ពិធីដាក់ឱ្យដំណើរការសាកល្បងនូវប្រព័ន្ធ MSDS បានធ្វើឡើងតាមប្រព័ន្ធអនឡាញ កាលពីថ្ងៃទី២៣កក្កដា រវាងលោក ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជា ជាមួយលោក Anthony Gill ប្រធានបេសកកម្មរបស់ធនាគារអភិវឌ្ឍន៍អាស៊ីប្រចាំនៅកម្ពុជា។ នេះបើយោងតាមសេចក្តីប្រកាសព័ត៌មានរបស់NBC។  
 

NBC បានអះអាងដូច្នេះ៖« ការដាក់ឱ្យដំណើរការសាកល្បងនូវប្រព័ន្ធទិន្នន័យ តាមដានម៉ាក្រូសេដ្ឋកិច្ចនេះ គឺជាជំហានថ្មីមួយទៀត នៃដំណើរការផ្សព្វផ្សាយទិន្នន័យប្រកបដោយគុណភាព ប្រសិទ្ធភាព និងភាពទាន់ពេលវេលា ស្របតាមបេសកកម្មរបស់ធនាគារជាតិនៃកម្ពុជា»។


 

សេចក្តីប្រកាសព័ត៌មានដដែលរបស់NBC បានរៀបរាប់ថា MSDS គឺជាប្រព័ន្ធមូលដ្ឋានទិន្នន័យអនឡាញ ដែលប្រើប្រាស់សម្រាប់ការវិភាគ និងការតាមដានស្ថានភាពម៉ាក្រូសេដ្ឋកិច្ច និងហិរញ្ញវត្ថុ ព្រមទាំងគាំទ្រដល់ការរៀបចំគោលនយោបាយនានា សំដៅធានាឱ្យបាននូវស្ថិរភាពថ្លៃ និងកំណើនសេដ្ឋកិច្ចប្រកបដោយចីរភាព។ 
 

លើសពីនេះ MSDS នឹងផ្តល់លទ្ធភាពដល់អ្នកប្រើប្រាស់ ក្នុងការតាមដាន និងវាយតម្លៃការវិវឌ្ឍនៃដំណើរការសេដ្ឋកិច្ច និងហិរញ្ញវត្ថុ តាមរយៈសូចនាករគន្លឹះទាំង៧០, តារាងសូចនាករសំខាន់, ក្រាហ្វិក និងទិន្នន័យតាមវិស័យប្រមាណ៣០០មុខបន្ថែមទៀត ដែលត្រូវបានរៀបចំក្រោមជំនួយបច្ចេកទេសរបស់ធនាគារអភិវឌ្ឍន៍អាស៊ី និងដោយមានការគាំទ្រផ្នែកហិរញ្ញវត្ថុពីរដ្ឋាភិបាលជប៉ុន។

 

បើតាមNBC សូចនាករគន្លឹះ និងទិន្នន័យផ្សេងទៀត គឺត្រូវបានរៀបចំជាប្រចាំខែ ត្រីមាស និងឆ្នាំ ព្រមទាំងចែកចេញជា៦ វិស័យម៉ាក្រូសេដ្ឋកិច្ចសំខាន់ៗ។ ក្នុងនោះ មាន ការប្រែប្រួលសេដ្ឋកិច្ចសកល, ស្ថិរភាពម៉ាក្រូសេដ្ឋកិច្ច, វិស័យក្រៅប្រទេស, វិស័យសារពើពន្ធ, វិស័យហិរញ្ញវត្ថុ និងសូចនាករសម្រាប់ប្រៀបធៀបជាមួយប្រទេស ដែលមានស្ថានភាពសេដ្ឋកិច្ច ប្រហាក់ប្រហែលនឹងកម្ពុជា៕