ដោយ៖ សុង សុធាវី  
 

 

 

 

ដើមឡើយ អ្នកស្រី ឃួន សុជាតា ធ្លាប់ជាអ្នកលក់ឡេ បុគ្គលិកអង្គការ និងធ្លាប់ជាលេខានៅក្នុងស្ថាប័នព័ត៌មានមួយកន្លែង។ ប៉ុន្តែក្រោយមក អ្នកស្រី ក៏សម្រេចចិត្តប្រឡូកក្នុងការងាររកស៊ីផ្នែកអចលនទ្រព្យ ជាមួយស្វាមីដើម្បីរៀនពីបទពិសោធន៍ថ្មីៗនៅក្នុងវិស័យនេះ។ ធ្វើការបណ្តើរ រៀន និងដកយកបទពិសោធន៍ ក្នុងវិស័យនេះបណ្តើរ បច្ចុប្បន្ន អ្នកស្រី សុជាតា ដែលមានពិការភាពតាំងពីកំណើត កំពុងដឹកនាំការងារលក់ដីឡូត៍ក្នុងក្រុមហ៊ុនបំណក់អេកូផាក ដែលមានទីតាំងនៅខេត្តពោធិ៍សាត់ ក្នុងតូនាទីជានាយិការប្រតិបត្តិ។

 

សហគ្រិនស្រ្តីរូបនេះ បញ្ជាក់ថា៖«បច្ចប្បន្នខ្ញុំមកជាចំណែកដឹកនាំ នៅបំណក់អេកូផាកនេះ ដោយសារចង់ជួយការងារស្វាមី រៀនពីបទពិសោធន៍ថ្មី ព្យាយាមកែតម្រូវបន្ថែម បង្កើតគំនិតច្នៃប្រឌិត បែងចែកពេលវេលាឱ្យ ច្បាស់ លាស់ និងមានភាពបត់បែនជានិច្ច ក្នុងអាជីពមុខរបរ»។

 

ក្នុងនាមជាអ្នកជំនាញក្នុងវិស័យអចលទ្រព្យមួយរូប អ្នកស្រី ឃួន សុជាតា បញ្ជាក់ថា ការស្គាល់ច្បាស់ពីសក្តានុពលនៃអចលទ្រព្យដែលខ្លួនកំពុងផ្សព្វផ្សាយលក់ ភាពស្មោះត្រង់នឹងអតិថិជន គឺជាចំណុចគន្លឹះនៃការបង្កើនការលក់អចលទ្រព្យរបស់ក្រុមហ៊ុនអ្នកស្រី។ លើសពីនេះ អ្នកស្រីក៏មិនភ្លេចហ្វឹកហាត់បុគ្គលិកផ្នែកលក់របស់ខ្លួន ឱ្យមានសុជីវធម៌ និងរក្សាសីលធម៌ នៅក្នុងទំនាក់ទំនងជាមួយអតិថិជនផងដែរ៕