អ្នកគ្រូ Nimali Anuruddhika ដែលមានជំនាញផ្នែក IT តែងតែរៀបចំមេរៀនសម្រាប់សិស្សរបស់ខ្លួនដើម្បីឲ្យពួកគេអាចទាញយកដោយមិនចាំបាច់ទៅសាលារៀន។ គ្រូផ្សេងទៀតក៏ធ្វើយ៉ាងដូច្នោះដែរ ដោយសារសិស្សជាច្រើនត្រូវធ្វើដំណើរក្នុងផ្លូវដ៏វែងឆ្ងាយដើម្បីស្វែងរកកន្លែងដែលមានសេវាអ៊ីនធ័រណិតដើម្បីទាញយកមេរៀន។

 

យោងតាមការផ្សាយរបស់ Al Jazeera សិស្សដែលនៅភូមិ Bohitiwaya ត្រូវធ្វើដំណើរឡើងចុះភ្នំជាងបីគីឡូម៉ែត្រដើម្បីទទួលបានមេរៀនអនឡាញ និងស្តាប់ការណែនាំបន្ថែមពីគ្រូ ដោយពេលខ្លះពួកគេបានប្រទះឃើញខ្លាឃ្មុំ និងដំរី នៅតាមផ្លូវផងដែរ។

 ប្រភពរូប៖ AP

សិស្សមួយចំនួនដែលរស់នៅ Lunugala ចម្ងាយប្រមាណ៦០គីឡូម៉ែត្រពីសាលា ក៏មិនអាចទៅយកមេរៀនផ្ទាល់បាននោះដែរ ពួកគេត្រូវស្វែងរកទីខ្ពស់ ជាពិសេសនៅតំបន់ព្រៃឈើបម្រុង ដើម្បីអាចឲ្យស្មាតហ្វូន និងកុំព្យូទ័រយួរដៃរបស់ពួកគេអាចចាប់យកសេវាបាន។

 

ឪពុកម្តាយរបស់សិស្សទាំងនោះភាគច្រើន ជាកសិករ ដោយពួកគាត់មិនមានលទ្ធភាពអ្វីច្រើននោះឡើយ។ អ្នកខ្លះ បានជូនកូនឡើងភ្នំជាប្រចាំ ចំណែកឯសិស្សដែលមិនមានឧបករណ៍អេឡិចត្រូនិក ត្រូវរង់ចាំការចែករំលែកពីសិស្សផ្សេងទៀត។

 

ស្រីលង្កា បានបិទដំណើរការសាលារៀន តាំងពីខែមីនា ឆ្នាំ២០២០ ដោយសារតែការរាលដាលកូវីដ-១៩ ដោយស្ថាប័នអប់រំអះអាងពីការខំប្រឹងប្រែងដើម្បីឲ្យសិស្សទាំងអស់នៅតែអាចបន្តការសិក្សា។ ទោះបីជាយ៉ាងណាក៏ដោយ លោក Joseph Stalin ដែលជាប្រធានសមាគមគ្រូបង្រៀនមួយរូប វាយតម្លៃថា សិស្សប្រមាណតែ៤០ភាគរយប៉ុណ្ណោះ អាចចូលរួមសិក្សាអនឡាញ ខណៈសិស្សផ្សេងទៀត ខ្វះខាតមធ្យោបាយគ្រប់បែបយ៉ាង៕ 

 ប្រភពរូប៖ AP