កូរ៉េខាងជើង នៅថ្ងៃទី១៣ ខែសីហា បានប្រកាសលើកចោលបម្រាមពាក់ម៉ាស់ និងបន្ធូរបន្ថយការរឹតត្បិត ដើម្បីទប់ស្កាត់ជំងឺកូវីដ-១៩ ផ្សេងទៀត។ ការប្រកាសនេះ ធ្វើឡើងតែប៉ុន្មានថ្ងៃប៉ុណ្ណោះ ក្រោយរដ្ឋាភិបាលក្រុងព្យុងយ៉ាងប្រកាសពីជ័យជម្នះលើជំងឺកូវីដ-១៩។

ចុចទីនេះដើម្បីទទួលបានព័ត៌មានរហ័ស

 

 

 

៣ខែក្រោយការប្រកាសពីការផ្ទុះករណីជំងឺកូវីដ-១៩ ដំបូង មេដឹកនាំកូរ៉េខាងជើង គីម ជុងអ៊ុន បាន​ប្រកាសជ័យជម្នះលើការប្រយុទ្ធប្រឆាំងនឹងជំងឺកូវីដ-១៩ នៅក្នុងកិច្ចប្រជុំមួយថ្ងៃទី១០ ខែសីហា។ បន្ថែមពីនេះ កូរ៉េខាងជើងបាន​ប្ដេជ្ញាសងសឹក​កូរ៉េ​ខាងត្បូង ដោយចោទថា ធ្វើឱ្យមានផ្ទុះការឆ្លងជំងឺកូវីដ-១៩ ធ្ងន់ធ្ងរចូល​ក្នុងប្រទេសខ្លួន។ 

 

បន្ទាប់ពីការប្រកាសខាងលើ កូរ៉េខាងជើង បានសម្រេចលើកចោលបម្រាមពាក់ម៉ាស់ និងបន្ធូរបន្ថយវិធានរឹតត្បិតជំងឺកូវីដ-១៩។ 

 

«វិធានរឹតត្បិតទប់ស្កាត់ជំងឺកូវីដ-១៩ ត្រូវបានបន្ធូរបន្ថយ ស្របពេលវិបត្តិសុខភាពសាធារណៈ ដែលត្រូវបានបង្កើតឱ្យមាននៅក្នុងប្រទេស ត្រូវបានលុបបំបាត់»។ ទីភ្នាក់ងារព័ត៌មានកូរ៉េខាងជើង KCNA បានចុះផ្សាយបែបនេះ ដោយបន្តថា ដែនដីទាំងមូល ត្រូវបានប្រែក្លាយកន្លែងគ្មានវីរុសឆ្លង ត្រឹមរយៈពេលខ្លីបំផុត។

 

ទន្ទឹមនេះ ទីភ្នាក់ងារព័ត៌មានដដែល បានចុះផ្សាយថា បម្រាមពាក់ម៉ាស់ត្រូវបានលុបចោលនៅក្នុងតំបន់ទាំងអស់ លើកលែងតែតំបន់ និងក្រុងជាប់ព្រំដែន។ បន្ថែមពីនេះ ការរក្សាគម្លាត និងវិធានប្រឆាំងជំងឺឆ្លងផ្សេងទៀត ក៏ត្រូវលុបចោលផងដែរ លើកលែងតែតំបន់ព្រំដែន។ ដោយឡែក ប្រជាជនដែលចេញរោគសញ្ញាជំងឺផ្លូវដង្ហើម គឺតម្រូវឱ្យពាក់ម៉ាស់ ដើម្បីបង្ការជំងឺឆ្លង៕