ជាតិ
សេដ្ឋកិច្ច
លោក គង់ វិបុល ដកអាជ្ញាប័ណ្ណភ្នាក់ងារសេវាកម្មពន្ធដារពីក្រុមហ៊ុនមួយដែលលួចបន្លំប្រាក់ពន្ធរដ្ឋ 06, Apr 2022 , 11:06 am
លោក គង់ វិបុល អគ្គនាយកនៃអគ្គនាយកដ្ឋានពន្ធដារ។ រូបថត៖ GDT
× ភ្នំពេញ៖ អគ្គនាយកពន្ធដារ លោក គង់ វិបុល បានដកអាជ្ញាប័ណ្ណភ្នាក់ងារសេវាកម្មពន្ធដារ ពីក្រុមហ៊ុន ហ្វេតថាក់ ប៊ីហ្សនេស សឺលូសិន ឯ.ក (FEDTAX BUSINESS SOLUTION CO.,LTD) ព្រោះតែក្រុមហ៊ុននេះ បានកេងបន្លំប្រាក់ពន្ធសា្ថប័នរដ្ឋ និងផ្តល់សេវាមិនត្រឹមត្រូវ ដែលនាំឱ្យអតិថិជនប្រព្រឹត្តខុសច្បាប់ និងបទបញ្ញត្តិនានា ស្តីពីពន្ធដារ។
ក្រុមហ៊ុន FEDTAX BUSINESS SOLUTION ដែលបានប្រព្រឹត្តល្មើសច្បាប់ និងបទប្បញ្ញត្តិនានាស្តីពីពន្ធដារ ត្រូវបានអគ្គនាយកដ្ឋានពន្ធដារ សម្រេចដកអាជ្ញាប័ណ្ណភ្នាក់ងារសេវាកម្មពន្ធដារ នាថ្ងៃទី៥ មេសា ឆ្នាំ២០២២។ បើតាមសេចក្តីជូនដំណឹងរបស់អគ្គនាយកដ្ឋានពន្ធដារ ក្រុមហ៊ុននេះបានកេងបន្លំប្រាក់ពន្ធរបស់រដ្ឋ និងអតិថិជន រួមទាំងមានចេតនា ធ្វើឱ្យរាំងស្ទះដល់ការកំណត់ និងការប្រមូលពន្ធជាតិទៀត។
លោក គង់ វិបុល អគ្គនាយកនៃអគ្គនាយកដ្ឋានពន្ធដារ បានបញ្ជាក់ក្នុងសេចក្តីជូនដំណឹងថា ក្រុមហ៊ុន FEDTAX BUSINESS SOLUTION បានផ្តល់សេវាមិនត្រឹមត្រូវ ដែលនាំឱ្យអតិជនប្រព្រឹត្តខុសច្បាប់ និងបទបញ្ញត្តិនានាស្តីពីពន្ធដារ, ធ្វើសកម្មភាពលួចបន្លំប្រាក់ពន្ធ, ធ្វើការជាមួយរដ្ឋបាលសារពើពន្ធប្រកបដោយភាពមិនស្មោះត្រង់ និងមិនចូលរួមចំណែកទប់ស្កាត់បទល្មើសកេងបន្លំប្រាក់ពន្ធ តាមរយៈការផ្តល់ព័ត៌មានដល់រដ្ឋបាលសារពើពន្ធ។ លើសពីនេះ ក្រុមហ៊ុននេះ ក៏មិនប្រកាស និងបង់ពន្ធក្រុមហ៊ុនខ្លួនឯងឱ្យបានត្រឹមត្រូវ តាមច្បាប់ និងបទប្បញ្ញត្តិ និងផ្តល់សេវាប្រកាសពន្ធឱ្យអតិថិជន គឺមានពុំមានវិជ្ជាជីវៈ និងសុចរិតភាពថែមទៀត។
កាលពីថ្ងៃទី១៧ មីនា លោក គង់ វិបុល លើកឡើងថា កម្លាំងមានសមត្ថកិច្ច ចាប់បានជនខិលខូចមួយក្រុម ដែលបានបន្លំប្រាក់ពន្ធជាតិ ជិត៩០លានដុល្លារ តាមរយៈការស៊ីឈ្មួលឈរឈ្មោះបើកក្រុមហ៊ុន បង្កើតវិក្កយបត្រខ្យល់ ដើម្បីកាត់កង និងកេងបន្លំពន្ធរដ្ឋ។ ប្រតិភូរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដាររូបនេះ បានអះអាងថា៖ «ការក្លែងបន្លំប្រាក់ពន្ធរដ្ឋនេះ គឺមានពាក់ព័ន្ធនឹងជនជាតិចិន ដោយក្រុមបក្ខពួកទាំងនោះ បានចេញវិក្កយបត្រចំនួន៩៩២ ដែលមានទឹកប្រាក់ពន្ធ៨៩លានដុល្លារ» ។
ជាមួយនេះ លោក គង់ វិបុល បានអំពាវនាវដល់ភ្នាក់ងារផ្តល់សេវាកម្មពន្ធដារ ក៏ដូចជាសហគ្រាសទាំងអស់ ដែលមានជាប់ព័ន្ធពាក់នឹងការក្លែងបន្លំឯកសារ ដើម្បីគេចវេះពន្ធ ឱ្យដកខ្លួន និងអនុវត្តឱ្យបានត្រឹមត្រូវ ចៀសវាងការរងទោសទណ្ឌផ្សេងៗ៕
© រក្សាសិទ្ធិដោយ thmeythmey.com