«ធុរកិច្ចរបស់ព្រះអង្គម្ចាស់ នរោត្តម រ៉ាវីចក្រ គឺជាការវិនិយោគជាលក្ខណៈឯកជនសុទ្ធសាធ ហើយមិនមានពាក់ព័ន្ធនឹងបុគ្គល ឬស្ថាប័នណាមួយនៅក្នុងប្រទេសកម្ពុជា ក្រៅពីព្រះអង្គម្ចាស់ផ្ទាល់»។ នេះជាការបញ្ជាក់របស់សម្តេចព្រះមហិស្សរា នរោត្តម ច័ក្រពង្ស់។

 

ដូចក្នុងសេចក្តីប្រកាសព័ត៌មានរបស់ក្រសួងព្រះបរមរាជវាំង កាលពីថ្ងៃទី២០ ខែកញ្ញា ផងដែរ សម្តេច ច័ក្រពង្ស់ បានឆ្លើយតបទៅនឹងការផ្សាយរបស់សារព័ត៌មានអន្តរជាតិ ដោយភ្ជាប់គោរមងារ «រជ្ជទាយាទ» (Prince Heritier ជាភាសាបារាំង ឬ Crown Prince ជាភាសាអង់គ្លេស) សម្រាប់ព្រះអង្គម្ចាស់ នរោត្តម រ៉ាវីចក្រ។

 

«បុត្រាខ្ញុំ ព្រះអង្គម្ចាស់ នរោត្តម រ៉ាវីចក្រ ជាកូនទី៨របស់ខ្ញុំ និងជាព្រះអង្គម្ចាស់មួយអង្គក្នុងចំណោមព្រះអង្គម្ចាស់ខ្មែរជាច្រើនព្រះអង្គទៀតក្នុងរាជវង្សានុវង្ស។ គ្មានព្រះអង្គម្ចាស់កម្ពុជាណា ដែលត្រូវបានតែងតាំងជាព្រះអង្គម្ចាស់គ្រប់គ្រងរាជសម្បត្តិបន្ត ឬទទួលគោរមងារ ព្រះរជ្ជទាយាទ ដែលមិនធ្លាប់មាននៅក្នុងព្រះរាជាណាចក្រកម្ពុជាឡើយ»។

 

ជាមួយគ្នានេះ សម្តេចព្រះមហិស្សរា បានស្នើសុំចំពោះសារព័ត៌មានអន្តរជាតិចៀសវាងការផ្សព្វផ្សាយព័ត៌មានដែលអាចប៉ះពាល់ដល់កិត្តិយស និងសេចក្តីថ្លែថ្នូនៃរបបរាជានិយមកម្ពុជា។

 

ព័ត៌មាននៃការដាក់សំណើរទិញក្លិប Saint-Etienne នៃក្របខណ្ឌកំពូល Ligue 1 របស់បារាំង ពីសំណាក់ព្រះអង្គម្ចាស់នរោត្តម រ៉ាវីចក្រ ត្រូវបានផ្សព្វផ្សាយដំបូងដោយកាសែតបារាំង Le Parisien។ កាសែតបានលើកឡើងពីទឹកប្រាក់ចំនួន១០០លានអឺរ៉ូ។

 

ព្រះអង្គម្ចាស់ នរោត្តម ពុទ្ធពង្ស ដែលជាបុត្រាច្បងរបស់សម្តេច នរោត្តម ច័ក្រពង្ស់ បានអះអាងប្រាប់ ហិរញ្ញវត្ថុធុរកិច្ចនេះ គឺ​ធ្វើ​ជាមួយដៃគូនៅអឺរ៉ុបសុទ្ធសាធ គ្មានអ្វីពាក់ព័ន្ធនឹងនយោបាយនៅកម្ពុជា ឬចិននៅពីក្រោយ ដូចជាការលើកឡើងរបស់មនុស្សមួយចំនួននោះឡើយ»។

 

ព្រះអង្គ បានបញ្ជាក់បន្ថែមថា៖ «ព័ត៌មានលម្អិតផ្សេងៗ មានតែប្អូនខ្ញុំ Titi [ព្រះនាមក្រៅរបស់ព្រះអង្គម្ចាស់ នរោត្តម រ៉ាវីចក្រ] ប៉ុណ្ណោះ ដែលអាចបញ្ជាក់បាន ប៉ុន្តែបច្ចុប្បន្ន គាត់មមាញឹកខ្លាំងលើកិច្ចការនេះ»៕