សៀមរាប៖ ហាង Antique Cambodia នៅក្រុងសៀមរាប លក់សម្ភារចាស់ៗ ដែលស្ទើតែទាំងអស់ត្រូវនាំចូលពីប្រទេសជប៉ុន។ ហាងនេះក៏មានទិញ-លក់រថយន្ដដែរ ជាពិសេសឡានដែលមានអាយុកាលចាប់ពី៣០ឆ្នាំឡើងទៅ។ ភាគច្រើន ជារថយន្ដបង្វិលកង់ទាំង៤។ ប៉ុន្តែក៏មានឡានផ្សេងដែរ ដូចជាម៉ាក MERCEDES-BENZ ប្រភេទ W123 ម៉ូឌែល 300D ពណ៌ប្រផេះ មួយគ្រឿង ដែលមានអាយុកាល៤០ឆ្នាំហើយ។ គឺជាប្រភេទ W123 ជំនាន់ទី២។ វាមានផ្លាកលេខភ្នំពេញ ក៏ប៉ុន្តែម្ចាស់ហាងលក់វត្ថុបុរាណនេះ បានទិញវាពីខេត្តបាត់ដំបងមក។ ម្ចាស់មុនបានទុកវាចោលរយៈពេលពី៦ ទៅ៨ឆ្នាំ ក្នុងព្រៃ ដែលធ្វើឱ្យវាជិះមិនកើតទេ។
ដើម្បីជ្រាបច្បាស់សូមលោកអ្នកនាង ទស្សនាបទយកការណ៍ ដែលរៀបចំដោយ នាយ យ៉ាន នៃសារព័ត៌មានថ្មីៗ ដូចតទៅ៖
VIDEO
យ៉ាងណាក៏ដោយ ម្ចាស់ហាង Antique Cambodia មានបំណងធ្វើឱ្យវាអាចជិះបាន។ មិនត្រឹមតែប៉ាននេះទេ គាត់ចង់ធ្វើទំនើបកម្មតែម្ដង ដើម្បីរថយន្ដនេះស្អាតដូចដើម។ អាស្រ័យតាមប្រភេទឡាន និងឆ្នាំផលិត ជួសជុលរថយន្ដមួយគ្រឿងទាំងមូល ត្រូវចំណាយប្រមាណពី២០លាន ទៅ៤០លានរៀល។ អ្វីដែលថ្លៃណាស់ក្នុងប្រទេស គឺនាំចូលគ្រឿងបន្លាស់បុរាណ ដែលពិបាកឃើញពីបរទេសមក ពីព្រោះគ្រឿងខ្លះធ្ងន់ណាស់ ហើយក៏ត្រូវបង់ពន្ធថែមទៀត។
ប្រសិនបើគិតទាំង S123 (គូទវែង) F123 (គូទវែងណាស់) C123 (ទ្វារ២) និង V123 (សាស៊ីវែង) MERCEDES-BENZ ប្រភេទ 123 ត្រូវបានផលិតអស់ ២ ៦៩៦ ៩១៥ គ្រឿង ពីឆ្នាំ១៩៧៥ ដល់ឆ្នាំ១៩៨៦។ ក៏ប៉ុន្តែម៉ូឌែល 300D ត្រូវបានឈប់ផលិតឆ្នាំ១៩៨៥។ ទាំងអស់មាន៣ជំនាន់។ ជំនាន់ទី២ ត្រូវបានផលិតពីចុងឆ្នាំ១៩៧៩ ដល់ឆ្នាំ១៩៨២។
MERCEDES-BENZ ជាក្រុមហ៊ុនអាល្លឺម៉ង់ បង្កើតឡើង ឆ្នាំ១៩២៦ ដោយលោក DAIMLER Paul លោក BENZ Carl និងលោក JELLINEK Emil ដែលកូនស្រីឈ្មោះ Mercédès ។ បច្ចុប្បន្នគឺជាកម្មសិទ្ធរបស់ក្រុមសម្ភ័ន្ធ DAIMLERCHRYSLER ។
ហាង Antique Cambodia ក៏លក់ទោចក្រយានយន្ដបុរាណដែរ។ ក្នុងនោះ មានកង់ម៉ាស៊ីនជាច្រើនគួរសម ជាពិសេសម៉ាក VÉLOSOLEX ។ ពេលនេះមាន VÉLOSOLEX ប្រភេទ 3800 ពណ៌ខ្មៅ មួយគ្រឿង។ វាមានអាយុកាល៥០ឆ្នាំហើយ។ វាមានកំលាំងម៉ាស៊ីន ៤៩CC ។
VÉLOSOLEX 3800 គឺជាប្រភេទ VÉLOSOLEX ដែលពេញនិយមជាងគេ។ ត្រូវបានផលិតវាពីឆ្នាំ១៩៦៦ រហូតដល់ឆ្នាំ១៩៨៨។ វាមានទំងន់ក្រោម ៣០គីឡូក្រាម។ ទោះបីជាមិនប្រើកំលាំងជើងក៏ដោយ វាអាចជិះបានដល់ល្បឿន៣៥គីឡូម៉ែត្រក្នុងមួយម៉ោង។ ឆ្នាំ១៩៧៤ ក្រុមហ៊ុន MOTOBÉCANE ទិញក្រុមហ៊ុន SOLEX វិញ។ ពីដំបូង រហូតដល់ឆ្នាំ១៩៧៤ SOLEX បានផលិត VÉLOSOLEX 3800 អស់ជាង១លានគ្រឿង!
តាំងពីឆ្នាំ១៩៦៧ រហូតដល់សព្វថ្ងៃនេះ នៅទីក្រុងរែន ប្រទេសបារាំង មានព្រឹត្តិការណ៍ជិះកង់ម៉ាស៊ីន VÉLOSOLEX ប្រណាំង! កីឡាករប្រណាំងបែកចែកតាម VÉLOSOLEX គ្រឿងពីដើមទាំងអស់ (៤០គីឡូម៉ែត្រក្នុង១ម៉ោង) គ្រឿងពីដើមខ្លះ កែច្នៃបន្តិច និងកែច្នៃទាំងស្រុង (១០០គីឡូម៉ែត្រក្នុង១ម៉ោង)។
នៅឥណ្ឌូចិន មាន VÉLOSOLEX តាំងពីក្រុមហ៊ុនបារាំង Jean Comte ចាប់ផ្ដើមនាំចូល ប្រភេទ 45CC ឆ្នាំ១៩៥០។ រហូតដល់ឆ្នាំ១៩៧៥ ក្រុមហ៊ុន Jean Comte ចែកចាយកង់ម៉ាស៊ីន VÉLOSOLEX ដោយមានហាងផ្សេងៗ ជាពិសេសនៅប្រទេសកម្ពុជា ស្ថិតនៅផ្ទះលេខ១១ មហាវិថី Doudard de la Grée (បច្ចុប្បន្ន ព្រះនរោត្តម) រាជធានីភ្នំពេញ។ សម័យនោះ ក៏មានហាងមួយទៀតរបស់ម្ចាស់តែមួយផ្លាកយីហោ PHNOM PENH CYCLES ផ្ទះលេខ៧២ វិថីចន្ទរាជា (ផ្លូវ១៥)។
ត្រូវបានផលិត VÉLOSOLEX ពីឆ្នាំ១៩៤៦ រហូតដល់ឆ្នាំ១៩៨៨។ ឆ្នាំ២០១០ ត្រូវបានបង្កើត e-Solex ដែលជាប្រភេទកង់អគ្គិសនី។ ឆ្នាំ២០១១ ត្រូវបានបង្កើត Solexity ដែលជាប្រភេទកង់អគ្គិសនីដូចគ្នា។ ក្រុមហ៊ុន SOLEX ត្រូវបានបង្កើតឡើងនៅប្រទេសបារាំង ឆ្នាំ១៩០៥ និងរំលាយឆ្នាំ២០១៩។ កាលពីដំបូង SOLEX ផលិតតែគ្រឿងម៉ាស៊ីនប៉ុណ្ណោះ។ សូមបញ្ជាក់ថាពាក្យ vélo មានន័យថា កង់៕
អត្ថបទទាក់ទង នឹង MERCEDES-BENZ W123 300D :