អ្នកស្រី ង៉ែ ដា ពន្យល់បន្ថែមថា ៖«​បណ្ណក្រីក្រគឺមាន ២ ប្រភេទ ដែលទី១ គឺក្រមួយដែលសំដៅទៅលើគ្រួសារដែលគាត់មានជីវភាពខ្វះខាតខ្លាំង ដែលភាគច្រើនគឺផ្ដោតទៅលើចាស់ជរា ស្ត្រីមេម៉ាយ កុមារកំព្រា ដែលអាចមានអទិភាពផ្ដល់បណ្ណក្រីក្រជូនពួកគាត់បាន ហើយ។ ចំពោះក្រ២ វិញ​គឺពួកគាត់មានគ្រួសារ មានផ្ទះសម្បែងសមរម្យ ប៉ុន្តែជូនកាលពួកគាត់មានជីវភាពខ្វះខាត រកចំណូលអត់បាន ឬក៏អាចមានសមាជិកក្នុងគ្រួសារណាម្នាក់ មានជំងឺ ដែលអាចផ្ដល់បណ្ណក្រ២ ជូនពួកគាត់បាន»​។ 

 

 

អ្នកស្រី ង៉ែ ដា បន្តទៀតថា ក្នុងរយៈពេល ៥ឆ្នាំចុងក្រោយនេះ ពលរដ្ឋដែលមានបណ្ណក្រីក្រថយចុះ ប្រមាណ ៥០បណ្ណ មូលហេតុដោយសារក្រុមការងារមិនបានប្រាប់ទៅពលរដ្ឋដែលគាត់មានបណ្ណក្រីក្រ ទើបពួកគាត់អាចគិតថាប្រហែលជា  រដ្ឋាភិបាលផ្ដាច់ប្រាក់ឧបត្ថម្ភសម្រាប់ពួកគាត់ គាត់អត់ដឹងថាក្នុងមួយជុំ មានរយៈពេលបីឆ្នាំ  ដែលពួកគាត់អាចដាក់ពាក្យស្នើសុំសម្ភាសន៍ម្ដងទៀតដែលវាអាចនឹងជាប់ ។ 

 

ជុំវិញការផ្តល់បណ្ណក្រីក្រ អ្នកស្រីជំទប់ឃុំអះអាងថា បានប្រព្រឹត្តទៅដោយតម្លាភាព និងយុត្តិធម៌ ហើយអ្នកដែលទទួលបានបណ្ណនេះ គឺជាពលរដ្ឋដែលក្រីក្រ លំបាក ពិតប្រាកដ។ «និយាយរួមទៅ ការផ្ដល់នឹងគឺប្រព្រិត្តទៅជាក់ស្ដែង គឺយើងមិនប្រកាន់ ទៅលើបក្សពួក ឬបុគ្គលនិយមអីទេ។ ជាក់ស្ដែងគឺសម្ភាសន៍អីផ្ទាល់ ពេលគាត់មកដាក់ពាក្យស្នើសុំ គឺយើងចុះសម្ភាសន៍ផ្ទាល់ ជាប់ឬមិនជាប់ គឺវាអាស្រ័យទៅលើជាក់ស្ដែង ដែលយើងចុះទៅផ្ទាល់»។ នេះជាការពន្យល់របស់អ្នកស្រី ង៉ែ ដា ជំទប់ទី១ ឃុំកណ្តោល។ 

 

អ្នកស្រីបានពន្យល់ទៀតថា បណ្ណក្រីក្រនេះ ​ពលរដ្ឋដែលមានបណ្ណក្រីក្រ អាច​ទៅពិនិត្យសុខភាព ឬព្យាបាលជំងឺនៅមណ្ឌលសុខភាព ​មន្ទីរពេទ្យ​ ​ដោយឥតគិតថ្លៃ  ហើយពួកគាត់ក៏ទទួលបានប្រាក់ឧបត្ថម្ភប្រចាំខែផងដែរ។  ដើម្បីកាត់បន្ថយអត្រាភាពក្រីក្រនៅក្នុងឃុំ អ្នកស្រី ង៉ែ ដា បានអះអាងថា អាជ្ញាធរ បានខិតខំផ្តល់ការបណ្ដុះបណ្ដាលជំនាញផ្សេងៗដូចជា ការចិញ្ចិមសត្វ ដាំដំណាំជាដើម។ លើសពីនេះ អាជ្ញាធរ ក៏នឹងស្វែងរកក្រុមហ៊ុន ឬបណ្តាអង្គការនានា ដើម្បី ផ្តល់ឱកាសការងារដល់ពួកគាត់ផងដែរ។ 

 

​លោកយាយ វិត ឡឹង វ័យ៨០នាំ ជាពលរដ្ឋដែលរស់នៅក្នុងភូមិតាំកន់ ឃុំកណ្ដោល ស្រុកបូទុមសាគរ ខេត្តកោះកុង។ លោកយាយ ​ទទួលបានបណ្ណក្រីក្រប្រភេទទី២ ប្រមាណ២ឆ្នាំ ហើយ​។ បើតាមស្ត្រីចំណាស់រូបនេះ ទន្ទឹមនឹងទទួលបានថវិកាចំនួន ១៧ម៉ឺនជារឿងរាល់ខែ លោកយាយក៏ទទួលបានគ្រឿងឧបភោគ បរិភោគដូចជា អង្ករ ត្រីខ មី ទឹកត្រី ទឹកស៊ីអ៊ីវមួយចំនួនដែរ ពីសប្បុរសជន និងអាជ្ញាធរឃុំ។ ​ពលរដ្ឋក្រីក្ររូបនេះ ក៏ទទួលបានការពិនិត្យ ព្យាបាលសុខភាព យ៉ាងយកចិត្តទុកដាក់ពីមណ្ឌលសុខភាព ឬ​មន្ទីរពេទ្យ​ ​ដោយឥតគិតថ្លៃផងដែរ។

​

លោកយាយ តូច សាវ ជាពលរដ្ឋក្រីក្រមួយរូបទៀត ដែលកំពុងរស់នៅក្នុងភូមិតាំកន់ ឃុំកណ្ដោល ស្រុកបូទុមសាគរ ខេត្តកោះកុង។ មានវ័យ ៨១ឆ្នាំ លោកយាយ តូចសាវ ​ទទួលបាលបណ្ណក្រីក្រប្រភេទទី១ ហើយស្ត្រីចំណាស់រូបនេះ ទទួលបានថវិកាចំនួន២០ម៉ឺនរៀលក្នុងមួយខែ។

 

លោកយាយ វិត ឡឹង ​​ជាពលរដ្ឋក្រីក្ររស់នៅក្នុងភូមិតាំកន់ ឃុំកណ្ដោល ស្រុកបូទុមសាគរ ដែលកំពុងកាន់កាប់បណ្ណក្រីក្រប្រភេទទី១។ 

 

​ក្រៅពីនោះ ក៏មានជំនួយផ្សេងៗទៀតជាគ្រឿងឧបភោគ បរិភោគមួយចំនួនផងដែរ។ ដូចគ្នានឹងលោកយាយ វឹត ឡឹងដែរ ការទៅពិនិត្យសុខភាព ឬព្យាបាលជំងឺនៅមណ្ឌលសុខភាព ឬ​មន្ទីរពេទ្យ​ ​គឺដូនចាស់ ទូច សាវ ទទួលបានការយកចិត្តទុកដាក់ និងផ្ដល់សេវាបានល្អ ពីគ្រូពេទ្យ៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ 

 

(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទ និងវីដេអូនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)