សិល្បៈអន្តរជាតិ
អន្តរជាតិ
Nightbirde ដែលបានប៊ូតុងមាសពី Simon ដកខ្លួនពី AGT ដោយសារជំងឺមហារីករើឡើងវិញ 07, Aug 2021 , 8:29 am
× Jane Marczewski ដែលមានឈ្មោះសំដែងថា «Nightbirde» បានដកខ្លួនចេញពីការប្រកួតប្រជែងសមត្ថភាព America’s Got Talent (AGT) ដោយសារជំងឺមហារីកនៅក្នុងខ្លួនរើឡើងវិញ។ ម្ចាស់ប៊ូតុងមាសពីលោក Simon Cowell រូបនេះ បានប្រកាសពីការសម្រេចចិត្តរបស់ខ្លួនតាមរយៈបណ្តាញសង្គម Instagram។
Nigthbirde បានទាក់ទាញចំណាប់អារម្មណ៍មនុស្សជាច្រើននៅលើពិភពលោក ពីការប្រឹងប្រែងរបស់ខ្លួនប្រកបដោយជំនឿជាក់ក្នុងការប្រយុទ្ធប្រឆាំងនឹងជំងឺមហារីក។ ក្នុងការប្រកួតប្រជែងទេពកោសល្យ America’s Got Talent នាងបានច្រៀងបទ «It’s OK» ដែលជាស្នាដៃនិពន្ធថ្មីដោយខ្លួនឯង។ គណៈមេប្រយោគ និងអ្នកទស្សនាទាំងអស់សុទ្ធតែរំជួលចិត្ត ហើយលោក Simon Cowell បានចុចប៊ូតុងមាស ដែលនាំឲ្យបេក្ខនារីរូបនេះ ឈានទៅវគ្គផ្សាយផ្ទាល់ដោយស្វ័យប្រវត្តិ។
«ចាប់តាំងពីការប្រកួតប្រជែងមក សុខភាពរបស់ខ្ញុំស្រាប់តែវិលទៅរកស្ថានភាពអាក្រក់ ហើយការប្រយុទ្ធប្រឆាំងនឹងជំងឺមហារីក គឺត្រូវការថាមពល និងការប្រុងប្រយ័ត្នខ្ពស់ពីខ្លួនខ្ញុំផ្ទាល់»។ Nighbirde បានសរសេរយ៉ាងដូច្នេះ ដោយបន្ថែមថា៖ «ខ្ញុំសោកស្តាយណាស់ ដែលប្រកាសថា ខ្ញុំមិនអាចបន្តដំណើរទៅមុខក្នុង AGT នារដូវកាលនេះបាន»។
បច្ចុប្បន្នវ័យ៣០ឆ្នាំ Marczewski ដែលមានកំណើតនៅរដ្ឋ Ohio ត្រូវបានធ្វើរោគវិនិច្ឆ័យឃើញមានជំងឺមហារីកសុដនកាលពីឆ្នាំ២០១៧ ហើយកាលពីឆ្នាំ២០១៩ នាងទទួលការបញ្ជាក់ពីវេជ្ជបណ្ឌិតថា អាចរស់បានត្រឹមតែ៣ខែប៉ុណ្ណោះ។ បែរក្រោយនាងបានជម្នះនឹងជំងឺនេះ។
តាមឃ្លីបវីដេអូ ក្រោយទទួលបានប៊ូតុងមាសពីលោក Simon បេក្ខនារី Nightbirde បានលើកឡើងថា៖ «ក្តីសង្ឃឹម២ភាគរយ មិនមែនសូន្យភាគរយនោះឡើយ។ ២ភាគរយគឺជាអ្វីដែលត្រូវប្រឹងប្រែង»។
ការប្រកាសដកខ្លួនចេញពី AGT ដោយសារតែជំងឺមហារីកធ្វើទុក្ខសារជាថ្មីនេះ ធ្វើឲ្យក្រុមអ្នកគាំទ្រ រួមទាំងតារាល្បីៗលើពិភពលោកភ្ញាក់ផ្អើលយ៉ាងខ្លាំង ហើយពួកគេបាននាំគ្នាផ្ញើសារលើកទឹកចិត្ត Nightbirde ឲ្យបន្តភាពរឹងមាំរបស់ខ្លួន។
ក្នុង Instagram ដដែល Nightbirde បានសរសេរថា៖ «សូមនៅជាមួយខ្ញុំ ខ្ញុំនឹងប្រសើរឡើងវិញនាពេលឆាប់ៗ។ ខ្ញុំមានគម្រោងសម្រាប់អនាគតរបស់ខ្ញុំ មិនមែនជាកេរដំណែលរបស់ខ្ញុំឡើយ។ ខ្ញុំប្រឹងប្រែងបន្តប្រយុទ្ធ ព្រោះខ្ញុំនៅតែមានក្តីសុបិន្ត»៕
© រក្សាសិទ្ធិដោយ thmeythmey.com