បើតាមការលើកឡើងរបស់ប្រធានមន្ទីរសុខាភិបាលខេត្តតាកែវរូបនេះ ស្ត្រីដែលស្លាប់ដោយសារជំងឺកូវីដ-១៩ខាងលើ  មានឈ្មោះ ហេង ណាវី បានធ្វើតេស្តរកឃើញវិជ្ជមានកូវីដ-១៩ នៅថ្ងៃទី៣មិថុនា ឆ្នាំ២០២១ ហើយក៏បានបញ្ជូនទៅព្យាបាលនៅមន្ទីរពេទ្យបង្អែកខេត្តតាកែវ។ 

 

មុននឹងស្លាប់ ស្ត្រីរូបនេះមានភាពហត់ ឈឺក្បាល អស់កម្លាំង រួមទាំងមានប្រវត្តិជំងឺទឹកនោមផ្អែមប្រចាំកាយផង។ ស្ថានភាពអ្នកជំងឺមានការវិវត្តកាន់តែធ្ងន់ធ្ងរ ពីមួយថ្ងៃទៅមួយថ្ងៃ បានតម្រូវឱ្យក្រុមគ្រូពេទ្យជួយសង្គ្រោះ តាមលក្ខណៈបច្ចេកទេសបន្ទាន់ និងគ្រប់មធ្យោបាយ រហូតដល់ ជាងម៉ោង១យប់ ចូលថ្ងៃទី៧មិថុនា ឆ្នាំ២០២១ អ្នកជំងឺក៏បានបាត់បង់ជីវិត។ នេះជាការរៀបរាប់របស់លោក នុត ស៊ីណាត។ 

 

យោងតាមតួលេខ ដែលសារព័ត៌មាន ThmeyThmey ទទួលបានពីលោក នុត ស៊ីណាត គិតត្រឹមថ្ងៃទី៧មិថុនា ឆ្នាំ២០២១ ខេត្តតាកែវ មានអ្នកឆ្លងកូវីដ-១៩ ជាង១,៤០០នាក់។ ក្នុងនោះ មានអ្នកជំងឺជិត៨០០នាក់ បានជាសះស្បើយពីកូវីដ-១៩ និង៩នាក់បានស្លាប់ដោយសារជំងឺនេះ ខណៈជាង៦០០កំពុងសម្រាកព្យាបាល។  លោក នុត ស៊ីណាត មានប្រសាសន៍ដូចនេះ៖«មួយរយៈពេលចុងក្រោយ ខេត្តតាកែវ មានសន្ទុះខ្លាំងនៃការឆ្លងកូវីដ-១៩ ដោយក្នុងមួយថ្ងៃៗក្រុមគ្រូពេទ្យយើងយកសំណាកជាង១០០០នាក់ មកធ្វើតេស្តកូវីដ-១៩»។

 

គិតមកដល់ពេលនេះ កម្ពុជាមានអ្នកកើតកូវីដ-១៩សរុប ៣៥ ៥១១នាក់ ក្នុងនោះ២៨ ៦៤៩នាក់ បានជាសះស្បើយ និងស្លាប់២៧៨នាក់៕