ផ្ទុះការរិះគន់ពេញបណ្តាញសង្គមនៅក្នុងប្រទេសចិនទៅលើស្ត្រីម្នាក់ ក្រោយការបែកធ្លាយការសន្ទនាការឆ្លើយឆ្លងសារគ្នាមួយក្នុងក្រុម WeChat រវាងគ្រូ និងអាណាព្យាបាល។ យោងតាមការផ្សាយរបស់ South China Morning Post ប្រតិកម្មរបស់ម្តាយរូបនោះ ត្រូវបានគេវាយតម្លៃថា មានជាមនុស្សសម្ភារនិយម សំដីអសុរោះ និងមានចរិតរើសអើង។
រឿងរ៉ាវបានកើតឡើងកាលពីអំឡុងខែមិថុនា ដោយសារព័ត៌មាន qq.com រៀបរាប់ពីគ្រូបង្រៀនម្នាក់ឈ្មោះ Wang ដែលបានជិះកង់ទៅបង្រៀន និងបានជួបកូនសិស្សម្នាក់តាមផ្លូវ។ ពេលទៅសាលា គាត់បានចូលអានក្រុម WeChat សម្រាប់គ្រូ និងឪពុកម្តាយ ហើយស្រាប់តែឃើញសារមួយពីអាណាព្យាបាលម្នាក់។
កិច្ចសន្ទនា ដែលត្រូវបានថតទុក (Screenshot) បានបង្ហាញឲ្យឃើញថា ម្តាយរបស់សិស្ស រិះគន់គ្រូថា ក្រីក្រជ្រុល រហូតដល់មិនមានលទ្ធភាពទិញឡាន។ ចំពោះករណីនេះ ស្ត្រីរូបនោះ យល់ថា ផ្តល់គំរូមិនល្អសម្រាប់កូនគាត់ ហើយអាចឲ្យគេគិតថា «ការសិក្សាគឺគ្មានន័យ»។
«លោកគ្រូ Wang សូមកុំជិះកង់ទៀតអី។ លោកគ្រូគួរទិញឡានហើយ»។ ម្តាយរបស់សិស្សឈ្មោះ Rongrong បានសរសេរយ៉ាង ដូច្នេះនៅក្នុង Group Chat ដែលមានសមាជិករួម៥៨នាក់។ លោក Wang បានឆ្លើយទៅវិញថា៖ «អរគុណម៉ាក់របស់ Rongrong ដែលបានយកចិត្តទុកដាក់។ តែវាជាបទពិសោធន៍ដ៏រីករាយមួយចំពោះការជិះកង់។ អ្វីដែលពិសេសនោះ គឺពីផ្ទះខ្ញុំទៅសាលា មិនសូវឆ្ងាយនោះឡើយ»។
យោងតាម South China Morning Post ការឆ្លើយឆ្លងបន្តមានទៅមានមក។ ម្តាយរបស់សិស្សនៅតែជំរុញឲ្យលោក Wang ទិញឡាន ពិសេសងាយស្រួលពេលភ្លៀង។ លោកគ្រូបន្តឆ្លើយថា៖ «ប្រសិនបើភ្លៀង ខ្ញុំនឹងមិនជិះកង់ឡើយ។ ខ្ញុំនឹងទទូរឆ័ត្រ ហើយដើរទៅសាលា។ ម្យ៉ាងវិញទៀត ការដើរ កាន់តែពិសេសសម្រាប់ខ្ញុំ»។
ម្តាយរបស់ Rongrong នៅតែមិនអស់ចិត្តដោយគាត់បន្តបង្ហាញហេតុផលផ្សេងៗដើម្បីជំរុញឲ្យគ្រូ Wang ទិញឡាន។ អ្នកស្រីបានសរសេរថា៖ «កូនប្រុសរបស់ខ្ញុំជិះឡាន BMW តាំងពីកើតមក។ មនុស្សនៅជុំវិញគេសុទ្ធតែមានរថយន្តទំនើបៗ។ លោកជាគ្រូបង្រៀនរបស់គេ ហើយលោកជិះកង់។ តើគេនឹងគិតយ៉ាងណា បើតាមយោបល់របស់លោក?»។
អ្នកស្រីបានបន្តថា រាល់ថ្ងៃគាត់ជំរុញកូនឲ្យប្រឹងរៀនសូត្រ ប៉ុន្តែបែរជាគ្រូរបស់គេជិះកង់ទៅវិញ ដូច្នេះវានឹងនាំឲ្យកូនគាត់គិតថា គ្រូបង្រៀនមិនអាចរកលុយបាន ហើយការសិក្សាគឺគ្មានប្រយោជន៍។ អ្នកស្រីបានប្រៀបធៀបថា លោក Wang ធ្វើការពាក់កណ្តាលជីវិតទៅហើយ ប៉ុន្តែនៅតែមានស្តង់ដារស់នៅក្រោមកូនរបស់គាត់ ដែលអង្គុយក្នុង BMW តាំងពីការកើតមក។
លោកគ្រូ Wang ទំនងជាមិនមានការតបតទៀតឡើយ ប៉ុន្តែក្នុងនោះ សារបង្ហាញពីការចូលរួមមតិយោបល់របស់អាណាព្យាបាលមួយចំនួន។ អាណាព្យាបាលម្នាក់បានសរសេរថា៖ «ម៉ាក់ Rongrong អើយ តាំងពីគ្រួសារអ្នកស្រីមានធនធានធូរធា អ្នកបែរជាស្អប់លោកគ្រូ Wang ដែលមិនមានឡាន។ ហេតុអ្វីបានជាអ្នកមិនទិញឡានមួយជូនគាត់តែម្តងទៅ?»។
ក្រៅពីអាណាព្យាបាលផ្សេងទៀតនៅក្នុង Group Chat មតិជាច្រើនក៏បានលើកឡើងផងដែរនៅលើបណ្តាញសង្គម ជាពិសេស Weibo, Heilongjiang ដ៏ពេញនិយមនៅចិន។ អ្នកខ្លះរិះគន់ម៉ាក់ Rongrong ថា ជាមនុស្សរើសអើង និងផ្តោតលើសម្ភារនិយមជ្រុល។
ក្នុងចំណោមអ្នកទាំងនោះ គ្រូបង្រៀនម្នាក់បានសរសេរថា៖ «ខ្ញុំជាគ្រូបង្រៀនម្នាក់ ខ្ញុំធ្លាប់ឆ្លងកាត់បទពិសោធន៍បែបនេះ។ សិស្សមួយចំនួនមើលងាយគ្រូដែលមិនមានឡានជិះ។ ខ្ញុំគិតថា ប្រការដែលគួរធ្វើប្រញាប់បំផុតនោះ គឺការដំឡើងប្រាក់បៀវត្សរ៍គ្រូបង្រៀន»៕