ការឈ្នះមេដាយមាសអូឡាំពិកជាប្រវត្តិសាស្ត្រសម្រាប់ហ្វីលីពីន បានកែប្រែជីវិតរបស់កីឡាការិនីលើកទម្ងន់ Hidilyn Diaz យ៉ាងខ្លាំង។ ក្រៅពីប្រាក់រង្វាន់សន្ធឹកសន្ធាប់ វីរនារីហ្វីលីពីនរូបនេះ ទទួលបានជាបន្តបន្ទាប់នូវ រថយន្ត២គ្រឿង និងចុងក្រោយម៉ូតូ១គ្រឿងទៀត ដោយតែគាត់បានអះអាង មិនចេះបើកបររថយន្តស្ទាត់ជំនាញនោះឡើយ។
ក្រុមហ៊ុន Kia Philippines បានប្រគល់រថយន្ត Kia Stonic ពណ៌មាស ដល់ Hidilyn Diaz ដែលត្រូវបាន ចាត់ទុកថាជានារីមាស (Golden Girl) របស់ហ្វីលីពីន។ បន្ទាប់មក ក្រុមហ៊ុនក្នុងស្រុក United Asia Automotive Group (UAAGI) បានជូនរថយន្ត Foton TransVan ១៣កៅអី មួយបន្ថែមទៀត។
ក្នុងបទសម្ភាសជាមួយសារព័ត៌មានយានយន្ត Top Bikes Philippines កីឡាការិនី Diaz បានអះអាងថា គាត់មិនសូវចេះបើកបររថយន្តនោះឡើយ ហើយតាមទម្លាប់កន្លងមក គាត់ប្រើប្រាស់ម៉ូតូសម្រាប់ការធ្វើដំណើរ ជាពិសេសក្នុងដំណើរទៅមកពីផ្ទះនៅក្រុង Zamboanga និងកន្លែងហ្វឹកហាត់។
ដើម្បីសម្រួលដល់ការធ្វើដំណើររបស់កីឡាការិនីរូបនេះ ក្រុមហ៊ុន Suzuki Philippines បានប្រគល់ជូនម៉ូតូ Skydrive Sport ពណ៌ខៀវចាស់មួយគ្រឿងទៀត។ «ខ្ញុំជ្រើសរើសពណ៌នេះ ដោយខ្លួនឯង ខ្ញុំចូលចិត្តវា»។ នេះជាការបញ្ជាក់របស់ Diaz ទាក់ទងនឹងពណ៌តំណាងឲ្យម៉ូដែលឆ្នាំ២០២១។
ទោះបីជាយ៉ាងណាក៏ដោយ Diaz ត្រូវបានលើកទឹកចិត្តឲ្យរៀនបើករថយន្តស្ទាត់ជំនាញ ខណៈក្រុមហ៊ុន Kia ជាអ្នករាប់រងលើការបង្រៀនបើក Kia Stonic ដោយផ្ទាល់របស់នាង។
ក្រុមហ៊ុនប្រេងឥន្ទនៈ Phoenix Petroleum បានសន្យាផ្គត់ផ្គង់ប្រេងសាំង រីឯក្រុមហ៊ុន AirAsia ក៏បានសំបុត្រយន្តហោះដោយឥតគិតថ្លៃ ពេញមួយជីវិតផងដែរ។ ជ័យលាភីមេដាយផ្សេងទៀតរបស់ហ្វីលីពីន
បណ្តាប្រទេសផ្សេងទៀតសុទ្ធតែបានផ្តល់រង្វាន់រថយន្តដល់ជ័យលាភីមេដាយរបស់ខ្លួន ជាពិសេសមេដាយមាស និងមេដាយណាមួយដែលប្រទេសទទួលបានជាប្រវត្តិសាស្ត្រ។ តួកមេនីស្ថាន បានផ្តល់រថយន្តមួយគ្រឿងដល់កីឡាការិនីលើកទម្ងន់ Polina Guryeva ដែលបានឈ្នះមេដាយប្រាក់ជាប្រវត្តិសាស្ត្រសម្រាប់ប្រទេសជាតិ។
នៅគូវែត កីឡាករបាញ់កំភ្លើង Adbullah Al-Rashidi ដែលឈ្នះតែមេដាយសំរឹទ្ធ១គត់ បានទទួលរថយន្ត Volvo ស៊េរីថ្មី ដែលផ្តល់ដោយក្រុមហ៊ុន BNK Automotive ដែលជាតំណាងចែកចាយ Volvo ប្រចាំប្រទេស។ នៅអ៊ូហ្កង់ដា ជ័យលាភីមេដាយទាំងអស់ បានរថយន្តពីប្រធានាធិបតី។
ឥណ្ឌា និងចិន ក៏ស្ថិតក្នុងចំណោមប្រទេសដែលផ្តល់រថយន្តដល់ជ័យលាភីមេដាយអូឡាំពិកផងដែរ ក្រៅពីប្រាក់រង្វាន់ដ៏ច្រើនសន្ធឹកសន្ធាប់៕