ពលរដ្ឋជាច្រើននាក់ បានបង្ហោះសារចូលទៅកាន់ទំព័រហ្វេសប៊ុករបស់សម្ដេច ហ៊ុន សែន ដោយរៀបរាប់ពីបញ្ហាខ្លួន ជាមួយក្រុមហ៊ុន GoldFX Investment ។ ពួកគេសុទ្ធតែអះអាងថា ក្រុមហ៊ុន មិនទាន់ផ្ដល់ដំណោះស្រាយសមរម្យសម្រាប់ពួកគេឡើយ។ ពួកគេទាំងនោះ ស្នើឱ្យនាយករដ្ឋមន្រ្តី ហ៊ុន សែន អន្តរាគមន៍រកយុត្តិធម៌ឱ្យពួកគេ ក្នុងករណីនេះ។
 

ក្រោយឃើញពលរដ្ឋសុំអន្តរាគមន៍ច្រើននេះ សម្ដេច ហ៊ុន សែន ក៏បានប្រាប់ពួកគេវិញ ពីដំណោះស្រាយនៅតាមផ្លូវតុលាការ។ ប្រមុខរដ្ឋាភិបាល បានឆ្លើយតបសារពលរដ្ឋទាំងនោះ តាមរយៈទំព័រហ្វេសប៊ុកផ្លូវការខ្លួនថា៖«ដោយសារបងប្អូនបានចូលមកនិយាយប្រាប់ខ្ញុំច្រើនដងហើយ ដែលល្មមដល់ពេលខ្ញុំត្រូវឆ្លើយតបដោយខ្លីថា សូមបងប្អូនបន្តសម្រុះសម្រួលគ្នា ព្រោះបងប្អូនស្មគ្រ័ចិត្តរកស៊ីជាមួយគ្នា។ក្នុងករណីរកការស្រុះស្រួលមិនបាន សុំដាក់ពាក្យបណ្តឹងទៅកាន់តុលាការ»។


 

សំណុំរឿងពលរដ្ឋ ដែលដាក់ទុនរកស៊ីជាមួយក្រុមហ៊ុន GoldFX Investment បានអូសបន្លាយជាង ៦ខែហើយ ក្រោយពីក្រុមហ៊ុន ដែលជាឈ្មួញជើងសាឧបករណ៍និស្សន្ទពីនិយ័តករមូលបត្រកម្ពុជានេះ ធ្វើឱ្យបាត់ប្រាក់វិនិយោគរបស់អតិថិជនប្រមាណ៣០លានដុល្លារ។ បន្ទាប់ពីមានបញ្ហានេះ ក្រុមហ៊ុន GoldFX Investment បានសម្របសម្រួលទូទាត់ប្រាក់ឱ្យអតិថិជនវិញ តែ៣០ភាគរយនៃប្រាក់ដើមរបស់ពួកគេប៉ុណ្ណោះ។ ប៉ុន្តែអតិថិជន ឬវិនិយោគិន ដែលជាជនរងគ្រោះ នៅរក្សាជំហរក្នុងការទាមទារប្រាក់ដើម១០០ភាគរយមកវិញ ដើម្បីយកមកផ្គត់ផ្គង់ជីវភាព និងទូទាត់សងធនាគារ។ អតិជន ឬវិនិយោគិនរងគ្រោះ ទាំងនោះ មានប្រមាណ៣ពាន់នាក់។
 

ដោយសារឃើញបញ្ហានេះ ផ្ទុះឡើងខ្លាំងនោះ ទើបនិយ័តករមូលបត្រកម្ពុជាកន្លងមក បានបង្គាប់ឱ្យក្រុមហ៊ុន GoldFX Investment (GFX) ចូលខ្លួនដោះស្រាយបន្ទាន់ជាមួយវិនិយោគិននិងអតិថិជនទាំងនេះ។
 

សារព័ត៌មានថ្មីៗ មិនទាន់អាចទាក់ទងលោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា ដើម្បីសុំការអត្ថាធិប្បាយលើករណីដោះស្រាយបញ្ហាពលរដ្ឋ និងក្រុមហ៊ុន GFX បាននៅឡើយទេ នាថ្ងៃទី១៥ កញ្ញានេះ។
 

តែយ៉ាងណានិយ័តករមូលបត្រកម្ពុជា (ន.ម.ក.) ធ្លាប់បានអះអាងថា ខ្លួនបានធ្វើនីតិវិធីច្បាប់ជាមួយស្ថាប័នអយ្យការ ដោយស្នើសុំឱ្យមានការស៊ើបអង្កេតបន្ថែមលើប្រតិបត្តិការសង្ស័យរបស់ក្រុមហ៊ុន GoldFX Investment និងបញ្ចូលការដោះស្រាយពាក្យបណ្ដឹងទាំងអស់ ដែលប្តឹងជាមួយសំណុំរឿងព្រហ្មទណ្ឌពាក់ព័ន្ធករណីនេះ។
 

ខណៈកំពុងធ្វើនីតិវិធីច្បាប់ជាមួយស្ថាប័នអយ្យការនេះ និយ័តករមូលបត្រកម្ពុជា ក៏ទទួលបានពាក្យបណ្តឹងជិត៨០០ ពីអតិថិជន ប្ដឹងក្រុមហ៊ុន GoldFX Investment ដើម្បីទាមទារប្រាក់ដើមមកវិញ គិតត្រឹមថ្ងៃទី១៦ កក្កដា ឆ្នាំ២០២១ ៕