Khadim Mboup អាយុ២២ឆ្នាំ ជានិស្សិតឆ្នាំទីមួយ រីឯ Gangue Dioum ដែលជាមិត្តស្រី ត្រូវប្រឡងសញ្ញាបត្រឆ្នាំសិក្សា២០២០-២០២១ ដើម្បីត្រៀមចូលសាកលវិទ្យាល័យ។ Mboup បានធ្វើដំណើរប្រមាណ២ម៉ោងពីក្រុងដាកា ឆ្ពោះទៅកាន់ក្រុង Diourbel ដើម្បីប្រឡងជំនួសមិត្តស្រីរបស់ខ្លួន។

 

គេបានពាក់រូបពណ៌ក្រហម រួមជាមួយស្បៃមុខ និងម៉ាស់ ដើម្បីបន្លំចូលប្រឡងជំនួសសង្សារខ្លួន។ នាបរិបទកូវីដ-១៩ មេប្រយោគមិនបានផ្ទៀងផ្ទាត់ពេញលេញឡើយជាពិសេសពីរថ្ងៃដំបូង។ ឈានដល់ថ្ងៃទីបីនៃការប្រឡង ពោលគឺចំម៉ោងវិញ្ញាសាភាសាអង់គ្លេស គណៈមេប្រយោគបានចាប់អារម្មណ៍ពីសម្លៀកបំពាក់ដែលខុសប្លែក ហើយបានសាកសួរ មុននឹងទាក់ទងឲ្យប៉ូលិសចាប់ខ្លួន។

 

យោងតាមការផ្សាយរបស់សារព័ត៌មាន Jeune Afrique យុវជន Mboup បានអះអាងប្រាប់ក្រុមអ្នកស៊ើបអង្កេតថា គេមានបំណងបង្ហាញពីក្តីស្រឡាញ់ស្មោះស្ម័គ្ររបស់ខ្លួនចំពោះមិត្តស្រី ដែលមិនសូវចេះភាសាអង់គ្លេស។

 

ជាមួយគ្នានេះ Dioum ដែលជាមិត្តស្រីក៏ត្រូវបានចាប់ខ្លួនផងដែរ ពីបទសមគំនិតបន្លំការប្រឡង ដោយអ្នកទាំងពីរត្រូវប្រឈមមុខចំពោះតុលាការនៅក្រុង Diourbel ផ្ទាល់។

 

រូបភាពរបស់ Mboup ត្រូវបានផ្សព្វផ្សាយពេញប្រទេសសេណេហ្គាល់ និងបណ្តាញសង្គម ហើយករណីនេះ បានធ្វើឲ្យអង្គការការពារសិទ្ធិមនុស្សនៅសេណេហ្គាល់ (Raddho) រិះគន់ក្រុមមន្ត្រីប៉ូលិសយ៉ាងខ្លាំងចំពោះការបង្ហោះរូបជាសាធារណៈ៕