លោក ឡុង បូណារេត អភិបាលរងខេត្តកំពង់ស្ពឺ បានបញ្ជាក់ថា ម្ចាស់អាជីករ និងម្ចាស់ក្រុមហ៊ុន បានស្ម័គ្រចិត្តរុះរើចេញដោយខ្លួនឯង តាមការណែនាំរបស់រដ្ឋបាលខេត្តកំពង់ស្ពឺ។ 

 

«គ្រប់ស្រុក ឃើញថាអត់មានផ្ទាំងពាណិជ្ជកម្មគ្រឿងស្រវឹងទេ គឺរើអស់ខ្ទេចខ្ទីហើយ។ ខ្ញុំមើលគ្រប់ច្រករហក គឺមិនមានសល់មួយតែម្តង។ មិនថាទីប្រជុំជន និងទីដាច់ស្រយោល។ តាមសេចក្តីជូនដំណឹងមក គឺពលរដ្ឋចាប់ផ្តើមអនុវត្តជាបណ្តើរៗដោយមិនបាច់បង្គំ។ ពលរដ្ឋមានការចូលរួមច្រើន ពីព្រោះពួកគេមានការយល់ដឹងច្រើន»។ លោកស្រី អភិបាលរងខេត្តកំពង់ស្ពឺ បានរៀបរាប់បែបនេះ។ 

 

បើតាមលោកស្រី ឡុង បូណារេត ម្ចាស់ក្រុមហ៊ុន និងម្ចាស់អាជីវកម្ម ភាគច្រើនរុះរើតែផ្ទាំងផ្សព្វផ្សាយគ្រឿងស្រវឹង ប៉ុន្តែបង្គោលដែលដាក់ផ្សព្វផ្សាយគ្រឿងស្រវឹងនៅតាមចិញ្ចើមផ្លូវ គឺមានខ្លះ ត្រូវបានដកចេញ។ ចំណែកបង្គោលដែលមិនទាន់ដកចេញ រដ្ឋបាលខេត្តអាចអនុញ្ញាតឲ្យម្ចាស់ក្រុមហ៊ុន និងម្ចាស់អាជីវកម្មអាចដាក់ផ្ទាំងផ្សព្វផ្សាយផ្សេងៗ ជំនួសគ្រឿងស្រវឹង។ 

 

លោកស្រី អភិបាលរងខេត្តកំពង់ស្ពឺបានលើកឡើងដូច្នេះថា៖«យើងហាមតែអ្វីដែលប៉ះពាល់នឹងគ្រឿងស្រវឹង ហើយអ្វីមិនប៉ះពាល់។ ពួកគាត់ចង់ដាក់ផ្ទាំងអ្វីដែលជាអាជីកម្មរបស់គាត់ ដាក់ជាឈ្មោះ។ ប៉ុន្តែកុំឲ្យចេញជារូបភាពផ្សព្វផ្សាយគ្រឿងស្រវឹង»។ 

 

លោកអភិបាលរងខេត្តរូបនេះ បានអះអាងថា សកម្មភាពរុះរើផ្ទាំងស្រាបៀទាំងនេះ អាចនឹងរួមចំណែកឲ្យខេត្តមួយនេះមានសោភ័ណភាពល្អប្រសើរ និងកាត់បន្ថយការសេពគ្រឿងស្រវឹង៕