COVID-19
ជាតិ
ភ្នំពេញដាក់ចេញវិធានការរដ្ឋបាល១៤ថ្ងៃដើម្បីទប់ស្កាត់ការរាលដាលកូវីដ-១៩ 29, Jul 2021 , 1:18 pm
× រដ្ឋបាលរាជធានីភ្នំពេញ បានចេញសេចក្តីសម្រេចស្តីពីការដាក់ចេញនូវវិធានការរដ្ឋបាលរយៈពេល១៤ថ្ងៃ ដោយគិតចាប់ពីម៉ោង២៣ និង៥៩នាទី យប់ថ្ងៃទី២៩ ខែកក្កដា នេះ រហូតដល់ថ្ងៃទី១២ ខែសីហា ក្នុងគោលដៅប្រយុទ្ធ និងទប់ស្កាត់ការរាលដាលកូវីដ-១៩។
ដូចជាការអនុវត្តកន្លងមកផងដែរ សេចក្តីសម្រេចថ្មីដែលចុះហត្ថលេខាដោយលោកអភិបាលរាជធានី ឃួង ស្រេង បានរឹតត្បិតសកម្មភាពការងារ មុខរបរ និងអាជីវកម្មដែលមានហានីភ័យខ្ពស់នៃការរាលដាលកូវីដ-១៩។ សកម្មភាពការងារ មុខរបរ និងអាជីវកម្មដែលត្រូវបានហាមឃាត់មានដូចជា សាលារៀន (អាចបណ្តុះបណ្តាលតាមអនឡាញ) ខារ៉ាអូខេ រង្គសាល ឌីស្កូតែក បៀហ្គាឌិន កាស៊ីណូ រមណីយដ្ឋាន សារមន្ទី សួនកុមារ សួនកម្សាន្ត ម៉ាស្សា ស្ទីម សូណា គ្រប់ប្រភេទ។
ហាងលក់ និងសេពគ្រឿងស្រវឹងគ្រប់ប្រភេទ ក៏ត្រូវបានហាមឃាត់ផងដែរ ហើយក្រៅពីនេះ មានរោងភាពយន្ត រោងសម្តែងសិល្បៈ ក្លិបហាត់ប្រាណ និងមណ្ឌលកីឡាគ្រប់ប្រភេទ។
ការជួបជុំគ្នាលើសពី១០នាក់ ត្រូវតម្រូវឲ្យផ្អាកជាបណ្តោះអាសន្ន លើកលែងជំនួបក្នុងគ្រួសារ ឬលក្ខខណ្ឌផ្សេងៗ ដែលកំណត់ដោយអាជ្ញាធរមានសមត្ថកិច្ច។
បម្រាមគោចរត្រូវអនុវត្តចន្លោះពីម៉ោង៩យប់ ដល់់ម៉ោង៣អាធ្រាត្រ ដោយលើកលែងករណីមួយចំនួនដែលមានលិខិតបញ្ជាបេសកកម្មត្រឹមត្រូវ និងហេតុផលបន្ទាន់មួយចំនួន។ ចំពោះអ្នកកាសែត ត្រូវមានលិខិតអនុញ្ញាតសម្រាប់ការធ្វើដំណើរពីក្រសួងព័ត៌មាន។
គ្រប់ទីផ្សារ ភោជនីយដ្ឋាន អាហារដ្ឋាន តូបអាហារ ហាងកាហ្វេ ភេសជ្ជៈ និងអាជីវកម្មផ្នែកអាហារគ្រប់ប្រភេទ អាចដំណើរការជាប្រក្រតី ប៉ុន្តែត្រូវអនុវត្តឲ្យបានត្រឹមត្រូវតាមការណែនាំ និងវិធានសុខាភិបាល។ ចំពោះទីតាំងដែលមានករណីវិជ្ជមាន អាជ្ញាធរមូលដ្ឋាន ត្រូវចាត់វិធានការបិទជាបន្ទាន់៕
© រក្សាសិទ្ធិដោយ thmeythmey.com