមាណ៦០នាក់ បានត្រឡប់ទៅគេហដ្ឋានវិញហើយ ហើយនៅសល់តែជាង៤០នាក់ទៀតដែលកំពុងតែស្ថិតនៅក្រោមការពិនិត្យ និងព្យាបាលនៅមន្ទីរពេទ្យបង្អែកខេត្តពោធិ៍សាត់។ 

 

«អ្នកដែលយើងសួរទៅ គាត់ថាបានពិសាស្រាតិចតួច ហើយអ្នកពិសាស្រារយៈវែង គឺ៧២ម៉ោង គឺគាត់អត់មានធ្វើទុក្ខអ្វីទេ ហើយយើងក៏អនុញ្ញាតឲ្យពួកគាត់ទៅផ្ទះវិញ។ យើងកំពុងតែស្រាវជ្រាវ រកអ្នកពាក់ព័ន្ធ(ករណីពុលស្រា) ដើម្បីឲ្យពួកគាត់ជៀសវាងពីគ្រោះថ្នាក់។ អ្នកពាក់ព័ន្ធនឹងករណីពុលស្រា និងផឹកស្រា នឹងមានជាបន្តទៀត»។ នេះជាការលើកឡើងរបស់លោកប្រធានមន្ទីរពេទ្យខេត្តពោធិ៍សាត់។

 

ទាក់ទងនឹងករណីពុលស្រានេះ លោក ច័ន្ទ សុខា មិនទាន់អាចបញ្ជាក់ច្បាស់លាស់ថា បណ្តាលមកពីមូលហេតុអ្វីពិតប្រាកដនៅឡើយទេ ខណៈក្រុមគ្រូពេទ្យបានយកសំណាកស្រាទាំងនោះទៅមន្ទីរពិសោធន៍ ដើម្បីរកមូលហេតុច្បាស់លាស់។

 

ក្រោយពីហេតុការណ៍នេះបានកើតឡើង អាជ្ញាធរបានឃាត់ខ្លួន និងសាកសួរទៅអ្នកបិតស្រា២នាក់ ដែលជាប្តីប្រពន្ធនេះហើយ។ នេះបើតាមលោក ឯម រុន អធិការដ្ឋាននគរបាលស្រុកក្រគរ ខេត្តពោធិ៍សាត់ដែលបានបញ្ជាក់ប្រាប់អ្នកសារព័ត៌មានថ្មីៗ។ 

 

គ្រាន់តែនៅក្នុងខែឧសភា និងដើមខែមិថុនានេះ មានករណីពុលស្រាកើតឡើង នៅខេត្តចំនួន៣ នៅកម្ពុជា បានសម្លាប់មនុស្សជាង៣០នាក់។ ករណីដំបូងកើតឡើង នៅស្រុកល្វាឯម ខេត្តកណ្តាល បណ្តាលឲ្យមនុស្សចំនួន១២នាក់បានស្លាប់។ បន្ទាប់មកនៅស្រុកកំពង់ត្រាច ខេត្តកំពត មានមនុស្សស្លាប់ចំនួន១០នាក់។ ករណីស្លាប់ចុងក្រោយ នៅខេត្តពោធិ៍សាត់ ដែលអ្នកស្លាប់កើនដល់១០នាក់។ 

 

: 

 

យោងតាមរបាយការណ៍អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(CCF) ចាប់ពីឆ្នាំ២០១៦ ដល់ឆ្នំា២០២០ មានខេត្តចំនួន៤ ដែលកើតមានករណីពុលស្រា ដោយខេត្តទាំងនោះគឺ ពោធិ៍សាត់ ក្រចេះ បន្ទាយមានជ័យ និងកំពង់ឆ្នាំង ដែលបណ្តាលឲ្យមនុស្សស្លាប់សរុបចំនួន២៨នាក់។

 

ដើម្បីជៀសវាងមានករណីពុលស្រានេះកើតឡើងទៀត ក្រសួងសុខាភិបាល បានទទូចពលរដ្ឋ ឈប់ពិសាស្រាដែលបិត និងផលិត គ្មានបច្ចេកទេសត្រឹមត្រូវ។ ជាមួយគ្នានេះក្រសួងអំពាវនាវ ដល់អ្នកបិតស្រា ឱ្យបញ្ឈប់សកម្មភាពផលិតស្រា ដែលដាក់សារធាតុមេតាណុលខ្ពស់ ដើម្បីជៀសវាងករណីពុលស្រា៕