សាច់ក្របីចំនួន៣តុងតឺន័រ ដែលក្រុមមន្ត្រីជំនាញរបស់ក្រសួងសុខាភិបាលតេស្តឃើញមានវិជ្ជមានកូវីដ-១៩នោះ គឺស្ថិតនៅក្នុងចំណោមសាច់ក្របីបង្កកចំនួន៥កុងតឺន័រ ដែលកម្ពុជានាំចូលពីប្រទេសឥណ្ឌា។  លោក ហុក គឹមចេង បានបញ្ជាក់ថា សាច់ក្របីបង្កកទាំង៣កុងតឺន័រនោះ បានរកវិជ្ជមានកូវីដ-១៩ កាលពីថ្ងៃទី១៩កក្កដា ឆ្នាំ២០២១។ 

 

បើយោងតាមលិខិតរបស់លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី២១កក្កដា ឆ្នាំ២០២១ សាច់ក្របីបង្កកទាំង៣កុងតឺន័រដែលមានផ្ទុកមេរោគកូវីដ-១៩នេះ  គឺបាននាំចូលដោយក្រុមហ៊ុនASHARY INVESTMENT & CONSTRUCTION និងក្រុមហ៊ុន BOVINI FOOD។

 

លោក គុណ ញឹម បានបញ្ជាក់ថា សាច់ក្របីបង្កកដែលរកឃើញមានមេរោគកូវីដ-១៩ នឹងត្រូវដុតកម្ទេចចោល នៅថ្ងៃទី២៧កក្កដា ឆ្នាំ២០២១។ ជាមួយគ្នានេះ លោក វ៉ី សំណាង អភិបាលខេត្តកំពង់ស្ពឺ បានប្រាប់សារព័ត៌មានThmeyThmey តាមទូរសព្ទនាព្រឹកថ្ងៃទី២៧កក្កដា ថា មកដល់ពេលនេះខាងអាជ្ញាធរខេត្តកំពង់ស្ពឺ គឺមិនទាន់ទទួលបាននូវសាច់ក្របីបង្កកដែលមានផ្ទុកមេរោគកូវីដ-១៩ ដើម្បីយកមកដុតចោល នៅឡើយ។

សូមជម្រាបថា ការរកឃើញសាច់ក្របីបង្កកមានផ្ទុកមេរោគកូវីដ-១៩នេះ គឺបន្ទាប់ពីកម្ពុជា សម្រចលើកលែងបម្រាមលើការនាំចូលសាច់បង្កក និងមុខទំនិញបង្កកដែលអាចមានហានិភ័យផ្សេងៗ ដែលមានប្រភពពីប្រទេសឥណ្ឌា កាលពីថ្ងៃទី១៩មិថុនា ឆ្នាំ២០២១៕