កញ្ញា តោ គឹមស៊ី ជាយុវតីខ្មែរដ៏ល្បីល្បាញមួយរូបកាលពីអំឡុងឆ្នាំ២០១០ ក្នុងនាមជាសិស្សនិទ្ទេស A តែម្នាក់គត់ ពីការប្រឡងសញ្ញាបត្រមធ្យមសិក្សាទុតិយភូមិ។ ត្រឹមវ័យ២៩ឆ្នាំ កញ្ញា គឹមស៊ី គឺជាបេក្ខបណ្ឌិតផ្នែកស្ថិតិគណនា ពីTelecom Paris ដែលជាសាលាលំដាប់កំពូលមួយនៅប្រទេសបារាំង ហើយក៏ជាសាស្រ្តាចារ្យគណិតវិទ្យានៅសកលវិទ្យាមួយនៅភ្នំពេញផងដែរ។ បេក្ខបណ្ឌិតវ័យក្មេងរូបនេះ មានមហិច្ឆតាចង់ក្លាយជារដ្ឋមន្ត្រីក្រសួងអប់រំស្ត្រីដំបូងគេនៅកម្ពុជា រួមទាំងលើកទឹកចិត្តឱ្យស្រ្តីដទៃទៀតពង្រីកចំណេះដឹង ហ៊ានជ្រើសរើសជំនាញដែលពួកគេស្រលាញ់ និងដើរតាមក្ដីស្រមៃរបស់ខ្លួន។
កញ្ញា គឹមស៊ី ស្ថិតក្នុងចំណោមស្រ្តីតិចតួចបំផុត ដែលបានសិក្សារហូតដល់ថ្នាក់បណ្ឌិត។ ជាកូនទី៤ ក្នុងចំណោមបងប្អូន៦នាក់ ដែលមានឪពុកម្ដាយជាអ្នកលក់ដូរនៅខេត្តសៀមរាប កញ្ញា គឹមស៊ី មានចំណង់ចំណូលចិត្តលើការសិក្សាពិសេសផ្នែកគណិតវិទ្យា និងជាសិស្សពូកែតាំងពីក្មេងមកម្ល៉េះ។
កាលពីឆ្នាំ២០១០ អ្នកសៀមរាបរូបនេះ ជាបេក្ខជនម្នាក់គត់ ដែលជាប់និទ្ទេសA ក្នុងការប្រឡងមធ្យមសិក្សាទុតិយភូមិ។ ក្រោយបញ្ចប់វិទ្យាល័យ កញ្ញាគឹមស៊ី បានសិក្សាផ្នែកគណិតវិទ្យា និងវិទ្យាសាស្រ្តកំព្យូទ័រ នៅសាកលវិទ្យាល័យ Manhattan ក្រុងញូវយ៉ក សហរដ្ឋអាមេរិក ហើយកាលណោះនាងនៅតែរក្សាកំណត់ត្រាជាសិស្សពូកែរបស់ខ្លួន ដោយទទួលបានចំណាត់ថ្នាក់កំពូលប្រចាំសាលា នៅពេលបញ្ចប់ការសិក្សាថ្នាក់បរិញ្ញាបត្រ។ នាពិធីប្រគល់សញ្ញាបត្រឆ្នាំ២០១៥ គឹមស៊ី ត្រូវបានជ្រើសរើសឲ្យជាតំណាងនិស្សិតដើម្បីថ្លែងសុន្ទរកថា ថែមទៀតផង។
ក្រោយបញ្ចប់ថ្នាក់បរិញ្ញាបត្រ គឹមស៊ី នៅតែបន្តការសិក្សាជាបន្តបន្ទាប់ទៀតនៅប្រទេសបារាំងដោយនាងបានបញ្ចប់ថ្នាក់អនុបណ្ឌិតជំនាញស្ថិតិ ពីសាកលវិទ្យាល័យ Sorbonne University និងជាបេក្ខបណ្ឌិតផ្នែកស្ថិតិគណនាពីTelecom Paris ដែលជាសាលាលំដាប់កំពូលមួយនៅបារាំង។ កញ្ញា គឹមស៊ី បានការពារនិក្ខេបបទរបស់ខ្លួនរួចហើយនាចុងឆ្នាំ២០២០ នៅឡើយតែការកែសម្រួល និងបោះពុម្ពប៉ុណ្ណោះ។
មិនមែនជារឿងចៃដន្យឡើយ ដែលយុវតីរូបនេះ តែងតែជោគជ័យលើការសិក្សាជាបន្តបន្ទាប់នោះ ហើយជោគជ័យដែលនាងទទួលបាននេះ គឺបានមកពីការខំប្រឹងព្យាយាម និងឆន្ទៈតស៊ូ។ កញ្ញា គឹមស៊ី បានរៀបរាប់ដូច្នេះ៖ «ខ្ញុំខិតខំប្រឹងប្រែង បើគេដើរយើងរត់។ នៅពេលឃើញគេរៀនពួកែ ហើយចង់ពូកែដូចគេ អត់មានការបាក់ទឹកចិត្តទេ វាកាន់តែជំរុញទឹកចិត្តឱ្យយើងរៀនកាន់តែខ្លាំងឡើង ទោះបីមិនមែនជាភាសាកំណើតយើងក្ដី។ យើងប្រឹងប្រែងរកវិធីយ៉ាងណាឱ្យរៀនពូកែដូចគេដែរ»។
កញ្ញា គឹមស៊ី៖ ខ្ញុំប្រឹងប្រែង ដើម្បីជាគំរូភាពដល់ស្រ្តីដទៃ
កញ្ញា គឹមស៊ី បានស្ពាយការប្រឹងប្រែងដ៏ខ្លាំងក្លា ដើម្បីជម្នះឧបសគ្គស្រវាយកការអប់រំខ្ពង់ខ្ពស់ នៅបរទេសរយៈពេលជាង១០ឆ្នាំមកនេះ។ ការសិក្សាដល់ថ្នាក់បណ្ឌិត គឺជាបំណងប្រាថ្នារបស់នាង តាំងពីមុនឈានជើងទៅសិក្សានៅបរទេស។ ស្រ្តីវ័យ២៩ឆ្នាំរូបនេះ បានឱ្យដឹងថា កត្តាដែលនាំឱ្យនាងសិក្សាដល់ថ្នាក់បណ្ឌិត ដោយសារការមើលឃើញស្រ្តីដែលរៀនបានខ្ពស់នៅកម្ពុជាមានកម្រិត ជាពិសេសនាងចង់ធ្វើជាគំរូភាពដល់ស្រ្តី និងយុវជនជំនាន់ក្រោយផងដែរ។ ជាមនុស្សដែលចូលចិត្តការសិក្សា និងមានក្ដីស្រមៃច្បាស់លាស់ គឹមស៊ី ជឿជាក់ថា ស្រ្តីក៏មានសមត្ថភាព អាចធ្វើគ្រប់យ៉ាងបានដូចបុរសដែរ ទាំងការសិក្សា និងការងារ សំខាន់គឺស្ថិតនៅលើឆន្ទៈ និងការព្យាយាម។ «កត្តាដែលមិនសូវមានមនុស្សស្រីរៀន ទើបជំរុញឱ្យខ្ញុំរៀនផ្នែកហ្នឹង។ សិស្សស្រី សិស្សប្រុសមានសមត្ថភាពស្នើគ្នា ហើយរៀនពូកែដូចគ្នាទៀត។ ខ្ញុំតាំងចិត្តថា យើងជាអ្នកបង្ហាញគេវិញ»។ នេះជាការអះអាងរបស់កញ្ញា គឹមស៊ី។
រយៈពេលជាច្រើនឆ្នាំ រស់នៅឆ្ងាយពីមាតុភូមិ និងផ្លាស់ពីប្រទេសមួយទៅប្រទេសមួយ គឹមស៊ី បានឆ្លងកាត់បទពិសោធន៍ជីវិតជាច្រើន មានទាំងការលំបាក និងជោគជ័យ។ ដ្បិតជោគជ័យពីមួយកម្រិតទៅមួយកម្រិត បេក្ខបណ្ឌិតផ្នែកគណិតវិទ្យារូបនេះ មិនមានមោទកភាពលើចំណេះវិជ្ជាខ្លួនពេកឡើយ ដោយនាងយល់ថា ការអភិវឌ្ឍន៍ចំណេះគឺគ្មានទីបញ្ចប់ទេ ទោះរៀនដល់កម្រិតណាក៏ដោយ។ កញ្ញា គឹមស៊ី បញ្ជាក់ដូច្នេះ៖«អត់អាចថាខ្លួនចេះ អាងខ្លួនរៀនដល់បណ្ឌិតធ្វើខ្លួន អ៊ីចេះ អ៊ីចុះ គឺអត់ល្អទេ។ ចំពោះខ្ញុំគឺមានភាពឱនលំទោនខ្លាំង ហើយគិតថាខ្លួនឯងមានការខ្វះចន្លោះច្រើន គឺត្រូវបណ្ដុះបណ្ដាលខ្លួនឯងតទៅមុខទៀត ដើម្បីឱ្យមានអនាគតល្អ»។
បញ្ហាកូវីដ-១៩ គឹមស៊ី បានត្រឡប់មកកម្ពុជាវិញ ។ ក្រៅពីកំពុងស្រាវជ្រាវនិក្ខេបបទសម្រាប់បញ្ចប់ការសិក្សា គឹមស៊ី ក៏ជាសាស្រ្តាចារ្យគណិតវិទ្យាមួយរូប នៅសកលវិទ្យាល័យ AUPP ផងដែរ។ បើតាមស្រ្តីរូបនេះ លើសពីការផ្ទេរចំណេះដឹងក្នុងអាជីពជាគ្រូបង្រៀន នាងក៏បានចែករំលែកបទពិសោធន៍នៃការសិក្សា និងជីវិត ជាពិសេសការសិក្សានៅបរទេសរបស់ខ្លួន ដើម្បីជាឧទាហរណ៍មួយ ជួយជំរុញឱ្យយុវជនជំនាន់ក្រោយ ពិសេសស្រ្តី ខំប្រឹងជម្នះឧបសគ្គនៅក្នុងជីវិត ដើម្បីឈោងចាប់ក្តីស្រមៃរបស់ខ្លួន ឬខំប្រឹងរៀនឲ្យកាន់តែខ្ពង់ខ្ពស់។
ក្នុងបទសម្ភាសជាមួយសារព័ត៌មានថ្មីៗ កញ្ញា គឹមស៊ី បានឱ្យដឹងថា សកម្មភាពជំរុញការអប់រំនៅកម្ពុជា នាងមិនឈប់ត្រឹមនេះឡើយ គឺនាងចង់ក្លាយជាចំណែកធំជាងនេះ ក្នុងការអភិវឌ្ឍន៍វិស័យអប់រំ។ ទៅថ្ងៃខាងមុខ កញ្ញា គឹមស៊ី ចង់ក្លាយជារដ្ឋមន្រ្តីក្រសួងអប់រំ ដើម្បីជាគំរូភាពដល់ស្រ្តី និងអភិវឌ្ឍន៍វិស័យអប់រំឱ្យកាន់តែរីកចម្រើន។
ទោះក្ដីសុបិនហាក់នៅឆ្ងាយ តែគឹមស៊ី កំពុងដើរឆ្ពោះទៅរកទិសដៅខ្លួន និងកំពុងដុសខាត់សមត្ថភាពតាមរយៈការសិក្សា និងការងារ។ «ការអប់រំជាចំណង់ចំណូលចិត្តខ្លាំងរបស់ខ្ញុំ។ខ្ញុំគិតថាប្រទេសនីមួយៗ ដើម្បីមានការអភិវឌ្ឍន៍ ត្រូវមានវិស័យអបរំសំខាន់ណាស់ ហើយខ្ញុំចង់ចូលរួមអភិវឌ្ឍន៍ប្រទេសកម្ពុជាយើង ដើម្បីឱ្យក្លាយជាប្រទេសមួយក្នុងចំណោមប្រទេសរីកចម្រើន។ ខ្ញុំសង្កេតឃើញថា ទោះបីយើងជាប្រទេសតូចមែន ប៉ុន្តែសមត្ថភាពកូនខ្មែរយើងប្រៀបធៀបនឹងគេ យើងអាចរៀនទាន់គេ។ អ៊ីចឹងបើ ២០ទៅ៥០ឆ្នាំទៀត ខ្ញុំជឿថាប្រទេសយើងនឹងរីកចម្រើនដូចស្រុកគេ បើសិនយើងពង្រឹងលើផ្នែកអប់រំ»។
កញ្ញាគឹមស៊ី ចាត់ទុកការអប់រំ ជាកិច្ចការអាទិភាពចម្បង។ ស្រ្តីឆ្នើមរូបនេះ បានលើកទឹកចិត្តដល់យុវជន ពិសេសស្រ្តី ត្រូវកុំងាយបាក់ទឹកចិត្ត ខិតខំពង្រីកចំណេះដឹងលើការសិក្សា ដើម្បីចូលរួមជួយសង្គម៕