រថយន្តបុរាណម៉ាក់ Jeep ផលិតនៅចិន ៣គ្រឿង មានវត្តមាននៅរមណីយដ្ឋានកែច្នៃស្កាយលែន

ជាតិ

រថយន្ត

12, Sep 2022 , 7:29 pm

រូបភាព

កណ្តាល៖ លោក ស្រី ចាន់ថន ប្រមូលម៉ូតូ៥គ្រឿង និងរថយន្ដ១៥គ្រឿង ដើម្បីតាំងឱ្យសាធារណជនទស្សនា នៅរមណីយដ្ឋានធម្មជាតិកែច្នៃស្កាយលែន ដែលស្ថិតនៅឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល។ ក្នុងនោះមានម៉ូតូម៉ាក BMW HARLEY-DAVIDSON និង ROYAL ENFIELD ៥គ្រឿង ឡានទំនើបម៉ាក BRP, CHEVROLET, TOYOTA, MAZDA MERCEDES និង REZVANI ៧គ្រឿង ហើយរថយន្ដបុរាណ៨គ្រឿង ម៉ាក PACKARD ១គ្រឿង FORD ២គ្រឿង TOYOTA ១គ្រឿង M ១គ្រឿង និង BJC ៣គ្រឿង។

ចុចទីនេះដើម្បីទទួលបានព័ត៌មានរហ័ស

សូមទស្សនាវីដេអូខាងក្រោមនេះ៖

BJC ជាអក្សរពេញ គឺ Beijing JEEP Corporation ដែលបកប្រែជាភាសាខ្មែរថា ក្រុមហ៊ុន JEEP នៃក្រុងប៉េកាំង។ រថយន្ដម៉ាកចិន BJC ៣គ្រឿងខាងលើ មានប្រភេទ 北京212 ពណ៌ប្រផេះ ១គ្រឿង ផលិតនៅចន្លោះឆ្នាំ១៩៨៤ និងឆ្នាំ១៩៨៦។ ប្រភេទ 北京2020 ពណ៌ក្រហម ១គ្រឿង និងពណ៌ខៀវ ១គ្រឿង ដោយរថយន្តទាំង២គ្រឿងនេះ ប្រហែលផលិតឆ្នាំ១៩៩០។ 北京 គ្រាន់តែមានន័យថា JEEP នៃក្រុងប៉េកាំង ហើយគេប្រើឈ្មោះនេះតាំងពី២០ឆ្នាំ មុនទទួលសិទ្ធិអនុញ្ញាតជាផ្លូវការពីក្រុមហ៊ុនអាម៉េរិកាំង JEEP ។

តាមពិត 北京212 និង 北京2020 ជាប្រភេទតែមួយ តែជំនាន់ខុសគ្នា។ វាត្រូវបានផលិតឡានប្រភេទ 北京212 ពីឆ្នាំ១៩៦៥ រហូតដល់ឆ្នាំ១៩៨៦ ហើយពីឆ្នាំ១៩៨៦ រហូតដល់ឆ្នាំ២០០៥ បានផលិតឡានប្រភេទ 北京2020វិញ។ តាមពិត គេបន្តផលិតរថយន្ដប្រភេទនេះ តទៀត រហូតដល់សព្វថ្ងៃនេះ ដោយមានឈ្មោះផ្សេង។ តាំងពីដំបូង ឆ្នាំ១៩៦៤ វិស្វកររបស់ក្រុមហ៊ុន BAW បានច្នៃប្រឌិតរថយន្ដបង្វិលកង់ទាំង៤ ដែលមានទម្ងន់ស្រាលល្មម ដោយចម្លងតាមប្រភេទរថយន្ដសូវៀត УАЗ-469 តែម្ដង។ វាបានក្លាយទៅជាប្រភេទ 北京212 ហើយប្រភេទ 北京2020 បន្ទាប់ពីបានសហការជាផ្លូវការ ជាមួយក្រុមហ៊ុនអាម៉េរិកាំង JEEP និងយកឈ្មោះ BJC វិញ។ នេះជាមូលហេតុដែលធ្វើឱ្យឡានប្រភេទ 北京2020 វាស្រដៀងប្រភេទ 北京212 គ្រាន់តែខាងមុខមានប៉ាណា ដូចប៉ាណាឡានមាក JEEP ប្រភេទ Cherokee ។

អត្ថបទទាក់ទង

ម្ចាស់សណ្ឋាគារមួយរតនគិរី ដាក់តាំងរថយន្តយោធាប្រភេទ УАЗ-469 មុខសណ្ឋាគារ

រថយន្ដប្រភេទ 北京212 និង 北京2020 ត្រូវបាននាំចេញខ្លះទៅ ៨ប្រទេស ដូចជា អាល់បានី គុយបា ឆាដ លីបី កូរ៉េខាងជើង ប៉ាគីស្ថាន ស៊ីរី និងវៀតណាម។ 北京212 និង 北京2020 មួយចំនួនធំ បានបម្រើ ឬកំពុងតែបម្រើការក្នុងវិស័យយោធា។

ក្រុមហ៊ុន ដែលបានផលិត 北京212 និង 北京2020 បានដូរឈ្មោះច្រើនដង។ តាំងពីឆ្នាំ១៩៦១ រហូតដល់ឆ្នាំ១៩៨៤ មានឈ្មោះថា BAW ។ ពីឆ្នាំ១៩៨៤ ដល់ឆ្នាំ២០០៥ មានឈ្មោះថា BJC ។ ឆ្នាំ២០០៥ ដោយសារត្រូវសហការជាមួយក្រុមហ៊ុនរថយន្ដអាល្លឺម៉ង់ MERCEDES-BENZ វិញ វាដូរឈ្មោះទៅជា Beijing BENZ ។ ពេលបច្ចុប្បន្ន ក្រុមហ៊ុននេះស្ថិតនៅក្នុងក្រុមសម្ព័ន្ធ Beijing Automobile Works ៕

Tag:

យានយន្ត

រថយន្ត

ឡានបុរាណ