កីឡាជាតិ
ជាតិ
វិសាខានិងបឹងកេត មិនបានលេង AFC Cup ក្រោយការប្រកួតតំបន់អាស៊ានត្រូវរំសាយព្រោះកូវីដ-១៩ 07, Jul 2021 , 3:59 pm
× សហព័ន្ធកីឡាបាល់ទាត់អាស៊ី (AFC) នៅថ្ងៃទី៧ ខែកក្កដា បានសម្រេចលុបចោលការប្រកួតទាំងអស់នៅតំបន់អាស៊ាន សម្រាប់ពានរង្វាន់ AFC Cup 2021 ដែលរួមមានពូលចំនួន៣ ត្រូវប្រកួតជម្រុះគ្នា។ ការសម្រេចនេះពីព្រោះ AFC ព្រួយបារម្ភពីការរីករាលដាលជំងឺកូវីដ-១៩កាន់តែខ្លាំងឡើង។ ក្រុមពីកម្ពុជា វិសាខា និងបឹងកេតសុទ្ធតែត្រូវអស់ការប្រកួត។
តាមរយៈការផ្សាយរបស់ AFC នៅលើវេបសាយផ្លូវការបស់ខ្លួន ក្រុមចំនួន១១ ក្នុងតំបន់អាស៊ីអាគ្នេយ៍ ដែលស្ថិតក្នុងពូល G, H និង I ដែលរួមមានក្រុម Bali United, បឹងកេត, Hanoi, Kedah Sailors, Persipura, Sai Gon, Geylang Inter, Lalenok United, Terengganu និង វិសាខា ត្រូវរំសាយការប្រកួតទាំងអស់។
ពានរង្វាន់ AFC Cup 2021 មាន១០ពូលពី A ដល់ J មកពី៥តំបន់ផ្សេងគ្នាចូលរួម ក្នុងនោះមានតំបន់អាស៊ីខាងកើត អាស៊ីខាងជើង អាស៊ីកណ្ដាល អាស៊ីខាងកើត និងអាស៊ីអាគ្នេយ៍។ ដោយមើលឃើញថា តំបន់អាស៊ីអាគ្នេយ៍ មិនអាចគ្រប់គ្រងជំងឺកូវីដ-១៩ និងពិបាករកទីតាំងប្រកួតសមស្របបាន AFC ក៏សម្រេចរំសាយការប្រកួតនៅតំបន់នេះតែម្តង ដោយទុកតែក្រុមក្នុងតំបន់៤ផ្សេងទៀត បន្តយុទ្ធនាការធម្មតា។
មកទល់ពេលនេះ មានតែក្រុមតំបន់អាស៊ីកណ្ដាលប៉ុណ្ណោះ ដែលមិនទាន់បានបញ្ចប់វគ្គជម្រុះក្នុងពូល រីឯតំបន់៣ផ្សេងទៀតប្រកួតរួចរាល់អស់ហើយ។
វិសាខា ម្ចាស់ជើងឯកពានរង្វាន់សម្តេច ហ៊ុន សែន ដែលគ្រោងបង្ហាញខ្លួនក្នុងព្រឹត្តិការណ៍តំបន់លើកដំបូងបំផុត ត្រូវខកខានវិញដោយសារតែបញ្ហាកូវីដ-១៩។ រីឯបឹងកេត ម្ចាស់ជើងឯកក្របខណ្ឌកំពូល ក៏អស់ការប្រកួតដូចគ្នា៕
© រក្សាសិទ្ធិដោយ thmeythmey.com