ជាតិ
សេដ្ឋកិច្ច
កម្ពុជា-កូរ៉េ នឹងចុះកិច្ចព្រមព្រៀងពាណិជ្ជកម្មសេរីជាផ្លូវការនៅ ខែតុលា ឆ្នាំ២០២១
09, Sep 2021 , 4:16 pm
លោក ប្រាក់ សុខុន (ឆ្វេង) កំពុងឈរថតរូបជាមួយលោក លោក ឆុង អើយយ៉ុង រដ្ឋមន្ត្រីការបរទេសនៃសាធារណរដ្ឋកូរ៉េ។ រូបថត៖ លោក ប្រាក់ សុខុន
×![]()
ភ្នំពេញ៖ កម្ពុជា-សាធារណរដ្ឋកូរ៉េ នឹងចុះកិច្ចព្រមព្រៀងពាណិជ្ជកម្មសេរីជាផ្លូវការ (CKFTA) នៅដើមខែតុលា ឆ្នាំ២០២១។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។ CKFTA នឹងក្លាយជាកិច្ចព្រមព្រៀងពាណិជ្ជកម្មសេរីទី២ បន្ទាប់ពី CCFTA រវាងកម្ពុជា និងចិន។
កិច្ចព្រមព្រៀងពាណិជ្ជកម្មសេរីរវាងកម្ពុជា និងប្រទេសកូរ៉េខាងត្បូង(CKFTA) នឹងចូលជាធរមាននៅក្នុងអំឡុងខែតុលា ឆ្នាំ២០២១ បន្ទាប់ពីរដ្ឋមន្ត្រីពាណិជ្ជកម្មប្រទេសទាំងពីរបានប្រកាសបញ្ចប់ការចរចាជាផ្លូវការ កាលពីព្រឹកថ្ងៃទី៣កុម្ភៈ។ គម្រោងនៃការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េនេះ ត្រូវបានលើកក្នុងដំណើរទស្សនកិច្ចជាផ្លូវការ របស់លោក ប្រាក់ សុខុន រដ្ឋមន្រ្តីក្រសួងការបរទេស នៅសាធារណរដ្ឋកូរ៉េ ពីថ្ងៃទី៦-៨កញ្ញា។
ដំណើរទស្សនកិច្ច៣ថ្ងៃមកនេះ លោក ប្រាក់ សុខុន គឺបានជួបពិភាក្សាការងារ ជាមួយលោក លោក ឆុង អើយយ៉ុង ដែលជារដ្ឋមន្ត្រីការបរទេសនៃសាធារណរដ្ឋកូរ៉េ។ សេចក្តីប្រកាសព័ត៌មានរបស់ក្រសួងបរទេស បានបញ្ជាក់ដូច្នេះ៖« រដ្ឋមន្ត្រីការបរទេសទាំងពីរ គឺមានសុទិដ្ឋិនិយមថា កិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ ដែលនឹងត្រូវចុះហត្ថលេខា នៅដើមខែតុលា[ឆ្នាំ២០២១] នឹងជួយជំរុញពាណិជ្ជកម្ម និងការវិនិយោគទ្វេភាគីបន្ថែមទៀត ព្រមទាំងជួយពន្លឿន ការស្តារសេដ្ឋកិច្ចនៃប្រទេសទាំងពីរឡើងវិញ ក្រោយវិបត្តិកូវីដ-១៩»។
កម្ពុជា គឺជាគោលដៅនាំចេញទី៦០ របស់កូរ៉េខាងត្បូង ដែលមានទំនិញសំខាន់ៗ ដូចជា៖ ភេសជ្ជៈ គ្រឿងអេឡិចត្រូនិក ឱសថ និងរថយន្តដឹកទំនិញ។ ចំណែកឯ កម្ពុជាវិញ បាននាំទំនិញទៅកូរ៉េខាងត្បូង ភាគច្រើន គឺជាសម្លៀកបំពាក់ និងផលិតផលស្បែកជើង កាបូប ជាដើម។
នៅក្រោមកិច្ចព្រមព្រៀង CKFTA និងកិច្ចព្រមព្រៀង RCEP កម្ពុជា នឹងលើកលែងពន្ធប្រមាណ ៩៣,៨ភាគរយ នៃផលិតផលនាំចូលពីកូរ៉េខាងត្បូង ហើយកូរ៉េខាងត្បូង នឹងលើកលែងពន្ធប្រមាណ ៩៥,៦ភាគរយ លើផលិផលរបស់កម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្មកន្លងមក។
របាយការណ៍ពីក្រសួងពាណិជ្ជកម្ម បានបង្ហាញថា ទំហំពាណិជ្ជកម្មកម្ពុជា-កូរ៉េ ក្នុងឆ្នាំ២០១៩ មានប្រមាណ ១ ០៣២ លានដុល្លារ។ ទំហំពាណិជ្ជកម្មនេះ បានកើនឡើងជិត២០ភាគរយ បើធៀបនឹងឆ្នាំ២០១៨ និងកើនឡើង ២៥៤ភាគរយ បើធៀបនឹងឆ្នាំ២០០៩ ដែលមានប្រមាណ ២៩១ លានដុល្លា។ ដោយឡែកនៅក្នុងឆ្នាំ២០២០ ទំហំពាណិជ្ជកម្មទ្វេភាគីរវាងប្រទេសទាំងពីរ គឺសម្រេចបានជាង៨៨៥លានដុល្លារប៉ុណ្ណោះ ពោលគឺមានការថយចុះប្រមាណ ១៨ភាគរយ ធៀបនឹងឆ្នាំ២០១៩។
សូមជម្រាបថា ក្រៅពីប្រទេសចិន និងសាធារណរដ្ឋកូរ៉េ រដ្ឋាភិបាលកម្ពុជា ក៏បានបង្កើតក្រុមការងារជំនាញ ដើម្បីសិក្សា និងរៀបចំគោលនយោបាយយុទ្ធសាស្ត្រចរចា ក្នុងការបង្កើតកិច្ចព្រមព្រៀងពាណិជ្ជកម្មសេរី ជាមួយប្រទេសធំៗគោលដៅចំនួន៦ទៀតដែរ ក្នុងនោះមានសហភាពសេដ្ឋកិច្ចអឺរ៉ាស៊ី (EAEU) ជាអង្គការសមាហរណកម្មថ្នាក់តំបន់នៅអាស៊ីខាងលិច អាស៊ីខាងកើត និងអាស៊ីកណ្តាល, ប្រទេសអង់គ្លេស អាម៉េរិក ជប៉ុន ម៉ុងហ្គោលី និងឥណ្ឌា៕
Tag:
ពាណិជ្ជកម្ម
CKFTA
លោក ប្រាក់ សុខុន
© រក្សាសិទ្ធិដោយ thmeythmey.com
