កីឡាហែលទឹកកម្ពុជា២រូប គឺកីឡាករ ហែម ប៉ុច និងកីឡាការិនី ឃឿន ប៊ុនពេជ្រមរកត ដែលត្រូវប្រកួតវិញ្ញាសាហែល ៥០ម៉ែត្រសេរីដូចគ្នា នាមជ្ឈមណ្ឌលកីឡាហែលទឹក Tokyo Aquatics Centre។ សម្រាប់កីឡាករ ហែម ប៊ុច ត្រូវប្រកួតសេរីទី៤ (Heat-4) និងខ្សែបន្ទាត់ទី៦(Lane-6)។ រីឯកីឡាការិនី ឃឿន ប៊ុនពេជ្រមរកត ត្រូវប្រកួតសេរីទី៣ (Heat-3) និងខ្សែបន្ទាត់ទី៥ (Lane-5)។

 

ការប្រកួតហែលទឹកនេះ គណៈកម្មការនឹងជ្រើសរើសកីឡាករ-កីឡាការិនី ដែលមានសិទ្ធិផលខ្ពស់ ឬប្រើថិរវេលាតិចជាងគេតាមសេរី និង Heat នីមួយៗ ចំនួន ១៨នាក់ ឡើងវគ្គពាក់កណ្ដាលផ្ដាច់ព្រ័ត្រ មុននឹងឈានដល់កៅអីវគ្គផ្ដាច់ព្រ័ត្រ និងប្រជែងមេដាយ។

 

ដោយឡែក កីឡាករ ប៉ែន សុគង់ អត្តពលកម្មកម្ពុជា ក៏កំពុងប្រឹងប្រែងហ្វឹកហាត់ ដើម្បីត្រៀមការប្រកួត លើវិញ្ញាសារត់ល្បឿនចម្ងាយ ១០០ម៉ែត្រ នាម៉ោង៩ព្រឹក (ម៉ោងនៅកម្ពុជា) ថ្ងៃទី៣១ ខែកក្កដា ។

 

កម្ពុជាបានទទួលសិទ្ធិអនុគ្រោះបញ្ជូនអត្តពលិក ២ប្រភេទកីឡា គឺកីឡាករ-កីឡាការិនីហែលទឹក ២រូប និងកីឡាករអត្តពលកម្មម្នាក់ សម្រាប់ចូលរួមប្រកួតព្រឹត្តិការណ៍ Tokyo Olympic Games 2020 នៅប្រទេសជប៉ុន ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជានាយបេសកកម្ម ជាអ្នកដឹកនាំកីឡាករ-កីឡាការិនី៣រូប ចូលរួមប្រកួតព្រឹត្តិការណ៍នេះ៕