«ដើម្បីចូលរួមប្រយុទ្ធប្រឆាំងនឹងការរាតត្បាតជំងឺកូវីដ១៩នៅកម្ពុជា មានប្រទេសជាមិត្តចំនួន៤ហើយ បានផ្តល់ និងប្រកាសផ្តល់ជំនួយវ៉ាក់សាំងមកកម្ពុជា»។ នេះជាការលើកឡើងរបស់សម្តេចនាយករដ្ឋមន្ត្រី ហ៊ុន សែន នៅលើទំព័រហ្វេសប៊ុករបស់ខ្លួន ក្រោយពេលដែលកម្ពុជាទទួលបានវ៉ាក់សាំង Johnson & Johnson ជំហានដំបូងក្នុងចំណោម១លានដូសពីសហរដ្ឋអាមេរិក តាមយន្តការកូវ៉ាក់។

 

នៅមុនការមកដល់វ៉ាក់សាំងដែលជាជំនួយអាមេរិក កម្ពុជាបានទទួលជាង២លានដូសពីចិន និងទើបបាន AstraZeneca ៣៣ម៉ឺនដុសក្នុងចំណោម១លានដូសពីជប៉ុនតាមរយៈយន្តការកូវ៉ាក់។ បន្ទាប់មក កម្ពុជាក៏ត្រូវទទួលបាន AstraZeneca ៤១.៥ម៉ឺនដូសទៀតពីចក្រភពអង់គ្លេស តាមរយៈកិច្ចព្រមព្រៀងទ្វេភាគីផងដែរ។

 

: 

 

សម្រាប់ព្រឹកថ្ងៃទី៣០កក្កដានេះ កម្ពុជា ទទួលបានវ៉ាក់សាំងកូវីដ-១៩ Johnson & Johnson ជិត៥០ម៉ឺនដូស ដែលស្ថិតនៅក្នុងចំណោម១លានដូស ពីរដ្ឋាភិបាលអាមេរិកនិងប្រជាជនអាមេរិក ផ្តល់ជូនកម្ពុជាតាមរយៈមជ្ឈមណ្ឌលកូវ៉ាក់ ខណៈវ៉ាក់សាំងជាងពាក់កណ្តាលទៀតគ្រោងដឹកមកដល់នៅថ្ងៃទី២សីហា ឆ្នាំ២០២១។   

 

ប្រមុខរដ្ឋាភិបាល បានបញ្ជាក់ថា៖« អំណោយនេះ គឺជាផ្នែកមួយនៃការគាំទ្រជាបន្តបន្ទាប់ របស់សហរដ្ឋអាមេរិក ចំពោះប្រជាជនកម្ពុជា និងនៅក្នុងតំបន់ ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ»។

 

បច្ចុប្បន្នកម្ពុជា បានទទួលវ៉ាក់សាំងជិត១៨លានដូសហើយ ដោយគិតទាំងវ៉ាក់សាំងជំនួយផ្ទាល់ ការបញ្ជាទិញ និងតាមយន្តការកូវ៉ាក់។  

របាយការណ៍ចុងក្រោយរបស់ក្រសួងសុខាភិបាលបង្ហាញថា មនុស្សជាង៧លាននាក់ហើយ បានចាក់វ៉ាក់សាំងកូវីដ-១៩នៅកម្ពុជា ពោលគឺរដ្ឋាភិបាលសម្រេចបានជាង៧១ភាគរយនៃផែនការ១០លាននាក់របស់ខ្លួន។ បច្ចុប្បន្ន កម្ពុជាកំពុងបន្តយុទ្ធនាការចាក់ដល់កុមារ និងយុវជនពីអាយុ១២ ដល់ក្រោម១៨ឆ្នាំ ផងដែរ៕