ជាតិ
ក្រសួងវប្បធម៌ នឹងរៀបចំសិក្ខាសាលាស្ដីពីវឌ្ឍនភាព ៤ឆ្នាំ នៃល្ខោនខោលកម្ពុជា ក្រោយចុះបញ្ជីយូណេស្កូ 13, Aug 2022 , 3:29 pm
×
ដោយ៖ សែម ប្រាក់ដាវ
ភ្នំពេញ៖ ក្រសួងវប្បធម៌ និងវិចិត្រសិល្បៈ រៀបចំសិក្ខាសាលាអំពី «ល្ខោនខោលកម្ពុជា» ដើម្បីរៀបចំរបាយការណ៍ ៤ឆ្នាំជូនអង្គការយូណេស្កូ និងដើម្បីពិគ្រោះយោបល់គ្នារវាងក្រុមល្ខោនខោលនានា ក្នុងការរិះរកនិងកំណត់យន្តការអភិរក្សទៅអនាគត។ សិក្ខាសាលានេះ គ្រោងធ្វើឡើងនាថ្ងៃទី២២ ខែសីហា ឆ្នាំ២០២២។
ល្ខោនខោលជាប្រភេទល្ខោនមួយយ៉ាងចំណាស់ ក្នុងចំណោមទម្រង់សិល្បទស្សនីភាពកម្ពុជា ដែលត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបី កាលពីថ្ងៃទី២៨ ខែវិចិ្ឆកា ឆ្នាំ២០១៨ ។ ដូច្នេះសិក្ខាសាលានេះ នឹងមានបទបង្ហាញរបស់អ្នកជំនាញជាតិ និងអន្តរជាតិ ព្រមទាំងតំណាងក្រុមល្ខោននានាផងដែរ ដើម្បីពន្យល់ពីសារៈសំខាន់នៃទម្រង់សិល្បៈបុរាណមួយនេះ។
បើតាមទំព័រហ្វេសប៊ុក ក្រសួងវប្បធម៌និងវិចិត្រសិល្បៈ «ល្ខោនខោលកម្ពុជា ៖ការរៀបចំរបាយការណ៍វឌ្ឍនភាព៤ឆ្នាំ» ធ្វើនៅសាលសម្ដែងនៃនាយកដ្ឋានសិល្បៈទស្សនីភាព ដើម្បីផ្សព្វផ្សាយឱ្យកាន់តែទូលំទូលាយអំពីទម្រង់ អត្ថន័យ បរិបទនៃល្ខោនខោលកម្ពុជាដោយបង្ហាញអំពីសាវតា វិវឌ្ឍន៍ និងដំណើរទៅអនាគត។
ល្ខោនដ៏ចំណាស់របស់ខ្មែរមួយនេះ ស្ថិតក្នុងចំណោមបញ្ជីបេតិកភណ្ឌអរូបីដែលត្រូវការសង្គ្រោះបន្ទាន់ (Urgent Safeguarding List)ដូចបេតិកភណ្ឌផ្សេងទៀតពីអាល់ហ្សេរី អាសែបៃហ្សង់ អេហ្ស៊ីប កេនយ៉ា ប៉ាគីស្ថាន និងស៊ីរី។
យោងតាមសៀវភៅ «បញ្ជីសារពើភ័ណ្ឌបេតិកភណ្ឌវប្បធម៌អរូបីកម្ពុជា» (Inventory of Intangible Cutural Heritage of Cambodia) ល្ខោនខោល បានវិវឌ្ឍចេញពីល្ខោនព្រះរាជទ្រពទៅជាល្ខោនដែលសំដែងដោយមនុស្សប្រុសសុទ្ធ។
ល្ខោនខោល មានសំដែងតែរឿងរាមកេរ្តិ៍ប៉ុណ្ណោះ ហើយការសំដែងមានអមដោយពំនោលសាច់រឿង និងកំដរដោយភ្លេងពិណពាទ្យ។ កាលពីដើម ល្ខោនខោល មាន៦ក្រុម ប៉ុន្តែបែកខ្ញែកគ្នាអស់នៅសម័យសង្គ្រាម ហើយក្រុមល្ខោនខោលវត្តស្វាយអណ្តែត ជាក្រុមតែមួយគត់ដែលនៅសេសសល់។
សហគមន៍វត្តស្វាយអណ្ដែតដែលស្ថិតក្នុងភូមិតាស្គរ ឃុំសារិកាកែវ ស្រុកល្វាឯម ខេត្តកណ្តាល បានថែរក្សាល្ខោនខោល និងបង្រៀនគ្នាពីមួយជំនាន់ទៅមួយជំនាន់ពីគ្រូទៅសិស្ស រួមទាំងការសម្ដែងទៅតាមជំនឿប្រពៃណីទំនៀមទម្លាប់របស់សហគមន៍ ពេលចូលឆ្នាំដើម្បីសិរីសួស្ដី និងសុំទឹកភ្លៀងធ្វើស្រែចម្ការនៅឆ្នាំបន្ទាប់ និងកម្មវិធីផ្សេងៗទៀត។
សូមបញ្ជាក់ដែរថា ចំពោះសាធារណជន សិល្បករ សិស្សនិស្សិត និងអ្នកស្រាវជ្រាវដែលមានបំណងចង់ចូលរួម អាចចូមរួមបានដោយមិនបង់ថ្លៃ។ ដោយកន្លែងមានកំណត់និងដើម្បីជួយសម្រួលដល់ការរៀបចំសូមចុះឈ្មោះឱ្យបានឆាប់ ចុះឈ្មោះបានតាមរយៈអ៊ីមែល
[email protected] ឬ តាមលេខទូរស័ព្ទ ០១៧ ៤៣១ ៣០១ ឬ ០៩៦ ៧៥ ៨២ ២១៣៕
© រក្សាសិទ្ធិដោយ thmeythmey.com